"Эрдэнэс тавантолгой” ХК-ийн гүйцэтгэх захирал асан Б.Ганхуяг нь “Овоот толгой ресурсес” ХХК-ийг эзэмшигч М.Батгэрэл гэгчээс их хэмжээний авлига авч, тэр мөнгөөрөө Спорт цогцолбор, орон сууцны хотхоны барилгын ажлыг санхүүжүүлж байсан баримтыг илчилж байна. Эхэнд нь сануулахад, М.Батгэрэл гэгчийн цаана О.Энхмандах гэгч байдаг, О.Энхмандахын цаана Ерөнхийлөгч асан Х.Баттулга байдаг буюу асар том схем бий. Мөн АТГ-аас Ерөнхийлөгч асан Х.Баттулгыг “Нүүрсний хулгай”-н хэрэгт холбогдсон 17 албан тушаалтны нэгээр зарласныг сануулах нь зүйтэй.

         Тодруулбал, “Эрдэнэс Тавантолгой” ХК-ийн гүйцэтгэх захирал асан Б.Ганхуяг 2020 оны хоёрдугаартай сард “ЭТТ/202001036” дугаартай, 799.3 тэрбум төгрөгийн санхүүжилттэй Цанхийн баруун уурхайд хөрс хуулалт, олборлолтын ажил гүйцэтгэгчийг шалгаруулах тендер зарласан. Тус тендерт “Монголиан контракт майнинг сервис”, “Монгол майнинг энд эксплорэйшн” ХХК гэх хоёр компани оролцсон ч Б.Ганхуяг хоёуланг нь хассан байгаа юм. Улмаар хоёр сарын дараа буюу 2020 оны дөрөвдүгээр сард Б.Ганхуяг  Цанхийн баруун уурхайд хөрс хуулалт, олборлолтын ажил гүйцэтгэгчээр “Овоот толгой ресурсес” ХХК-ийг тендергүйгээр шалгаруулж, тус компанитай 799.3 тэрбум төгрөгийн гэрээ байгуулжээ. Б.Ганхуяг ийнхүү 799.3 тэрбум төгрөгийн тендерийг зориуд цуцалж, “Овоот толгой ресурсес” ХХК-ийг хууль бусаар шалгаруулж, гэрээ байгуулсныхаа цаана асар их хэмжээний авлига, албан тушаалын “дарамт” байсан гэгдэж  буй.

               Б.Ганхуягаас тендергүйгээр 799 тэрбум төгрөг авсан “Овоот толгой ресурсес” ХХК-ийг Мягмарсүрэнгийн Батгэрэл, Беларус Улсын иргэн Slobodskiy Leonid нар эзэмшдэг. Мягмарсүрэнгийн Батгэрэл нь Баянхонгор аймгийн Бууцагаан сумаас гаралтай. 2017 он хүртэл аав В.Мягмарсүрэнтэйгээ хамтран эзэмшдэг “Монскан” ХХК-аараа төрийн байгууллагуудад автомашин нийлүүлэх 50-80 сая төгрөгийн жижиг тендерүүдэд оролцдог байсан. Харин 2017 онд  “Овоот толгой ресурсэс” ХХК-ийн эзэмшигч болж, Сэлэнгэ, Сүхбаатар аймагт байрлах нүүрсний уурхайнуудад хөрс хуулалт хийж эхэлснээр огцом хөрөнгөжсөн. М.Батгэрэлийн эхнэр Б.Наранцэцэг нь Хан-Уул дүүрэгт байрлах нэр бүхий сургуульд сургалтын менежерээр ажилладаг. Харин эхнэрийнх нь төрсөн дүү нь ЦЕГ-ын ХМТ-ийн даргаар ажиллаж байгаад Сүхбаатар аймгийн Цагдаагийн газрын даргаар томилогдсон Б.Баатархүү ажээ. М.Батгэрэлийн намтрын хувьд товчхондоо ийм.

               Харин  “Овоот толгой ресурсес” ХХК-ийн хамтран эзэмшигч Беларусь Улсын иргэн Slobodskiy Leonid гэгчийн хувьд Монголд 2015 онд орж ирсэн. Өдгөө Монголд уул уурхайн хүнд даацын машин техник, сэлбэг хэрэгсэл нийлүүлдгээрээ толгой цохидог “Юнайтед мерес машинери” ХХК-ийн ерөнхий захирлаар нь ажилладаг. “Юнайтед мерес машинери” ХХК нь Беларусийн төрийн өмчит “Белаз” компаниас хүнд даацын автомашинууд шууд нийлүүлдэг. Тэр тусмаа “Эрдэнэс Тавантолгой” ХК болон “Эрдэнэт үйлдвэр” ТӨХК-д хүнд даацын техник, сэлбэг нийлүүлэх монопол эрхтэй гэж болно. Жишээ нь, “Юнайтед мерес машинери” ХХК нь Б.Ганхуягийг “Эрдэнэс Тавантолгой” ХК-ийн гүйцэтгэх захирлаар ажиллаж байх үед буюу 2020 онд 56.2 тэрбум төгрөгөөр автосамосмал, 2021 онд 1.8 тэрбум төгрөгөөр дугуйт түрэгч, 2022 онд 2.3 тэрбум төгрөгөөр белаз автосамосмалын сэлбэг тус тус нийлүүлсэн байна.

