• Өнөөдөр 2024-03-29

М.ЭНХРИЙМАА: Азийн хүүхдийн шилдэг топ модель болсондоо итгэж чадаагүй

2022-05-21,   3603

     Эх орноо төлөөлөн Гүрж Улсын Тбилиси хотод зохион байгуулагдсан “World Rising Stars-2022” олон улсын миссийн тэмцээнд амжилттай оролцож, “Азийн хүүхдийн шилдэг топ модель”, “Шилдэг үндэсний хувцас”  ангилалд шилдгээр шалгарч, титмийн эзэн болсон М.Энхриймаатай ярилцлаа. Тэрбээр өдгөө есөн настай бөгөөд "Шинэ Монгол Харүмафүжи" сургуулийн гуравдугаар ангийн сурагч юм. Үзэгчид түүнийг “Хадмын хайр” уран сайхны киноны сэргэлэн охины дүрээр нь таних билээ.

-Тэмцээндээ амжилттай оролцоонд ирсэн М.Энхриймаадаа баяр хүргэе. “Wolrd Rising Stars-2022” тэмцээнээс “Азийн хүүхдийн шилдэг топ модель”, “Шилдэг үндэсний хувцас” ангилалд шилдгээр шалгарч, шагнал авахад ямар мэдрэмж төрсөн бэ?

    -Үнэхээр сайхан мэдрэмж авсан. Би шагналаа авчихаад тайзнаас буугаад уйлсан. Дотроо “Би үнэхээр чадчихлаа гэж үү” гэж бодоход л нулимс өөрийн эрхгүй урсаад уйлаад байсан.

-Топ модель болно гэдэгтээ хэр итгэлтэй байсан бэ?

    -Би энэ тэмцээнд их хичээж оролцсон. Хичээсэн учраас ялсан гэж бодож байгаа. Ялна гэдэгтээ 100 хувь итгэлтэй байсан.

-Тус тэмцээнд хэр удаан бэлдсэн бэ. Хамгийн их дэмжиж, урам өгсөн хүн нь хэн байв?

         -Надад олон хүн тусласан, тэр дундаа гэр бүлийнхэн маань хамгийн их дэмжлэг үзүүлсэн. Намайг дэмжсэн олон хүн байсан болохоор ялж чадсан гэж бодож байна. Тэмцээн эхлэхэд өөртөө итгэх итгэл бага байсан, харин хүмүүс надад урам зориг өгч байсан учраас би цаашлах хүчтэй болсон. Тэмцээндээ 10 хоногийн турш бэлдсэн. Багш намайг сайн байсан учраас цөөн хоногт олон зүйл сурсан гэж хэлсэн.  

 

-Эмэгтэй хүүхэд бүр гүнж шиг титэм зүүгээд, гоё даашинз өмсөөд алхахыг мөрөөддөг шүү дээ. Тайзан дээр даашинзтай, титэм зүүгээд алхах ямар байсан бэ?

    -Би гүнжтэй хүүхэлдэйн кино их үздэг. Жаахан байхдаа гүнж болохыг маш их хүсдэг байлаа. Тайзан дээр зогсож байхдаа хүсэл минь биелчихлээ гэж бодсон. Үнэхээр их баярласан.

-Гүнж нараас хэнд нь хамгийн дуртай вэ?

    -Би Жасмин, Үнсгэлжин хоёрт хамгийн их дуртай. Жасмин өөртөө итгэлтэй бардам, Үнсгэлжин өөрийнхөө зорьсон зүйлдээ хүрэх гэж хичээдэг, сайхан сэтгэлтэй зан нь надад таалагддаг.

-Тэмцээнд оролцож байх үед хэцүү, бэрхшээлтэй зүйл тулгарсан уу?    

    -Надад айх зүйл байхгүй, хэрэв тийм зүйл байвал би даваад гарч чадна. Миний хувьд жаахан бэрхшээлтэй байсан зүйл нь англи хэлний мэдлэг байлаа. Танилцуулга дээр өөрийнхөө мэддэг үгсээ ашигласан. Англи хэл мэдэхгүй учраас хүмүүстэй харилцах хэцүү юм билээ. Гэхдээ би бүгдийг нь болгосон.

-Мисс хүн ямар байх ёстой байдаг гэж бодож байна вэ?

    -Эмэгтэй хүн, мисс хүн үргэлж инээмсэглэж, өөртөө итгэлтэй, өгөөмөр тусч яг л Үнсгэлжин шиг байх хэрэгтэй.

-Тэргүүн байр хүртчихээд ангидаа очиход найзууд нь яаж хүлээж авсан бэ ?

    -Би онгоцны буудлаас шууд сургууль дээрээ ирээд ангидаа титмээ зүүгээд орсон. Тэр үед багш баярлаад, ангийн найзууд маань тэвэрсэн, зарим нь бүр уйлсан шүү. Тэднийгээ хараад дахиад Монгол Улс, үеийн олон найзуудаа төлөөлж, тэмцээн уралдаанд ормоор санагдсан.

“ТОМ БОЛООД БҮХ ТӨРЛИЙН КИНОНД ТОГЛОДОГ ЖҮЖИГЧИН БОЛНО”

-М.Энхриймаа миссээс гадна авьяаслаг жүжигчин шүү дээ. Кинонд тоглож, жүжиглэх ямар байдаг вэ?

