Анхны цомгоо гаргасан залуу уран бүтээлч Shuwu буюу С.Ирээдүйтэй ярилцлаа.

-Танд энэ өдрийн мэнд хүргэе. Уран бүтээлч болсон үеэс нь яриагаа эхлэх үү?

                -Би багаасаа хэн ч юу ч хийж, бүтээхгүйгээр амьдрах нь хэтэрхий харамсалтай, уйтгартай гэж боддог байсан. Зорилгогүй амьдрах харамсалтай шүү дээ. Гэхдээ яг юу хийж бүтээх ёстойгоо сайн мэддэггүй байлаа. Төрөл бүрийн зүйл сонирхож, туршсан. Спортоор хичээллэж, жүжигчин болох гэж хүртэл үзсэн. Гэхдээ энэ хугацаанд дуучин болно гэж огт бодоогүй. Сонирхлоороо үг бичдэг байсан минь нэг л өдөр амьдралын минь салшгүй хэсэг, намайг тодорхойлох зүйл болсон байсан.

-Хамгийн анхны уран бүтээлийнхээ талаар ярихгүй юү. Эхлэл ямар байсан бэ?

                -Миний хамгийн анхны албан ёсны уран бүтээл “go away” “pain is money” гэх хоёр дуу байсан. Хэлэхийг хүссэн үгс, мэдэрсэн мэдрэмжээ дуу болгож цахим сүлжээнд тавьсны дараа надтай адил мэдрэмжтэй хүмүүст хүрч байхыг нь хараад баярласан.

-Уран бүтээлчийн нь нэр Shuwu  шүү дээ . Яагаад ингэж нэрлэх болсон бэ?

                -Shuwu бол миний багийн хоч л доо. Гэр бүлийнхэн болон ойр тойрныхон минь намайг шувуухай гэж дууддаг байсан юм. Бага ангид байхад хочноосоо болоод шоолуулдаг байсан болохоор жаахан дургүй болчихсон байсан. Гэхдээ хүн хэн гэдгээсээ хэзээ ч зугтааж чаддаггүй мөн мартаж болдоггүй юм билээ. Уран бүтээлчийн нэр минь надад их үнэ цэнтэй. Тэнгэрт дэвшсэн ахыг минь Shubu гэдэг байсан юм. Би энэ нэрийг үргэлжлүүлэн авч явж, өндөрт өргөнө өөртөө амласан. Шантарсан үедээ ах минь намайг тэнгэр дээрээс харж, үргэлж дэмждэг гэж бодож, цааш үргэлжлүүлэх хүчээ авдаг.

-“Better days” дуугаа ахдаа зориулсан гэсэн.Энэ дууныхаа талаар ярихгүй юү?           

                -Энэ дуугаараа илэрхийлэх гэсэн санаа нь бид бүгд л хэцүү зүйлсийг даван туулах хэрэг гардаг. Бид илүү сайхан өдрүүд ирнэ гэдэгт итгэж цаашаа амьдрах хэрэгтэй болдог талаар энэ дуугаараа илэрхийлэхийг хүссэн. Энэ дууг хийж байхдаа дотроо байгаа бүх мэдрэмж, бодлоо гаргасан. Өнгөрсөн амьдралынхаа жаргал, зовлонтой бяцхан хэсэг мөн ахынхаа гэгээн дурсгалд зориулж түүнийг дурсан санан хийсэн миний хайртай дуунуудын минь нэг билээ.

-Дууныхаа үгийг өөрөө зохиодог шүү дээ. Бичих сэдэв, санаагаа юунаас авдаг вэ?

                -Хэлэхийг хүссэн, мэдэрсэн мэдрэмжээ дуундаа шингээдэг. Энгийн сэтгэлд хүрсэн мэдрэмж. “Pain is money” дууныхаа дүр бичлэгийг хийж байх үеэ их санадаг. Найзууд маань бүгд тусалж тэдний сэтгэлээр уран бүтээл. Тухайн үедээ муудалцаж, хэрэлдэж эцэст нь инээлдэж дуусгасан уран бүтээл байгаа юм. Бүх найзууддаа хайртай шүү, баярлалаа гэж хэлмээр байна.

-Уран бүтээлээрээ дамжуулж сонсогчдодоо ямар мэдрэмж өгөхийг хүсдэг вэ?

                -Би хүссэн зүйлээ л дуулдаг. Гэхдээ үргэлж чанартай зүйл хийх гэж хичээдэг. Үг, аялгуу дээрээ анхаардаг,  харин сонсогчид маань ямар мэдрэмж авах нь тэдний шийдэх хэрэг байх. Миний дууг сонсоод амьдралыг харах өнцөг нь өөр болсон гэдэг хүмүүс бий. Өвөр монголчууд их сайхан хүлээн авдаг юм байна лээ. Бүх сонсогчдодоо  баярлалаа, цаашдаа илүү хичээнэ.

-Саяхан анхныхаа цомгийг гаргасан шүү дээ. Сэтгэгдлээсээ хуваалцахгүй юу?

                -Ер нь бол тэгээс урт зам туулж анхны цомгоо гаргалаа. Өөрөөрөө бахархаж байна. Гэхдээ энэ бол дөнгөж эхлэл.  Энэ цомгийн дуунууд дунд хоёр жилийн өмнө хийсэн уран бүтээлүүд бий.  Өөр цаг хугацаанд хийгдсэн, өөр мэдрэмж, илэрхийлэлтэй цомог. Утга санааг нь тайлбарлахаас илүү сонсоод ойлгож, мэдрээсэй гэж хүсэж байна.

-Тайзан дээрээс сонсогчдыгоо харж, уран бүтээлээ хүргэх ямар байдаг вэ. Тайзан дээр дуулах үеийн мэдрэмжээсээ хуваалцахгүй юү?

                - Тайзан дээр гарч дуулах мөрөөдөл байлаа шүү дээ. Хүмүүсийн өмнө дуугаа дуулна гэдэг хамгийн сайхан мэдрэмж. Ер нь дөнгөж уран бүтээлээ хийж эхлэх үед ихэнх нь танихгүй. Тайзан дээр уран бүтээлээ хүргэж байх үед цөөн хэдэн хүн дагаж дуулж, бүжиглэж байлаа. Сэтгэл дүүргэсэн сайхан цаг үе. Мянга мянган хүнээс намайг дэмждэг ганцхан хүн байхад л би уран бүтээлээ хийсээр байх болно. 

-Таны дараагийн зорилго, төлөвлөгөө юу вэ?

                -Дараа дараагийнхаа уран бүтээлүүдээ улам сайжруулна. Мөн энэ жил дахин нэг цомог гаргаж, уран бүтээлчидтэй хамтран ажиллахаар төлөвлөж байн. Өөрийгөө хувь хүн талаас нь хөгжүүлж, мэдлэг боловсролоо дээшлүүлэх төлөвлөгөөтэй байгаа. Ярьж биш хийж үзүүлнэ.