Өнөөдөр Монгол Улсад тулгарч буй асуудлууд ар араасаа утас шиг хөврөн гарах нь энгийн үзэгдэл болоод  ард иргэд дөжрөөд удаж байна. Асуудлыг яг төр харж чадаж байна уу гэвэл бас үгүй. Тэгвэл ард ирээдүйн залуу боловсон хүчин болох сурагчид ямар гаргалгаа гаргаж, бидний хараагүй ямар зүйлийг хөндөж байгааг хүргэх гэж зорилоо.

АСУУЛТ: Чамд Монгол Улсын эрх барих нэг өдөр байна. Чи юу хийх вэ?

-Би хотын төв хэсэгт амьдардаг ч гэсэн гэрэлтүүлэг үнэхээр хангалтгүй санагддаг. Орой бэлтгэлээ тараад явж байхдаа согтуу хүмүүсээс их айдаг. Гол нь гэрэлтүүлэг байхгүй газар таарах нь энгийн л үзэгдэл. 

Ерөнхий боловсролын II сургуулийн 10-р ангийн сурагч Ц.Нандин-Эрдэнэ

Улаанбаатарын гэрэлтүүлгийг бүрэн хангана

Архины хамааралтай хүмүүсийг албадан ажил хийлгэж, өөрсдөөр нь амьдралаа шинээр эхлэх боломж олгоно. Гэрэлтүүлгийг хотын төв гэлтгүй гэр хорооллуудаар тавьж, камержуулж аюулгүй байдлыг нь бүрэн хангаж өгмөөр байна. Тэнд надаас бяцхан зүрх яаж айж түгшээд явж байгааг бидний хэн нь ч мэдэхгүй.

Ерөнхий боловсролын 21-р сургуулийн 11-р ангийн сурагч Б.Мөнхмандах

УИХ-ын гишүүд, сайд нарыг солино эсвэл цөөлнө

-Эрх мэдэлтнүүд хүүхэд байхаасаа улсаа тонож, дээрэмдэнэ гэж боддоггүй л байх. Төрд дархлагдсан хүмүүс суудлаа тавьж өгөхгүй дараагийн өөрийгөө бүтээгээд яваад байдаг юм шиг санагддаг. Тийм болохоор төрийг тогтолцоогоор нь өөрчилж, агаар сэлгэж байх ёстой. Би чадварлаг залуу боловсон хүчин Монголд хангалттай байгаа гэдэгт итгэдэг.

МУИС-ийн компьютер сүлжээний 3-р курсийн оюутан Э.Энхбаяр

Хуулийг чангатгаж, шийтгэлийг оновчтой тусгана

-Эхлээд ойрын дөрвөн жилийн улсын төсвийг нарийн тодорхойлж, Монгол Улсын ард иргэдэд шилэн байлгах. Жижиг том гэлтгүй батлагдсан төсвүүд дээр анхаарал хандуулж, хөрөнгийг ашигтай, чухал зүйлд зарцуулах хэрэгтэй. Ажлын хэсгийг зөв хуваарилж, тус тусад нь хатуу хяналттай байлгах.

 Үүний тулд хууль хүн бүр эрх тэгш, хүчтэй байх нь нэн чухал. Үр дүнд Монголд энгийн үзэгдэл болсон албан тушаалаа хэтрүүлэн ашиглах, авлига авах, дамнасан цавчаанаас цаашлаад гадагшаа импортлогдож байгаа байгалийн баялгаа хүртэл бид бүрэн хамгаалж чадна гэдэгт би итгэж байна.

Индра кибер сургуулийн 11-р ангийн сурагч Э.Мөнхжаргал

УИХ-ын гишүүдийг бүгдийг нь тарааж, шинэ үеийн боловсон хүчнүүдийг оронд нь гаргана

-Хүн алдаа гаргахыг би хүлээн зөвшөөрдөг. Хоёр дахь удаагаа боломж олгох нь ч зөв. Харин гурав дахь гэж байх ёсгүй. Ихэнх оронд асуудлыг тэр дор нь шийддэг, харин Монголд асуудалтайгаа нүүр тулсаар байж байтал ар араас нь өөр асуудлууд гарч ирсээр байдаг нь үнэхээр харамсалтай. Хэрвээ би хариуцлагагүй үйлдэл давтамжтай гаргаад байвал чаддаг нэгэнд нь байр сууриа тавьж өгөхийг илүүд үзнэ. Бидэнд ёс суртахуун маш чухал гэдгийг томчууд мэдээсэй гэж хүсэж байна.

Хүмүүнлэгийн ухааны их сургуулийн англи хэлний 1-р курсийн оюутан Ж.Есүгэн

Амьдралын боломж тааруу тэр тусмаа өрх толгойлсон хүмүүст тусламжийн гараа хүргэнэ

-Би сурахын хажуугаар зөөгч хийдэг. Тэнд маш их хоол зүгээр л хогийн сав руу хаягддаг. Энэ бүгдийг хэн нэгэнд савлаад өгчихвөл бидний төсөөлөөгүйгээр баярлах хэдэн мянган гэр бүл байгаа бол гэхээс гол харладаг. Бид зүгээр л нэг нэгэндээ тустай байвал тэгээд болчих юм шиг санагддаг.

Энэ бодол зарим хүнд энгийн эсвэл шийдэлгүй, өдөр хоногийг аргацаасан зүйл байж магадгүй ч гэсэн би иймхэн л зүйлийг хүснэ. Иимхэн мэт боловч олон хүнд бодит хэрэгтэй зүйл болчихоод байна.