"Монголын Мистер & Мисс 2023" УАШ тэмцээнд төрсөн эгч дүү гурав амжилттай оролцжээ. Тус тэмцээний Фит модель төрөлд шилдэг арван оролцогчийн нэгээр шалгарсан Ж.Сувд-Эрдэнэтэй ярилцлаа.

- "Монголын Мистер & Мисс 2023" УАШ тэмцээнд амжилттай оролцсон танд баяр хүргэе. Тус тэмцээний талаар ярихгүй юү?

                -Сайн байна уу, та бүхэнд  энэ өдрийн мэнд хүргэе. Анхны оролцсон фитнес тэмцээндээ оролцлоо. Тайзан дээр гараад догдолж, үгээр хэлэмгүй сайхан мэдрэмжийг авсан. Урт хугацааны бэлтгэлийнхээ үр дүнг тэмцээний тайзан дээр хүртэж байгаа мэт санагдсан.

- Тэмцээний бэлтгэл хэр хугацаанд үргэлжилсэн бэ, бэлтгэлийнхээ талаар яриач?

                -Идэвхтэйгээр хоёр сарын хугацаанд тэмцээндээ бэлдсэн Нүүрс усаа хасаж, өдөрт хоёр удаа дасгал хийсэн. Бэлтгэл бага зэрэг хүнд байлаа. Нүүрс усаа хасаж эхлэх үедээ, биеэ дасгах жаахан хэцүү байсан. Цоо шинэ ертөнцтэй танилцаж байгаа мэт л байлаа. Сүүлийн арван өдөр хамгийн хүнд өдрүүд нь байлаа. Учир нь, уураг уухаа больсон. Таван хоногийн өмнөөс ус хасаж эхэлсэн. Тэмцээний өдөр 100-200 грамм ус уусан.

-Фитнесээр хичээллэх болсон шалтгаан юу вэ? Хэр удаан хичээллэж байгаа вэ?

                -Гадаадаас ирэхдээ нэлээн жин нэмсэн байсан. Залуу нас гэдэг хүнд нэг л удаа олдоно, тэр сайхан насандаа  тарган байхыг хүсээгүй. Мөн эгчээсээ их үлгэр дуурайлал, авч фитнесээр хичээллэх шийдвэр гаргасан. Хичээллэсэн найман сарын хугацаанд 18 килограмм хассан байна лээ.

-Энэ удаагийн тэмцээнд эгч дүүтэйгээ орсон талаар дурдсан байсан. Энэ талаар ярихгүй юү?

                -Гурвуулаа хамт байсан болохоор илүү түшигтэй байсан юм болов уу. Ганцаараа тэмцээнд бэлдэхээс илүү гурвуулаа хамт байгаа нь, хамт нэг тэмцээнд оролцохоор бэлдэж байгаа нь давуу тал болсон. Бүх цаг үед хамтдаа байсан нь хамгийн сайхан дурсамж боллоо.

-“Youtube”  суваг хөтөлдөг юм билээ. Youtuber болсон шалтгаан байгаа юу хэр урт хугацаанд хөтөлж байна вэ?

                -Би 2021 оноос эхлэн влог хөтөлж, youtube хөтөлж эхэлсэн. Байнга тогтмол оруулж чаддаггүй. Өөртөө дурсамж болгож үлдээх зорилгоор дүрс бичлэг оруулж эхэлсэн.

-Дуу ковер хийдэг юм билээ. Уран бүтээлч болох талаар бодож байсан уу?

                -Дуу дуулах бол миний сонирхлоороо хийдэг зүйл. Хэрэв дуучин болохыг хүсвэл чөлөөт уран бүтээлчээр ажиллах байх. Надад нэг нууцхан хүсэл, мөрөөдөл бий. Би залуу насандаа кинонд тоглож, өөрийгөө сорьж, дүрээ киноны хальсанд үлдээхийг хүсдэг.

-Эгч дүү гурав тогтмол өөрсдийгөө сорьж, хамтдаа дурсамж бүтээдэг үү. Гэр бүлийнхээ талаар ярихгүй юу?

                -Бид ер нь их дотно байдаг. Гэхдээ фитнесээр хичээллэж хэлээд нэгнийгээ илүү өөр өнцгөөс нь харж, илүү дотно болсон юм шиг санагдсан. Гурав нь "Монголын Мистер & Мисс 2023" тэмцээнд оролцсон ч эгч дүү дөрвүүлээ фитнесээр хичээллэдэг.

-Фитнесээр хичээллэж байх үедээ шантармаар үе байсан уу. Хэрхэн даван туулсан бэ?

                -Би 1,3,5 дахь өдөр өглөө, 2,4 өдөр оройн цагаар фитнестээ явдаг. Хагас сайн өдөр фитнес маань хаалттай байдаг учраас өөрийгөө амраадаг. Ер нь фитнесээс хичээллээд удаагүй, хичээллэж эхлэх гэж байгаа хүмүүс нэг өдрийг өөртөө сул өгөх хэрэгтэй юм билээ. Бүх зүйлээ хорьчихоор хэцүү санагдаж шантрах гээд байдаг учраас нэг өдөр хүссэн юмаа идэх хэрэгтэй. Зорилго тавьж, тууштай байх хэрэгтэй. Зорилгодоо хүрэхээр шийдчих юм бол шантардаггүй юм билээ.

-Таны дараагийн зорилго, төлөвлөгөө юу вэ?

                -Илүү тууштай фитнесээр хичээллэж,  зарим нэг дутуу булчин дээрээ ажиллах зорилготой байгаа. Миний хамгийн хүсдэг  зүйл бол аялах.  Европын орноор 25 нас хүрэхээсээ өмнө аялахыг хүсэж байгаа.

-Ярилцлага өгсөн танд баярлалаа.

                -Баярлалаа.