Эмэгтэй уран бүтээлчдийн үзэл санаа, мэдрэмжийг яруу найраг, гэрэл зургаар илэрхийлэх «Гоо улирал» арга хэмжээ өнгөрсөн сард боллоо. Яруу найрагчдын уншлагын зэрэгцээ дэлгэгдсэн гэрэл зурагчдын бүтээлийг тайлбартай нь уншигч танд хүргэж байна.

ХУНТ НУУР | Ө.Бундаа

Намрын оройн Увс нуурын мандалд хос хун тайван хөвнө. Дулаан орныг зорих нүүдлийнхээ өмнө нуурынхаа амгаланг эдлэх тэдний дүр төрхөөс байгалийн гоо үзэсгэлэн, эрх чөлөө, хосын нандин холбоо мэдрэгдэнэ. Улирал солигдож, нүүдэл эхэлсэн ч энэ агшин гэрэл зурагт мөнхөрчээ.

БУЙД | Д.Эрдэнэцэцэг

Баян-Өлгий аймаг, 2026

Цаст уулсын сүрлэг бараа, бүүдгэр тэнгэрт бүдэгхэн мандах сар, уулын бэлд нам гүмхэн орших айлууд. Байгаль, хүний амьдрал нэгэн кадрт ийнхүү огтлолцож, алслагдсан нутгийн өвөрмөц төрх, амгалан тайвныг өгүүлнэ. Уулсын сүрд нуугдаж, тал нутгийн уудамд уусан шингэсэн энэ суурин амьдралын энгийн атлаа нандин агшныг мөнхөлжээ.

ААДРЫН ДАРАА | Ч.Нарантуяа

Хар үүлсийн цаанаас цухуйх нар, хязгааргүй талыг дамнан татсан солонго. Аадар борооны дараах энэ агшинд байгаль гунигаа гээж, гэрэл өнгөөр дахин амилна. Тэнгэр, газрын заагт нумран татсан солонго борооны дараа ч итгэл найдвар, гоо сайхан оршсоор байдгийг сануулах мэт.

ЦЭЦГИЙН ЗОЧИН | Н.Ариунаа

Цагаан дэлбээт цэцгийн алагхан ертөнцөд далавчит бяцхан зочин саатжээ. Эрвээхэйн жигүүрийн хээ, цэцгийн зөөлөн дэлбээ, гэрэл сүүдрийн зохицол байгалийн өчүүхэн атлаа гайхамшигт гоо сайхныг илтгэнэ. Амьдралын хамгийн нандин агшнууд заримдаа ийм л энгийн, чимээгүйхэн дэлгэрдэг ажээ.

ХҮЛЭЭЛТ | Б.Ууганцэцэг

Хэнтий аймаг, Биндэр сум, Нарсан ойн хүрээлэн, 2025.05.16

Нарсан ойн нам гүмд бие биеэ харан зогсох сандлууд хэн нэгнийг хүлээх мэт. Салхинд найгах мод, цаг хугацаанд элэгдэх модон сандал, хүний мөр үгүйлсэн энэ орон зайд ирээгүй нэгний дурсамж, уулзах хүсэл шингэжээ. Хүлээлт хүн бүрт өөр. Зарим нь ирэх нэгнээ хүлээдэг бол зарим нь хэзээ ч ирэхгүйг нь мэдсээр байж хүлээдэг. Баяр жаргалтай ч бай, гунигтай ч бай, хүлээлт хүн бүрийн амьдралд байдаг.

БАЙГАЛЬ ӨӨРӨӨ УРАН ЗУРАГ | П.Нямцэцэг

Дорноговь аймаг, Сайншанд сум, 2025

Сэрүүн салхины намуухан илбээс, алтан шаргал нарны туяанд говийн унаган ургамал болох бут, бударгана шаргал, улаан хүрэн өнгөөр солонгорч, намрын үзэсгэлэнт уран зургийг бүтээнэ.

ГАНЦААРДАЛ | М.Гүнжилхам

Улаанбаатар, 2026 оны 10 сар

Цэлмэг хөх тэнгэрийн дор, өндөр барилгын оройд ганц хэрээ чимээгүйхэн суух нь хотын хөл хөдөлгөөн дундах ганцаардлыг илтгэх мэт. Эргэн тойронд амьдрал үргэлжилсээр атал зарим оршихуй өөрийн ертөнцөд ганцаар үлддэг. Магадгүй ганцаардал гэдэг эзгүй хоосон байх бус, хязгааргүй уудам дунд өөрийн дуу хоолойг чимээгүйхэн сонсохын нэр биз ээ.

ААВ | Ц.Нямдэмбэрэл

Мэлмэрэх усны мандлыг ширтэн чимээгүй суух аавын нуруунд амьдралын бодол, туулсан он жилүүдийн нам гүм шингэх мэт. Үг дуугүй алсыг ширтэх энэ агшинд аав хүний дотоод ертөнц, үр хүүхдийнхээ төлөө үүрсэн амьдралын жин, сэтгэлийн уужим орон зай мэдрэгдэнэ. Зарим хайр үгээр илэрдэггүй, харин дэргэд чимээгүйхэн оршихуйгаар мөнхөрдөг.

