“Дэлхийн бяцхан мисс” тэмцээнээс “Super Grand Prix” болон “Cosmic Costume” шагналыг хүртэж, эх орныхоо нэрийг өндөрт өргөөд ирсэн Т.Үжингүнжтэй ярилцлаа. Тэрбээр Хобби дунд сургуулийн хоёрдугаар ангийн сурагч бөгөөд “Бяцхан мисс 2024” тэмцээний дэд мисс юм.

-“Little Miss & Mister Universe 2025” тэмцээний ялагч болж, алтан титмийн эзэн болсон чамд баяр хүргэе. Шилдгээр шалгарч, шагнал авахад ямар мэдрэмж төрсөн бэ?

                -Үнэхээр гоё байсан. Намайг өөр улсын мисстэй хамт тайзан дээр дуудаж байгаад алтан титмийн эзнийг шалгаруулсан. Надтай гарсан охиныг “Young miss” гэж зарласан учраас дотроо “Дахиад дэд мисс боллоо доо” гэж бодсон. Гэтэл “Super Grand Prix” шагналаар “Mongolia” гээд миний нэрийг дуудсан. Нэрээ сонсоод их догдолсон. Хүмүүс тэргүүн мисс болсонд баяр хүргэж алга ташаад, зураг дарж байгааг харах гоё юм билээ.

-Өөрийгөө тэргүүн мисс болно гэдэгт хэр итгэлтэй байсан бэ?

                -Өөртөө итгэлтэй байсан. Ээж, багш нар минь намайг чадна гэж хэлсэн учраас өөртөө илүү итгэлтэй байсан. Би шинэ жилээр гацуур модондоо “Намайг тэргүүн мисс” болгож өгөөрэй гэж хүслээ шивнэсэн.

-Олон улсын тэмцээнд анх удаа орж байгаа шүү дээ. Гадаадад очоод тэмцээнд ороход сонирхолтой зүйл байсан уу?

                -Өмнө нь онгоцонд сууж байсан ч тэмцээнд оролцохоор явах илүү сонирхолтой юм билээ. Би олон гадаад найзтай болсон. Тэнд хийсэн бүх зүйл сонирхолтой санагдсан. Дубай хотод очоод элсэн тасархайн зураг авалтад оролцоход үнэхээр халуун байсан учраас жаахан  хэцүү байсан.

-Олон улсын тэмцээнд орно гэдгээ хэзээ мэдсэн бэ. Бэлтгэлээ яаж хийсэн бэ?

                -“Охидын мисс төв”-ийн Э.Энхрийлэн багштайгаа амралтын өдрүүдэд болон хичээл тарсныхаа дараа тэмцээнийхээ бэлтгэлийг хийсэн. Хэцүү бүжигтэй учраас бүжгээ их бэлдсэн.

-Эмэгтэй хүүхэд бүр гүнж шиг титэм зүүгээд, гоё даашинз өмсөөд алхахыг мөрөөддөг шүү дээ. Тайзан дээр даашинзтай, титэм зүүгээд алхах ямар байсан бэ?

                -Гүнж, том модель болчихсон юм шиг санагддаг. Тайзан дээр алхаж байхдаа өөртөө илүү итгэлтэй болдог. Хүмүүс намайг даашинз титэмтэй алхаж байхад зураг дардаг ч ерөөсөө ичиж, санаа зовдоггүй. Илүү өөртөө итгэлтэй байж, гоё гарахыг хүсдэг.

-Хэдэн настайдаа анх загварын тайзан дээр алхсан бэ. Тэр үед сандарсан уу?

                -Би зургаан настайдаа Барби шоуны тайзан дээр алхаж, үзүүлбэр үзүүлсэн. Сандраагүй ч жаахан ичсэн. Гэхдээ миний хүсэл, мөрөөдөл биелж байгаа учраас алдаа гаргахгүй байж, өөртөө итгэлтэйгээр дуусгахыг хүссэн.

-Т.Үжингүнж өмнө нь ямар тэмцээнд оролцож, амжилт гаргаж байсан бэ?

