“Bee” театрын уран бүтээлчид өсвөр насныхандаа зориулан “Эдип хаан” жүжгийг өдөр бүр тайзнаа толилуулж байна. Тус жүжигт Иокаста хатны дүрд ажиллаж байгаа залуу жүжигчин П.Энхжаргалтай ярилцлаа. Тэрбээр өмнө нь Д.Батбаярын "Гэгээ" жүжгийн Хатан эх, В.Гоголийн "Байцаагч түшмэл" жүжгийн хатагтай Лукич болон зарлага, В.Губаревын "Шидэт алчуур" жүжгийн мууран соёот, Мөн А.П.Чеховын "Хунгийн дуу" жүжгийн дууны найруулагчаар ажиллаж байсан юм.

-Танд энэ өдрийн мэнд хүргэе. “Bee” театрын  шинэ уран бүтээл “Эдип хаан” жүжгийнхээ талаар ярихгүй юу?

                -Та бүхэнд энэ өдрийн мэнд хүргэе. “Эдип хаан” жүжиг хоёрдугаар сарын 15-аас эхлэн өдөрт хоёр удаа тоглогдож байна. Тус жүжиг нь урлагаар боловсрол эзэмших хөтөлбөрийн хүрээд 10-12 дугаар ангийн хүүхдүүдэд зориулсан бүтээл. 

-Тус жүжгийн дүрийнхээ талаар яривал. Дүр авах ямар санагдсан бэ?

                -Иокаста хатны дүрд ажиллаж байна. Багаасаа уран зохиолынхоо хичээл дээрээ уншиж, төсөөлж ирсэн дүр учраас “Надад ямар их итгэл хүлээлгэж байна аа” гэж бодсон. Нэлээн ажиллагаа шаардсан дүрийг сургуулиа төгсөөд удаагүй надад итгэж өгсөнд баярласан.

-“Bee” театрын  хэд хэдэн уран бүтээлд ажиллажээ. Багийнхныхаа тухай ярихгүй юу. Үеийн нөхөдтэйгөө хамтран уран бүтээл хийх сайхан байх?

                -Миний хоёр дахь гэр бүл. Ерөнхий найруулагч болон хамт ажиллаж байгаа жүжигчин маань СУИС-д хамт сурсан нэг ангийн хүүхдүүд. Дөрвөн жил нэг ангийн найзууд байсан бид одоо уран бүтээлийн найзууд болсон байна.  Нэг үеийн залуус учраас хэрэгтэй үед нь нэгнийхээ хажууд байж, түшиг тулгуур нь болж чаддаг.

-Сургуулиа төгсөөд удаагүй юм билээ. Залуу уран бүтээлч тайзны уран бүтээлчээр ажиллах хүсэлтэй байгаа юу. Яагаад энэ чиглэлийг сонгов?

                -Анх сургуульд сурч байхдаа тайз, дэлгэцийн аль нэг чиглэлийг нь сонгож ажилна гэж бодоогүй. Нэгдүгээр курст байхад тайзны жүжигчин байх тун хэцүү санагддаг байсан юм. Авсан дүрээ сарын турш хэдэн арван удаа тоглож, тухайн дүрээр амьдрах бэрхшээлтэй санагдсан. Тиймээс дэлгэцийн уран бүтээлд түлхүү ажилласан жүжигчин болно гэж боддог байлаа. Гуравдугаар курсээсээ жүжиг дээр ажиллаж эхлээд миний бодол өөрчлөгдсөн. Тайзны жүжигчнээс дүрийн судалгаа, ур чадвар, мэдрэмж хамгийн их шаарддаг гэдгийг ойлгосон. Тэр бүр нь илүү “амттай” сонирхолтой санагдсан.

-Жүжигчин болоход юу нөлөөлсөн бэ?

