Хятадын Шаньдун мужийн Шинтай хотноо 100 буудалт даамын өсвөр үе, залуучуудын ДАШТ болж байна. ДАШТ-ий залуучуудын ангилалд өрсөлдсөн Дэлхийн даамын холбооны мастер Эрдэнэсайханы Даариймаа зургаан хожижл, хоёр тэнцээтэйгээр, нийт 14 оноо авсан амжилтаар үндсэн төрлийн тэмцээн өндөрлөхөөс нэг тавилын өмнө дэлхийн аварга болох болзлоо хангалаа.

    Тэрбээр “Алтан хүү” клуб дээр Олон улсын их мастер Р.Манлай, спортын мастер Ц.Алтанхуяг нарын удирдлага дор бэлтгэл сургуулилалтаа базаадаг. Э.Даариймаа ийнхүү Монголын даамчдаас өсвөрийн болон залуучуудын ангилалд дэлхийн аварга цолыг хоёуланг нь хүртсэн анхны тамирчин болов. Тэрчлэн залуучуудын дэлхийн аварга цолонд хүрсэн хоёр дахь даамчин (эхнийх нь 2023 онд Б.Мөнхжин) болсон. “FMJD”-гийн журам есоор Э.Даариймаа дээрх амжилтаараа Олон улсын мастер (MIF) цолны болзлыг хангаж байна.

   Мөн энэ өдөр тэмцээний хамгийн бага нас буюу “U8” хүртэлх насны охидын дүн гарч, “Элит” клубийн тамирчин ДМ Оюунболдын Гэгээ хүрэл медалийн болзол хангалаа. Түүний хувьд өнгөрсөн ДАШТ-ий блиц төрлөөс хүрэл медаль хүртэж байв. Тэмцээний үндсэн төрөл маргааш өндөрлөж, медалийн эзэд бүрэн тодорно.  Энэ удаагийн 2026 оны ДАШТ-д “FMJD”-ийн гишүүн 15 орны 348 тамирчин, таван насны ангилалд өрсөлдөж байгаа юм. Сүүлийн дөрвөн жил дараалан дэлхийд багаараа аваргалсан Монголын баг энэ удаагийн ДАШТ-д 76 тамирчны бүрэлдэхүүнтэй оролцож байна.