                -“Shining Stars Kids Model” тэмцээнд оролцож, тайзан дээр алхаж, үзүүлбэр үзүүлээд ялагч болж "Grand Prix" титмийн эзэн болсон. Дараа нь, “Бяцхан мисс 2024” тэмцээнд оролцоод дэд мисс болсон.

-“Cosmic Costume” шагнал хүртсэн шүү дээ. Хүмүүс чиний хувцсыг хараад юу гэж хэлсэн бэ. Чиний тэмцээний үеэр өмссөн хувцаснуудаас хамгийн гоё нь аль нь байв?

                -Монгол гэдгийг минь илэрхийлж байсан учраас дээл өмсөх хамгийн гоё байсан. Үндэснийхээ хувцастай зогсож байхад хүмүүс ирээд “Ямар гоё хувцастай юм бэ, хөөрхөн юм аа” гэж хэлсэн. Олон хүнтэй зургаа даруулсан.

-Хүүхэлдэйн киноны гүнж нараас хэнд нь хамгийн дуртай вэ?

                -Би сайхан ааштай, хүмүүст тусалдаг учраас Үнсгэлжинд хамгийн дуртай.

-Чи мисс хүн ямар байх ёстой байдаг гэж бодож байна вэ?

                -Миний хувьд мисс гэдэг нямбай, хүнд тусалдаг, сайхан сэтгэлтэй, авьяастай, эх орондоо хайртай хүнийг хэлдэг.

-Ангийн найзууд нь чамайг олон улсын миссийн тэмцээнд оролцох гэж байгааг сонсоод юу гэж хэлсэн бэ?

                -Намайг тэмцээнд явахад “Битгий яв, би чамайг санана шүү дээ” гэсэн. Би маргааш /өнөөдөр/ хичээлдээ явна. Намайг ялагч болсныг сонсоод ангийнхан минь баярлах байхаа.

-Гадаадад тэмцээнд оролцож байхдаа хэнийг хамгийн их санасан бэ?

                -Аавыгаа хамгийн их санасан.

-Тэмцээнд оролцохдоо ээжтэйгээ хамт явсан шүү дээ?

                -Ээжтэйгээ хамт байхаар ганцаардахгүй гоё байдаг. Үргэлж тусалж хайрладаг ээждээ баярлалаа.

-Чамд үлгэр дуурайлал авдаг мисс бий юү?

                - Би Э.Энхрийлэн, Э.Оюунтунгалаг багш нараасаа үлгэр дуурайлал авдаг. Мөн Blackpink хамтлагийн дуучин Lisa-д дуртай. Хамтлагийнхаа хамгийн бага гишүүн нь хэрнээ үнэхээр сайн дуулж, бүжиглэдэг.

-Ирээдүйд ямар мэргэжилтэй хүн болохыг хүсдэг бэ?

                -Би зургийн хичээлдээ хамгийн дуртай. Ирээдүйд зураач, бүжигчин, мисс, дуучин болно.

-Үеийн найзууддаа хэлмээр санагддаг үг бий юү?

                -Найзууддаа өөртөө итгэлтэй байж, дуртай зүйлээ тууштай хийгээрэй гэж хэлмээр байна.

Т.ҮЖИНГҮНЖИЙН АМЖИЛТУУД

Mongolian Barbieland-2023  Загварын шоуны Шилдэг оролцогч

Shining stars kids model -2023 тэмцээний GRAND PRIX титмийн эзэн  / 5-7 нас/

Бяцхан мисс- 2024 Улсын уралдаант тэмцээний Дэд мисс

Mongolian  Barbieland-2024 Хүүхдийн загварын шоуны Шилдэг оролцогч

“Tuvza” брэндийн нүүр царай

“Mongoloo kids” үндэсний брэндийн нүүр царай

“Аnji couture” брэндтэй хамтран ажилладаг

Олон улсын хүүхдийн урлаг загварын их наадам “Little Miss&Mister Universe 2025” Дэлхийн бяцхан миссийн тэмцээний ялагч “Super Grand Prix” титэм, “Cosmic Costume” шагналын эзэн