Жирэмсэн болон бага насны хүүхэдтэй ээж болгоны сонгон хэрэглэж байгаа Ээжүүд апплейкшнын үүсгэн байгуулагч, санаачлагч Г.Насантогтохтой ярилцлаа. Тус апплейкшнаар дамжуулан жирэмсэн байх хугацаанд эх болон ургийн биед долоо хоног бүр ямар өөрчлөлт гарч байгааг хянахаас гадна, шинжлэх ухааны үндэслэлтэй зөвлөгөө авах, тухайн сард өгөх шинжилгээ, түүний ач холбогдлын талаар мэдээлэл авдаг юм.

-Танд энэ өдрийн мэнд хүргэе. Манай уншигчдад өөрийгөө танилцуулаад яриагаа эхлэх үү?

             -Сайн байна уу, намайг Г.Насантогтох гэдэг. Би Эрүүл мэндийн шинжлэх ухааны их сургуулийн Нийгмийн эрүүл мэндийн сургуулийг Нийгмийн эрүүл мэнд судлалч мэргэжлээр төгссөн. Нөхөр, дөрвөн хүүхдийн хамт амьдардаг. Их сургууль төгссөнөөсөө хойш эрдэм шинжилгээ, судалгааны салбарт нэг жил, эрүүл мэндийн салбарт 11 жил мэргэжлээрээ ажилласан туршлагатай.

-Ээжүүд апплейкшныг анх яагаад хийхээр болсон юм бэ. Хийх санаа, сэдэл өгсөн зүйл нь юу байсан юм бэ?

             -Ээжүүд апплейкшн нь хоёр үүсгэн байгуулагчтай. Бид хоёулаа их сургуулийн нэг ангид суралцаж, хамт төгссөн найзууд. Бидний эзэмшсэн мэргэжлийн нэг чиглэл нь аливаа өвчин болон эрсдэлт хүчин зүйлээс урьдчилсан сэргийлэх талаар нийт хүн ам буюу олон нийтэд зориулсан нөлөөллийн арга хэмжээг зохион байгуулах юм л даа. Энэхүү нөлөөллийн үйл ажиллагааны нэг салаа мөчир бол хүмүүст эрүүл мэндийн боловсрол олгох явдал. Анх 2017 онд хамтрагч маань “Тодорхой зорилтот бүлэгт чиглэсэн эрүүл мэндийн аппликейшн хамт хийх үү?” гэж санал тавьж байсан. Нэг бүлэг сонгоод авчихвал хийх зүйлээ илүү тодорхой болгоод, чанартай бүтээгдэхүүн гаргах хэрэгтэй гэж бид зөвшилцөөд жирэмсэн болон нялх хүүхэдтэй эмэгтэйчүүдийг сонгосон. Тэр үед Монгол Улсад жил бүр 70000 гаруй эмэгтэй амарждаг гэсэн тоо баримт байсан юм. Аппликейшн хийх болсон шалтгаан нь манай улсад хүн амд эрүүл мэндийн боловсрол олгох тохирсон тогтолцоо хөгжиж бий болоогүй, хүмүүсийн эрүүл мэндийн боловсрол хангалтгүй, хандлага буруу байх тохиолдол ажиглагдах болсон. Хүмүүс ихэвчлэн мэдээ мэдээллийг гар утас ашиглан сошиал сувгаар авах болсон. Шүүлтүүргүй маш олон мэдээллээс олж авсан мэдээлэл нь үнэн зөв, баталгаатай гэж итгэхэд хэцүү. Жишээ нь, ихэнх эмэгтэйчүүд жирэмсэн үедээ хэдэн удаа, жирэмсний ямар хугацаанд хяналтын үзлэгт орохыг тэр бүр мэддэггүй. Эмч дараагийн үзлэгийн товыг хэлж өгөхөд мартах, улмаар хяналтын үзлэгт хугацаандаа очихгүй байх тохиолдол ажиглагддаг байсан юм. Дээр нь нэмж хэлэхэд сонгосон зорилтот бүлэгт маань зориулсан эрүүл мэндийн боловсрол олгох гар утасны цогц аппликейшн тэр үед байгаагүй тул бид “Ээжүүд” аппликейшны анхны хувилбарыг 2018 онд гаргасан.

-Төсөөлсөн апплейкшнаа бодит болгох явцад юу хамгийн хэцүү байсан бэ?

             -Өмнө нь хийж байсан зүйлээсээ шал өөр цоо шинэ ажил руу орж байгаа болохоор түгшүүрийг мэдэрч байсан. Хамгийн хэцүү байсан үе гэвэл “Ээжүүд апплейкшныг хийх нь зөв үү” гэдэг шийдвэрийг гаргах байсан.  “Би чадна” гэж өөртөө бүрэн итгэж чадахгүй, дотроо удаан бодож тунгаасан, чадах болов уу, үгүй болов уу гэж эргэлзсэн. Хийгээд гаргахад хэр олон хүн хэрэглэх бол гэдэг бодол чих төрсөн. Одоо эргээд харахад “За хийе” гэдэг шийдвэрийг гаргасандаа өөртөө их баярладаг даа. Энэ шийдвэрийг гаргахад нөхөр маань хамгийн их нөлөөлсөн. Яагаад гэвэл намайг юу ч хийсэн миний ард бат зогсож, дэмждэг, зоригжуулдаг болохоор надад хийж чадна гэдэг итгэл төрсөн.