        Ингэж харвал, “Эрдэнэс Тавантолгой” ХК-ийн гүйцэтгэх захирал асан Б.Ганхуяг  нь М.Батгэрэлийн  “Овоот толгой ресурсес” ХХК-тай нь 799.3 тэрбум төгрөгийн гэрээ байгуулаад зогсохгүй, хүнд даацын техник, сэлбэгээ ч М.Батгэрэлийн хамаарал бүхий  “Юнайтед мерес машинери” ХХК-аас нь авч байсан болж таарч байна.
 

“ОВООТ ТОЛГОЙ РЕСУРСЕС” ХХК-ИЙГ ЭЗЭМШИГЧ М.БАТГЭРЭЛ, SLOBODSKIY LEONID НАРЫН ЦААД ЭЗЭН О.ЭНХМАНДАХ,ТҮҮНИЙ ЦААД ЭЗЭН Х.БАТТУЛГА

            “Овоот толгой ресурсес” ХХК-ийг эзэмшигч М.Батгэрэл, Slobodskiy Leonid нарын ард О.Энхмандах гэх залуу байдаг. Өөрөөр бол, “Овоот толгой ресурсес” ХХК-ийн “нууц эзэн” гэх ч яриа бий. Тодруулбал, М.Батгэрэл нь О.Энхмандахтай нэгдүгээрт, тун ойрын хамаатан, хоёрдугаарт, бизнесийн хамтрагчид. Жишээ нь, М.Батгэрэл, О.Энхмандах нар 2015 онд өөрсдийнхөө нэрийг оролцуулсан “Мандах бат трейд инвестмент” ХХК-ийг хамтран үүсгэн байгуулж байсан. Харин Slobodskiy Leonid ба О.Энхмандах хоёрын холбоо хамаарлын тухайд, дээр дурдсан “Юнайтед мерес машинери” ХХК-аар холбогддог буюу О.Энхмандах нь “Юнайтед мерес машинери” ХХК-ийг 2012 онд байгуулагдах үед ТУЗ-ийн гишүүнээр нь ажиллаж байсан. Товчхондоо, О.Энхмандах гэгч нь өөрийн хамаатан Б.Батгэрэл, бизнесийн хамтрагч Slobodskiy Leonid нараар дамжуулан “Овоот толгой ресурсес” ХХК-ийг удирддаг буюу “жинхэнэ эзэн” нь гэх.

            Хамгийн ноцтой нь, О.Энхмандах халаас нэгтэй хамтрагчид, хамаарал бүхий этгээдүүдийг нь хөөвөл Ерөнхийлөгч асан Х.Баттулгатай шууд холбогддог. Тухайлбал, О.Энхмандах нь “Монгол хьюндай автомотив” ХХК-ийн ерөнхий захирлаар ажилладаг. Тус компани төрийн байгууллагуудад автомашин нийлүүлэх тендерүүдийг “түүдэг”-ээрээ зартай. Улсын төрийн холбоо хамаарлын хувьд, Ерөнхийлөгч асан Х.Баттулгатай нэг нутаг төдийгүй, “дагуул” нь гэгддэг. Х.Баттулгыг хаа явсан газар нь дагаж, шадар туслах нь мэт байж ирснийг улс төрийн хүрээнийхэн андахгүй. Х.Баттулга ба О.Энхмандах нарын холбоо хамаарлыг хөөвөл эхлэл цэг нь дээр дурдсан “Юнайтед мерес машинери” ХХК.

           Тодруулбал, “Юнайтед мерес машинери” ХХК-ийг 2012 онд Монголд анх байгуулсан хүн нь Беларусь Улсын иргэн В.Г.Яприцев. Тэр самбо бөхийн дэлхийн аварга бөгөөд Х.Баттулгатай 1980 оноос тив, дэлхийн тэмцээнүүд хамт барилдаж байсан найзууд. Ингээд зогсохгүй, В.Г.Яприцев “Юнайтед мерес машинери” ХХК-ийг 2012 онд Монголд байгуулмагцаа Х.Баттулгын тухайн үеийн туслах М.Отгонжаргалыг гүйцэтгэх захирлаараа томилж, О.Энхмандахыг ТУЗ-ийн гишүүнээрээ томилсон баримт бий. Өөрөөр хэлбэл,  “Юнайтед мерес машинери” ХХК-ийн Монгол талын жинхэнэ эзэд нь Х.Баттулга болон О.Энхмандах гэгдэж ирсэн.

            Эцэст нь нэгтгэж харвал, О.Энхмандах нь “Юнайтед мерес машинери” ХХК-ийн машин, техникүүдийг түшиглэн “Овоот толгой ресурсес” ХХК-ийг байгуулж, улмаар өөрийн хамаатан М.Батгэрэл, бизнесийн хамтрагч Slobodskiy Leonid нараар удирдуулсан. Улмаар Ерөнхийлөгч асан Х.Баттулгаар Б.Ганхуягийг “дарамтлуулж”, “Эрдэнэс Тавантолгой” ХК-ийн хөрс хуулалтын 799.3 тэрбум ажилд “Овоот толгой ресурсес” ХХК-аа шалгаруулсан дүр зураг харагддаг.