• Өнөөдөр 2022-11-27

БШУЯ Д.ДАВААСҮРЭН: Зарим сурах бичгийн хэвлэлийн түүхий эд хил дээр гацсан

2022-09-29,   107

      Ерөнхий боловсролын сургуулиудад сурах бичиг хангалтгүй байгаа тухай мэдээл цахим сүлжээгээр түгээд байна. Тэгвэл сурах бичгийн дахин хэвлэлт, хангамжийн талаар БШУЯ-ны Боловсролын ерөнхий газрын хөтөлбөрийн хэрэгжилт, үнэлгээний газрын дарга Д.Даваасүрэнгээс тодрууллаа.

       Тэрбээр “Хавар авсан судалгаагаар дунд, ахлах ангийн сурах бичиг 50 хувийн хангалттай байсан. Үүнийг 100 хувьд хүргэхийн тулд ажиллаж байна. Бага ангийн сурах бичгийн 90 хувь нь хэвлэлтээс гарч ерөнхий боловсролын сургуулиудад хүргэсэн. 3-4 дүгээр ангийн математик, монгол хэлний сурах бичиг дутуу байгаа. Учир нь сурах бичиг хэвлэх долоон компаниас уг хоёр сурах бичгийг хэвлэх компанийн түүхий эд хил дээр гацсан байдалтай байгаа. Бид тухайн компанид шаардлага хүргүүлэн ажиллаж байна. 6-12 дугаар ангийн сурах бичгийн 70 хувь нь сургуулиудад тараагдсан. Нийт 102 нэр төрлийн сурах бичгээс 30 орчим төрлийн сурах бичиг нь мөн хэвлэлийн түүхийн эдийн тээвэрлэлт удааширсан асуудалтай байгаа. Зургаан чингэлэг ачаа хил дээр байгаа учир  Зам,  тээврийн хөгжлийн яам руу тус чингэлгийг яаралтайгаар оруулж ирэх  албан хүсэлт тавьсан. БШУЯ-наас сургуулиудад байгаа сурах бичгүүдээ сурагчдад тарааж байх чиглэл өгсөн. Хилээр хэвлэлийн түүхий эд орж ирснээс хойш долоо хоногийн дараа сурах бичгийг бүрэн хэвлэж дуусна гэсэн төлөвлөгөөтэй ажиллаж байна.

      Тавдугаар сард сурах бичгийн судалгаа авч зургадугаар  сард хэвлүүлэх гэрээ хийх ёстой байдаг. Гэхдээ энэ жилийн хувьд 7-8 сурах бичиг хэвлэх гэрээ хийсэн. Гэрээ хийх хугацаа хойшилсон шалтгаан нь үнийн өсөлттэй холбоотой. 2020 онд хийсэн гэрээний мөнгөн дүнгээр 2022 онд сурах бичиг хэвлэх боломжгүй нөхцөл байдал  гарсан. Ингээд наймдугаар сарын 5-нд эхний гэрээг байгуулж, хэвлэлийн ажил эхэлсэн” гэв.

 


БШУЯ Д.ДАВААСҮРЭН: Зарим сурах бичгийн хэвлэлийн түүхий эд хил дээр гацсан
АНХААР! Та сэтгэгдэл бичихдээ хууль зүйн болон ёс суртахууныг баримтална уу. Ёс бус сэтгэгдлийг админ устгах эрхтэй. Мэдээний сэтгэгдэлд ergelt.mn хариуцлага хүлээхгүй.

Нийт сэтгэгдэл: 0
Шинэ мэдээ
Нийтлэлчид
Монгол Улс, Улаанбаатар хот, Сүхбаатар дүүрэг, VIII хороо, "Ардын эрх"-ийн байр, Гуравдугаар давхарт Эргэлт.мн редакц
7509-1188