                -Жүжигчин болох ёстой юм шиг л санагдсан. Гэр бүлийнхэн минь намайг эмч эсвэл эдийн засагч болгоно гэдэг байлаа. Байнга хичээл хийдэг хүүхэд байсан. Сургуулиа төгсдөг жилдээ хүсээгүй мэргэжлээ эзэмшихийг хүсээгүй. Өөрөө хүсээгүй мэргэжлээрээ амжилттай ажиллана гэдэгт итгээгүй. Тэгээд гэр бүлийнхнээсээ нууцаар СУИС-ийн шалгалтад бэлдэж, тун амжилттай тэнцсэн. ЭЕШ-аараа анагаахын сургуульд тэнцсэн байсан учраас ангийн багш минь жүжигчин болно гэхэд их эсэргүүцсэн дээ. Гэр бүлийнхэн минь намайг хориогүй ч сэтгэл дундуур, нэг л итгэж өгөхгүй байсан. Хүсэл мөрөөдлөө сонсож, өөртөө үнэнчээр зорилгынхоо төлөө тэмцээрэй гэж мэргэжил сонголт хийх гэж байгаа дүү нартаа хэлмээр байна.

-"Хунгийн дуу" жүжгийн дууны найруулагчаар ажилласан юм билээ. Дууны найруулагчийн ажил ямар санагдсан бэ.  Жүжгийг хүнд мэдрүүлэх чухал зүйлсийн нэг шүү дээ?

                -Дуу чимэглэл уран бүтээлд чухал үүрэг гүйцэтгэдэг. Дууны найруулагчаар ажиллахдаа тухайн жүжигчний мэдрэмж, тоглолт, жүжгийн утга найруулгад тохирсон дуу хөгжмийг сонгох гэж хичээсэн.  Ер нь уран бүтээл дээр ажиллах амархан байдаггүй. Харин нь ард нь гарсны дараа гүнзгий амьсгаа авах шиг л болдог.

-Залуу уран бүтээлчийн хувиар ямар жүжигчин, уран бүтээлч байхын хүсдэг вэ?

                -Ёс зүйтэй, зөв хандлагатай хүн байхыг л хүсдэг.

-“Bee” театрын үзэгчид “Эдип хаан” жүжгээс юуг олж харж, мэдэрч үзэх вэ?

                -“Эдип хаан” жүжгийг амьдрал дээр чухал сонголт хийх гэж байгаа өсвөр насныхандаа зориулсан. Асуудал, үнэнтэй нүүр тулж, даван туулаарай. Асуудлаас зугтах тусам улам хүндэрдэг гэдгийг харуулж, ойлгуулахыг хичээж байгаа.

-Театртаа бүжгийн багшаар ажилладаг юм билээ. Хэзээнээс энэ чиглэлээр ажиллах болсон бэ?

                -Манай театр хүүхдүүд рүү чиглэн ажилладаг. Амралтын өдрөөр драмын дугуйлан үйл ажиллагаа явуулдаг. Би бүжгийн дугуйландаа хөдөлгөөний багшаар ажиллаж байгаа. Тусгай бүжгийн дугуйланд явж суралцаж байгаагүй ээ. Сонирхлоороо сурсан зүйлээ хүүхдүүдэд зааж байгаа. 

-Ажиллахын хүсдэг дүр бий юү?

                -Ажиллахын хүсдэг дүр олон бий. Би нум сум харвадаг учраас  энэ чадвараа ашиглаж, түүхэн кинонд дайчин гүнж, баатрын дүрд ажиллахын хүсдэг.

-Таны болон багийнхных нь дараагийн зорилго юу байгаа бол?

                -Манай дараагийн жүжгийн бэлтгэл гуравдугаар сард эхэлнэ. Үзэгчдэдээ дөрөвдүгээр сард хүргэнэ гэсэн төлөвлөгөөтэй байгаа. Үүний дараа нэг болон хоёр хүний жүжгүүдийн бэлтгэл эхэлнэ. Залуу жүжигчний хувьд бэсрэг жүжгийн төрөлд өөрийгөө сорихыг хүсэж байгаа.

-Ярилцлага өгсөн танд баярлалаа.

                -Баярлалаа.