    -Би “Кино сутра” болон “Хадмын хайр” киноны гол дүрд тоглосон. Кинонд тоглоход  уйлах хамгийн хэцүү юм билээ. Анх кинонд тоглохыг Т.Хулан багш санал болгож, аав ээж маань ч сайн дэмжсэн. Кинонд тоглох болоход хичээлээ үнэхээр сайн хийгээд хэд хоногийн чөлөө авч байсан. Тэр үед би дөнгөж нэгдүгээр ангийн сурагч, сайн уншиж чаддаггүй байсан болохоор кино зохиолынхоо үгийг Нараа багшаараа заалгаж байсан.

-Нээрээ, цахимаар хичээл хийх ямар байсан бэ?

    -Ангийнхаа найзуудыг зөндөө санасан. Цахим хичээл удаан үргэлжилсний дараа есдүгээр сарын 1-нд ангийнхантайгаа уулзсан чинь эвгүй мэдрэмж төрөөд, бишүүрхээд байсан. Тэгээд гурав хоноод найзууддаа дасчихсан. Нээрээ бас манайх үсэглэлийн баяр хийж чадаагүй. Хэрэв үсэглэлийн баяр хийсэн бол би “Г” үсэг болмоор байсан. Миний хамгийн дуртай үгс “Г” үсгээр эхэлдэг.

-Хамтран ажилласан жүжигчид нь олны танил мундаг эрхмүүд байсан. Телевизийн цаанаас хардаг байсан хүмүүстэйгээ хамтарч ажиллах ямар байсан бэ?

    -Эвгүй мэдрэмж төрдөг юм билээ. Хамт зургаа даруулмаар байсан ч ичээд чаддаггүй. Гэхдээ би одоо өөртөө итгэлтэй болсон болохоор ичихээ больсон байх.  Дахиад хамт кинонд тоглох юм бол зургаа даруулна. Хамт кинонд тоглосон жүжигчин ах, эгч нар намайг өхөөрдөж, их дэмжсэн. Тэр дундаас Т.Хулан багш дэмжиж, олон кино, зар сурталчилгаанд тоглоход тусласан.

-М.Энхриймаа хэр сахилгагүй хүүхэд вэ?

    -Би заримдаа даруухан, заримдаа галзуу, сахилгагүй болчихдог. Би хоёр талтай юм болов уу, мэдэхгүй ээ. Гэхдээ миний даруухан байх цаг нь илүү урт болсон.

-Ирээдүйн мэргэжлээ сонгосон уу?

    -Би том болоод бүх төрлийн кинонд тоглож чаддаг, өөртөө итгэлтэй мундаг жүжигчин болно. Би жүжигчний дугуйланд явахаасаа өмнө ичимхий охин байсан. Одоо бол хүмүүс намайг сэргэлэн хөөрхөн охин байна гэж магтдаг. Ер нь нэг хүн нэг мэргэжилтэй байх ёстой гэсэн хууль байхгүй шүү дээ. Тиймээс олон төрлийн мэргэжил эзэмшинэ. Жишээ нь бүжигчин, онгоцны үйлчлэгч болно.

-Хэнээс хамгийн  үлгэр дууриалал  авдаг вэ?

    -Би ээж, ааваасаа их зүйл сурдаг. Ээж шигээ  ухаантай, хичээнгүй, хүн бүрд тусладаг, аав шигээ зоригтой, шийдэмгий болмоор байна. Тэгээд "Blackpink”  хамтлагийн том эгч Жисү шиг  эгч байхыг хүсдэг.

-Үеийн найзууддаа хэлмээр санагддаг үг бий юү?

    -Үеийнхээ найзуудад "Зорилготой тууштай хичээнгүй байгаарай. Чадахгүй гэсэн зүйл байхгүй, хүнд хэцүү зүйл тохиолдсон ч өөртөө, аав, ээждээ итгэж даван туулаарай. Гол нь өөртөө итгэх итгэлээ битгий алдаарай, аймхай байж болохгүй шүү" гэж хэлмээр байна.

-Ярилцлага өгсөн хөөрхөн миссдээ баярлалаа. Ирээдүйд мундаг жүжигчин, модель болоорой.

      -Танд ч бас их баярлалаа.



 


М.ЭНХРИЙМАА: Азийн хүүхдийн шилдэг топ модель болсондоо итгэж чадаагүй
АНХААР! Та сэтгэгдэл бичихдээ хууль зүйн болон ёс суртахууныг баримтална уу. Ёс бус сэтгэгдлийг админ устгах эрхтэй. Мэдээний сэтгэгдэлд ergelt.mn хариуцлага хүлээхгүй.

Нийт сэтгэгдэл: 4
  • Сэтгэгдэл үлдээсэн: 2022-05-26 09:04:59
    з.пүрэвжаргал: ёстой мундаг охин шүү. илүү их хичээгээрэй
  • Сэтгэгдэл үлдээсэн: 2022-05-21 20:21:28
    Ц.Очгэрэл: Huurhun duudee bayr hurgii bas Tomoos tom amjilt husiii mundag ohin shuuu
  • Сэтгэгдэл үлдээсэн: 2022-05-21 13:12:22
    Bulgaa : Huurhun dvvdee bayr hvrgie . Mundg ohin bn. Ilvv ih amjilt hvsie.
  • Сэтгэгдэл үлдээсэн: 2022-05-17 08:33:22
    Ц.Юмчинсүрэн: Баяр хүргэе
Шинэ мэдээ
Нийтлэлчид
Монгол Улс, Улаанбаатар хот, Сүхбаатар дүүрэг, VIII хороо, "Ардын эрх"-ийн байр, Гуравдугаар давхарт Эргэлт.мн редакц
7509-1188