“Өгөөмөр хайр” дэлгүүр СХД-т үйл ажиллагаа явуулдаг бөгөөд дэлгүүрийн бүх зүйл үнэгүй. Сайхан сэтгэлт иргэдийн хандиваар өгсөн хувцас, тоглоом, хичээлийн хэрэгслийг төслийн менежер Ц.Болор-Эрдэнэ ангилж ялгаад дэлгүүртэй байрлуулдаг. Харин үйлчлүүлэгчид өөрт хэрэгтэй хувцас, хэрэглэлээ үнэгүй аваад, сэтгэл дүүрэн дэлгүүрээс гардаг байна.

-Танд энэ өдрийн мэнд хүргэе. Өгөөмөр хайр дэлгүүрийн нээх санаа анх хэзээ төрсөн юм бэ?

                -2025 оны аравдугаар сард энэ төслийг санаачилсан Ж.Отгонбаяр ах залгаад “Сайн санаат иргэдээс ирсэн хувцас хэрэглэлийг зорилтот бүлгийн хүмүүст нь тараагаад өгөөч гэж хүссэн юм.Гэрээсээ тараах боломжгүй учраас жижиг газар түрээслэхээр ярьсан. Арваннэгдүгээр сарын 1-нд төсөл маань бүрэн хэрэгжиж, “Өгөөмөр хайр” дэлгүүр үүд хаалгаа хэрэгтэй хүмүүстэй бүрэн нээсэн дээ.

-Анх дэлгүүр нээх хувцсаа хэрхэн цуглуулж бэлдсэн бэ?

                -King tower хотхоны дөрвөн орцны үүдэнд байрлуулсан хуучин хувцас, тоглоом, хэрэглэл хүлээн авах хайрцгууд сайн хүмүүсийн хандиваар дүүрч, төсөл маань хэрэгжих боломжтой болж, дэлгүүр маань нээгдсэн. Олны хандиваар их хувцас ирж, дэлгүүр маань хувцсаар тасрахгүй байгаа.

-Дэлгүүрийг нь мэдсэний дараа хандиваар маш их  хувцас ирсэн гэсэн. Ирж байгаа хувцсанд ямар шаардлага тавьдаг вэ?

                -Тийм ээ, үнэхээр их хувцас ирж байгаа. Хүмүүсийн хажууд ялгахгүйгээр бүгдийг нь талархаж хүлээж авдаг. Дараа нь дэлгүүр дээрээ тавих, шатаах гэсэн хоёр төрөлд ялгаж ангилдаг.

-Угаах, ялгах бэлдэх гээд их ажилтай байгаа байхдаа. Дэлгүүрт нь танаас гадна өөр ажилтан бий юү?

                -Ирсэн хувцаснуудаас толбогүй, урагдаагүй, хүн өмсөж болохоор хуучраагүй хувцсыг нь аль болох ялгаж авч, дэлгүүр дээрээ тавьдаг. Угааж, цэвэрлэж төдийлөн амждаггүй юм. Гэхдээ бидэнд хувцсаа авчирч өгч байгаа хүмүүс ихэвчлэн угааж, цэвэрлээд аваад ирдэг. Дэлгүүр дээр маань одоогоор надаас өөр хүн хүн ажилладаггүй ээ. Ээж маань бөөрний дутагдалтай учраас долоо хоногт гурван удаа эмнэлэг орох шаардлагатай байлдаг юм. Тиймээс завтай гурван өдрөө дэлгүүрээ нээдэг.

ӨГӨӨМӨР ХАЙР ДЭЛГҮҮРЭЭС ХҮҮХДҮҮД НОМ АВЧ УНШИХ ХАМГИЙН ИХ ДУРТАЙ

-Өөр салбар дэлгүүр нээх бодол бий юү?

                -Одоогоор өөр салбар нээх бодол байхгүй ээ. Гэхдээ орон сууцны хорооллуудаас “Хандивын хайрцгаа тавиад өгөөч” гэсэн санал их ирдэг. Хэдийгээр сайхан ч хайрцаг олон болох тусам ачаалал ихэсдэг учраас одоогоор тэр ачааллыг дийлэхгүй. Мөн хувцас хандивын хайрцгийг тавихад санхүү шаардлагатай.

-Хүмүүс анх үнэгүй дэлгүүр, хүссэн хувцсаа аваад явж болно гэдгийг сонсоод ямар хариу хэлсэн бэ, баярласан хүмүүс олон байхдаа?

                -Анх үнэгүй гэдгийг нь сонсоод их гайхсан. Гэхдээ үнэхээр өөрсдөд нь ийм тусламж хэрэгтэй байсан учраас дэлгүүрийг маань баярлаж, талархаж хүлээж авсан. Ажилд өмсөх малгай, хувцас, зузаан гадуур хувцас, өмд их хайж орж ирдэг.

-Дэлгүүрээс нь дулаан хувцаслаад, хэрэгтэй хувцсаа өмсөөд гарч байгаа үйлчлүүлэгчдэдээ хараад танд юу бодогддог вэ?

                -Нүд халтирам дүр зураг олныг хардаг  шүү. Гадаа цасан шуургатай хүйтэн байхад нүцгэн шахуу явж байдаг хүүхдүүдтэй таарна. Тоглоом хараад баярлаж байгаа хүүхдүүдийг хараад их өрөвддөг. Хүүхдүүд ном авах их дуртай, шинэ ном ирсэн эсэхийг асуугаад авч уншдаг. Өөрийгөө бусдад буян болсон сайхан ажил хийж байна гэж бодож байгаа, хүмүүсийн хэлсэн урмын үгсээр тэтгэж, хийж байгаа ажлыг минь үнэлдэг.

-Өгөөмөр хайр дэлгүүрт хамгийн ховор ирдэг ч хүмүүст хамгийн их хэрэгтэй байдаг зүйл нь юу вэ?

                -Илч нь арилж, муудаагүй өвлийн гутал л хамгийн хэрэгтэй байдаг даа. Хамгийн ховор ирдэг ч хамгийн хэрэгтэй нь гутал байдаг. Өнгө үзэмж нь, дулаан илч нь арилаагүй гутал л бидэнд одоо хэрэгтэй байгаа.

-Анх төсөөлж, хүргэхээр зорьсон үйлчлүүлэгчдэдээ хүрч чадаж байна уу. Хүүхдүүд хэр орж ирдэг вэ?

                -Тийм ээ, хэрэгтэй хүмүүст маань дэлгүүр маань хангалттай хүрч байгаа. Гэхдээ 100 хувь биш, ухаалга утасгүй учраас дэлгүүрийн маань талаар мэдээгүй хүмүүс байгаа. Тэдэндээ хүрч ажиллахыг хүсэж байгаа. Цахим сүлжээнээс мэдээгүй хүмүүс маань хүмүүсээс сонсоод дэлгүүр дээр ирж байгаа.

-Таны дараагийн зорилго, мөрөөдөл юу вэ?

                -Дулаахан тухтай, цэлгэр, илүү олон хүн орж ирээд тухтай өөрт хэрэгтэй хувцсаа аваад гардаг дэлгүүртэй болохыг хүсэж байгаа. Заримдаа хүн зөрөх ч зайгүй болдог дэлгүүртээ хүмүүст дэм болох гээд ажиллаж байна даа.