“Яаралтай тусламжийн тасгийнхан” киноны уяхан, хичээнгүй сувилагч бүсгүйн дүрээр үзэгчдийн танил болсон залуу жүжигчин, загвар өмсөгч О.Уярал. Тэрбээр СУИС-ийг жүжигчнээр төгссөн бөгөөд “Цор ганц”, “Бүлэг” зэрэг олон ангит киноны гол дүрд чадварлаг ажилласан билээ.

-Танд энэ өдрийн мэнд хүргэе. Таныг  “Монголын сайхан бүсгүй” тэмцээний шилдэг оролцогчоор нь хүмүүс танина шүү дээ. Загварын салбарт анх хэрхэн орсон бэ?

                -Монголын сайхан бүсгүй тэмцээнд 2018 онд оролцсон. Би 15 настайгаасаа эхэлж Монголын оюутан мисс, Азийн модель фестиваль зэрэг тэмцээнд орж, загвар өмсөж эхэлсэн.

-Яагаад загвар өмсөгч, моделиор ажиллах болов. Юу нь таны сонирхлыг татсан бэ?

                -Гэр бүл маань их дэмждэг. Багаасаа үеийнхнээсээ хамаагүй өндөр байсан. Өсвөр насандаа эмэгтэй хүн загварын мэдэг, гоо зүйн талаар суралцсан байх ёстой гэж бодсон учраас загварын агентлагуудад харьяалагдаж эхэлсэн.

-“Яаралтай тусламжийн тасгийнхан” киноны талаар ярихгүй юу. Эмнэлгийн байгууллагын ажилтны дүр дээр ажиллах ямар байсан бэ?

                -“Яаралтай тусламжийн тасгийнхан” кинонд тоглохоор болсноо мэдээд их үүрэг хариуцлага, хичээл зүтгэл шаардлагатай гэдгийг ойлгосон. Эрүүл мэндийн салбарын ажилчдын аж амьдрал, ажил мэргэжлийн онцлогийг харуулж байгаа учраас олон сар эмнэлэг дээр дадлага хийсэн. Энэ хугацаандаа эрүүл мэндийн салбарын эмч ажилчдыг хүндэлж биширсэн. Зааж зөвлөж, энэхүү уран бүтээлд мэдлэг чадвараа хуваалцсан бүх хүмүүстээ баярлаж байна.

-“Цор ганц” киноны гол дүрд тоглосон шүү дээ. Киноныхоо талаар ярихгүй юу?

                - “Цор ганц” олон ангит кино бол миний амьдралын бас нэгэн том туршлага, сорилт байсан. Олон ангит киноны гол дүр дээр ажиллах нь кино баг, найруулагч, хамтран тоглогч болоод үзэгчдийн өмнө илүү их итгэл хүлээж байгаа болохоор бүх чадвараа дайчилж ажиллаж байсан. Зан төлөвийн хувьд хувь хүнтэй маань төсөөтэй зүйлс их байсан. Чадварлаг хамт олон, найруулагч хамтран тоглогчдын дэмжлэгээр энэхүү том уран бүтээлийн ард гарч чадсандаа баяртай байдаг.

-“Бүлэг” олон ангит кинонд тоглох ямар байсан бэ. Адал явдалт хэсгүүд олонтой кино шүү дээ?

                - Орчин цагт  залуучуудад тулгамдаж байгаа асуудал, нөхөрлөл, амьдралын сайн муу гээд олон сэдвийг “Бүлэг” олон ангит кино хөндсөн. Залуу уран бүтээлчид түлхүү ажиллаж байсан болохоор өөр өөр өнгө аяс, шинэлэг зүйлс ихтэй кино болсон.

-Ажилласан кино, загвар өмсөгчийн ажлуудаас таныг хамгийн их сорьсон үе нь хэзээ байсан бэ?

                - Бүх л уран бүтээл, дүрүүд маань миний хувьд шинэ туршлага сорилтууд байсан. Хүн бүхэн дахин давтагдашгүй байдаг шүү дээ. Тийм болохоор ажилласан дүр болгоныхоо онцлогийг гаргахыг хичээдэг.

-Жүжигчнээр сурч байсан уу. Энэ чиглэлээр ажиллах хүсэл сонирхол хэр байсан бэ?

                - Би СУИС-ийн жүжигчний ангийг Баатарын Отгонбат багшийн ангид суралцаж төгссөн. Анх энэ мэргэжлийг сонгож байхдаа өөртөө тийм ч итгэлтэй байгаагүй. Харин дөрвөн жилийн хугацаанд энэ мэргэжлийн сайхныг мэдэрч, эргэж буцалтгүй энэ мэргэжилдээ дурласан даа.

-Багадаа ямар хүүхэд байв. Загвар өмсөгч, жүжигчин болно гэж бодож байсан уу?

                - Бага байхдаа ерөнхий эрдмийн хичээлүүддээ илүү анхаардаг, спортын секц дугуйланд явдаг хүүхэд байлаа. Ерөнхийдөө спортоор хүмүүжсэн гэж хэлж болно. Бага байхаасаа үеийнхээсээ өндөр бас хэлний авьяастай байсан болохоор “жүжигчин болох уу, нэвтрүүлэгч болох уу” гэх сонголттой нүүр тулж жүжигчний ангид орохоор шийдэж байлаа. Энэ мэргэжлийг сонгож, загварын тэмцээн уралдаанд оролцохыг гэр бүлийнхэн минь их дэмжсэн дээ.

-Та ямар үед өөртөө хамгийн итгэлтэй байдаг вэ?

                - Би нэлээн зарчимч төрлийн хүн болохоор бусдыг хүндэлж хариуцлагатай байхыг эрхэмлэдэг. Ажилдаа хариуцлагатай, сэтгэл зүрхээ зориулах нь намайг өөртөө илүү итгэлтэй болгодог.

-Цаашдын зорилго, бүтээхийг хүссэн дүр бий юү?

                -Бага байхдаа спортоор хичээллэдэг байсан болохоор тамирчны тухай кинонд тоглохыг хүсдэг. Цаашдаа өөрийгөө хөгжүүлэх тал дээр илүү анхаарч байна.