ӨНӨӨДРИЙН ӨНГИЙГ ӨӨРӨӨ БҮТЭЭНЭ | Г.Мөнхнаран

Замд таарсан энгийн нэгэн агшин. Машиныхаа ачааны хэсгийг сөхсөн хүн өөрийн ажил, амьдралын хэмнэлд завгүй яваа нь энэ дүр зурагт шингэжээ. Өдөр тутмын амьдралд өнгө нэмэх зүйл заавал содон байх албагүй. Өөрийн гараар бүтээж, өөрийнхөөрөө туулж буй мөч бүхэн өнөөдрийн өнгийг тодорхойлдог.

ЦЭЦЭГС ДЭЛГЭРЭХ ЦАГААР | Д.Мөнхнаран

Тавдугаар сарын эхэн. Хаврын урьтай хамт буйлс цэцэглэж, ягаахан дэлбээнүүд нарны гэрэлд нялхарна. Богинохон хугацаанд дэлгэрэх цэцэгсийн гоо үзэсгэлэн хаврын амьсгал, байгалийн сэргэлт, амьдралын шинэхэн эхлэлийг илтгэнэ. Удалгүй дэлбээ нь унах ч энэ агшин гэрэл зурагт хаврын дурсамж болон үлджээ.

ЦӨӨРӨМ | З.Энхжин

Ногоорон байх цөөрмийн мандалд дэгдээхэй ганцаараа хөвж, жижигхэн долгио үүсгэнэ. Усны мандлыг тойрон тархах долгион бүр бяцхан амьтны ертөнцтэй танилцах анхны аяллыг санагдуулна. Эгэл жирийн энэ агшинд байгалийн амгалан, амьд бүхний гэгээн төрх шингэжээ.

ГҮНЖ | Б.Аманда

Ногоон нүднийхээ гүнээс ертөнцийг ажих бяцхан гүнж. Сувдан зүүлт, цэнхэр чулуун чимэглэл түүний эрхэмсэг төрхийг тодотгож, харцанд нь сониуч зан, намуухан нууцлаг байдал зэрэгцэнэ. Зарим гоо үзэсгэлэн үггүй атлаа сэтгэлд хоногшдог ажээ.

ЗҮРХНИЙ ГУНИГ | Б.Амирлан

2026.09.26

Намар чи
Уйтгар цалгиулж айлчилчихаад
Бялхсан их хүслийг залгиж
Ундарсан арвин мэдрэмжийг
Хэнэг ч үгүй хамж хийсгээд
Бор толгодыг цайрахаас өмнө
Хүрэн зүрх эвлэхээс урьтаж
Аниргүйн гүнд живүүлчихээд
Хоосрол харанхуйн чинадад
Аажим аажмаар булшлах юм даа

БОРООНЫ ӨДРҮҮД (RAINY DAYS) | Х.Алтанцэцэг

2026.08.25

Борооны дараах хотын гудамж, байшингуудын дундах бүдэг гэрэл, нил ягаан шүхэр дор алхан одох нэгэн. Нойтон замд тусах дүрс, хуучин хананы барзгар төрх хотын амьдралын намуухан гунигийг илтгэнэ. Заримдаа бороо зөвхөн гудамжийг бус, сэтгэлийг ч чимээгүйхэн угааж, бодлын алсад хөтөлдөг билээ.

ОЙДОС | Э.Булганжаргал

Толинд харах өндөр настай эмэгтэйн тусгалд залуу эмэгтэйн дүр харагдана. Хажууд нь ширээн дээр өө сэвгүй хоёр эмэгтэйн баримал зогсоно. Насжиж буй бодит хүн, толин дахь залуу дүр, хөдөлгөөнгүй баримлуудын зэрэгцэл гоо үзэсгэлэнг өөр өөр өнцгөөс харуулна. Гоо үзэсгэлэнг зөвхөн залуу нас, өө сэвгүй төрхөөр хэмжих аргагүй. Туулсан он жил, хуримтлуулсан туршлага бүр хүний гоо үзэсгэлэнд өөрийн үнэ цэнийг нэмдэг.

БАГВААХАЙ | Т.Хулан

Эргэн бүдгэрэх орчин сэтгэл дотор эцэс төгсгөлгүй эргэлдэх бодлыг илтгэнэ. Харин тэр бүхний төвд бүдэгхэн ч гэсэн оршсоор буй цэцэг цаг хугацаа өнгөрсөн ч мартагдаагүй дурсамж, сэтгэлээс арилаагүй мэдрэмжийг төлөөлнө. Бүх зүйл бүдгэрч болох ч зарим мэдрэмж бидний дотор тод хэвээр үлддэг.