Уран сайхны гимнастикийн тамирчин, спортын мастер Н.Урангоотой ярилцлаа. Дөрвөн настайгаасаа гимнастикаар хичээллэж эхэлсэн тэрбээр өдгөө Монгол Улсын нэрийг дэлхийн тавцанд гаргасан тамирчин болжээ.

-Энэ өдрийн мэнд хүргэе. Уран сайхны гимнастикаар хэзээнээс хичээллэж эхэлсэн бэ?

-2012 онд дөрвөн настайгаасаа гимнастикаар хичээллэж эхэлсэн. Цэцэрлэгт байхад одоогийн дасгалжуулагч Б.Эрдэнэзаяа багш сонгон шалгаруулалт явуулж, “Старлит” клубтээ урьж авч байсан. Ингэж клубтээ элсэж, хичээлээ заалгаж эхэлснээр дуртай болж,  уран сайхны гимнастикаар хичээллэх хүсэл зорилготой болсон доо.

-Сүүлийн үеийн амжилтуудаасаа дурдвал, энэ дундаас хамгийн сэтгэл хангалуун байгаа шагнал нь аль нь вэ?

-Сүүлийн жилүүдэд Монгол Улсын болон олон улсын тэмцээнүүдэд амжилтууд гаргасан. Тэр дундаас Азийн аварга шалгаруулах тэмцээнд финалын шатанд шалгарч 2022 оны шилдэг найман тамирчны нэг болсон. Мөн 2023 онд амжилтаа ахиулж шилдэг зургаад шалгарсан. Энэ дундаас сэтгэлд хүрсэн онцлох амжилт гэвэл 2024 оны АЭУ-ын Дубай хотод болсон олон улсын тэмцээнд дөрвөн хэрэглэлээр оролцож, тус бүрд нь алтан медаль хүртсэндээ баяртай байгаа. Дөрвөн алтан медалийг нэг тэмцээнээс хүртэх үнэхээр сайхан юм билээ.

-Энэ спортоор хичээллэсний үр шим нь юу байсан бэ?   

-Уран сайхны гимнастик таван төрлийн спортыг багтаасан давуу талтай. Уран сайхны гимнастикаар хичээллэснээр гоо зүйтэй байхаас гадна, бие уян хатан болгодог мөн тэсвэр хатуужилтай, хүмүүжилтэй, хариуцлагатай, бусдын үгийг даах чадвар суудаг даа.

-Гэр бүлийн гишүүд нь хэр их дэмждэг вэ?

-Уран сайхны гимнастикаар хичээллэсэн 12 жилийн хугацаанд Монголын тэмцээнээс дэлхийн дэвжээнд гартал тасралтгүй гэр бүлдээ үргэлж талархдаг. Намайг энэ хүртэл дэмжих хүмүүс байдаг учраас амжилттай тэмцээндээ оролцдог байх. Тайзан дээрх хамгийн үзэсгэлэнтэй хараах булаах нэгэн болгодог хувцсыг минь үргэлж урладаг ээждээ хамгийн их баярлалаа. Ээжийнхээ урласан хувцсыг өмсөөд үзүүлбэр үзүүлэхдээ өөртөө илүү итгэлтэй болдог.

 АМЖИЛТАД ХЯЗГААР ҮГҮЙ УЧРААС ИЛҮҮ ХИЧЭЭЖ, ДЭЛХИЙД ЭХ ОРНЫХОО НЭРИЙГ ГАРГАСАН ТАМИРЧИН БОЛНО

-Тайзан дээр үзүүлбэр үзүүлж байхдаа юу боддог вэ?

-Хийж байгаа зүйлдээ анхаарлаа төвлөрүүлж, бэлтгэлээсээ илүү сайхнаар, төгс үзүүлбэр үзүүлэхийг л хичээдэг дээ.

-Гадаад дотоодын олон тэмцээн уралдаанд оролцсон юм билээ. Бүгд л хичээл зүтгэл шаардсан байх тэр дундаас хамгийн их бэлтгэл шаардсан нь ямар тэмцээн байсан бэ?

-Азийн аварга, дэлхийн аварга шалгаруулах тэмцээнүүдэд орохоор бэлдэж, Азербайжан Улсын Баку хотод олон улсын хамтарсан бэлтгэл гурван сар хийсэн.

-Спортоор хичээллэж байх явцад олон бэрхшээл, шантарсан үе гардаг шүү дээ. Чамд тийм  үе хэр гардаг вэ, хэрхэн тэр үеийн давдаг вэ?

-12 жилийн хугацаанд шилжилтийн насан дээрээ байхдаа хэсэгхэн энэ бүхнийг хийхээ болимоор санагдаж, шантарсан. Тэр үед Б.Эрдэнэзаяа багшаасаа зөвлөгөө авч хэсэгхэн үеийн хямралаа давсан даа. Шантраагүйдээ баярласан үе олон бий.

-Уран сайхны гимнастикаар хичээллэж байгаа тамирчинд анхаарах ёстой дэглэм байдаг уу?

-Нас нэмэх тусам тодорхой хэмжээгээр хоолны дэглэм барих шаардлагатай болдог. Гоо зүйн талын спорт болохоор гадаад үзэмжээ анхаарах шаардлагатай байдаг даа.

-Уран сайхны гимнастик тууз, бөмбөг зэрэг хэрэглэлүүдийг ашигладаг шүү дээ. Таны хувьд ямар төрлөөр нь хичээллэдэг вэ. Сурахад хамгийн хэцүү байсан төрөл нь аль нь вэ?

-Гимнастик нь чөлөөт, олс, цагариг, бөмбөг, булав, тууз гэсэн зургаан төрөлтэй. Би тус зургаан  төрлөөр хичээллэж байсан. Одоо насан хүрэгчдийн ангилалд цагариг, бөмбөг, булав, тууз гэсэн дөрвөн хэрэглэлээр хичээллэж оролцож байна.

-Н.Урангоо ирээдүйн мэргэжлээ сонгосон уу. Мэргэжил эзэмшсэн ч гимнастикаа орхилгүй хичээллэх үү?

-Ирээдүйд ч уран гимнастикийн чиглэлээр суралцахаар төлөвлөсөн. Өөрийнхөө хамгийн сайн чаддаг дуртай зүйлээ бусдад түгээхийг хүсдэг болсон.

-Гимнастикаар хичээллэх хугацаанд тохиолдсон хамгийн хөгжилтэй дурсамжаасаа хуваалцах уу?

-Багадаа олон улсын тэмцээнд оролцохоор гадаад явахдаа хамтдаа бэлтгэл хийдэг байсан н.Хишигзаяа эгчийгээ “Ээжээ” гэж дууддаг байснаа их санадаг. Дотно санагдаад тэгж дууддаг байсан минь их хөөрхөн, хөгжилтэй дурсамж болсон.

-Оролцохыг хүсдэг тэмцээн, авахыг хүсдэг шагнал бий юү?

-Би олимпоос бусад тэмцээнүүдэд оролцож үзсэн учраас миний дараагийн зорилго олимпын наадам байгаа.  Миний мөрөөдөл л дөө. Мөн хүссэн амжилтаа хараахан гаргаж чадаагүй байгаа олон улсын тэмцээнүүддээ дахин оролцож, эх орныхоо нэрийг гаргана. Өдий болтол зааж сургасан Б.Эрдэнэзаяа, М.Номуундарь багшдаа болон тусалж дэмжиж ирсэн бүх хүмүүстээ маш их баярлалаа. Цаашид ч улам хичээх болно, амжилтад хязгаар үгүй.