-Ээжүүд апплейкшныг одоо хэр олон хүн хэрэглэдэг вэ. Хэрэглэгч нарт апплейкшнаараа дамжуулж юу хүргэхийг зорьдог?

              -Нийт жирэмсэн эмэгтэйчүүдийн 80 орчим хувь нь манай аппликейшнийг татаж хэрэглэдэг. Одоогийн байдлаар 65,000 гаруй хэрэглэгчтэй байна. Бидний эн тэргүүний зорилго бол чанартай бүтээгдэхүүн гаргаж, хамгийн боломжит хямд өртгөөр олон хүнд хэрэглүүлэх байсан. Энэ зорилгоо одоо хүртэл биелүүлээд явж байна. Ээжүүд аппликейшн нь жирэмсэн болон нярай, нялх хүүхэдтэй эмэгтэйчүүдэд нотолгоонд суурилсан, баталгаатай эх сурвалжаас бэлтгэсэн эрүүл мэндийн зөвлөгөөг өгөх, өөрийнхөө болон хүүхдийнхээ эрүүл мэндийг хянахад нь туслах, жирэмсний бүхий л хугацаанд дотнын зөвлөгч байхыг зорьдог. Манай апплейкшныг хэрэглэгчид маань төрөхийн өмнө болон төрсний дараа аль ч үедээ ашиглах боломжтой. Хэрэглэх цар хүрээ нь илүү буюу нэг сумаар хоёр туулай буудаж байгаа хэрэг юм. Апплейкшнын үүсгэн байгуулагч, хөгжүүлэгч нь анагаахын сургууль төгссөн, эрүүл мэндийн салбарт ажиллаж байсан туршлагатай хүмүүс тул хэрэглэгчдэдээ тулгардаг нийтлэг эрүүл мэндийн асуудлыг хөндөж хариултыг өгөхөд илүү ойр дөхөм байхаар бүтээсэн хэрэг.

-Найман жилийн хугацаанд шантармаар санагдсан үе гарч байв уу. Хамгийн бэрхшээлтэй санагдсан зүйл нь юу вэ?

               -Шантармаар санагдсан үе нэг их гарч байгаагүй ээ. Бэрхшээлтэй санагдаж байсан зүйл гэвэл хэрэглэгчдийн өнцгөөс биднээс юу хүсэж болох вэ гэдгийг бодох байсан. Гэхдээ гаргалгааг нь олсон. Апплейкшнынхаа хэрэглэх цар хүрээг нэмэгдүүлж, улам цогц болгосноор олон ээжид хэрэг болох юм шиг санагдсан. Зарим хүмүүс зөвлөмжөө уншиж хэрэглэж байхад, зарим нь жингийн хяналт хэсгийг сонирхож, нөгөө хэсэг нь жирэмсний хяналт, дархлаажуулалтын хэсгийг хэрэглэж, бусад хүмүүс нь ургийн дэлгэрэнгүй мэдээлэл авмаар байж болох учраас хэрэглэх зүйлийг олон сонголттойгоор, чанартай хийх дээр төвлөрсөн.

-Анх эхэлж байсан үетэй нь апплейкшнынх нь хэр олон зүйл өөрчлөгдсөн бэ. Цаашид нэмж юу хийх вэ?

         -Бид аппликейшнаа тасралтгүй хөгжүүлдэг, тухайн цаг үед тохирсон өөрчлөлтийг хэрэглэгчдэд зориулж тогтмол хийдэг. Анх бол хамгийн гол гэж үзсэн дараах асуудлуудад анхаарлаа хандуулж эхний хувилбараа гаргасан.

•     Жирэмсний хяналт цэсээс “Би хэзээ хяналтын үзлэгтээ очих вэ, ямар шинжилгээ өгөх ёстой вэ?” асуултын хариултыг авна.

•     Зөвлөмж цэсэд “Надад ямар эрүүл мэндийн асуудал тулгарч болох вэ” асуултад хариулах олон мэдээллийг оруулсан.

•     Ургийн долоо хоногийн дэлгэрэнгүй мэдээллээс “Ургийн өсөлт, хөгжил хэрхэн явагдаж байгаа вэ?” гэдгийн уншина.

•     Жирэмсний хугацаа болон төрөх хугацааг тооцоолж өгч байгаа тул “Миний төрөх сүүлийн хугацаа хэзээ вэ?” гэдгийг ойролцоогоор мэдэх боломжтой.Дархлаажуулалт цэсээс “Миний хүүхэд хэзээ, ямар вакцин хийлгэх вэ?” асуултын хариуг авна.

•      Хүүхдийн хөгжлийн үнэлгээ хэсгээс “Хүүхдийн маань хөгжил хэвийн явагдаж байгаа юу?” гэдгийг харж болно.

            Ээжүүд апплейкшнын гол цөм нь жирэмсний хяналт, зөвлөмж өгөх хэсгүүд байсан бөгөөд үүн дээр нэмээд ач холбогдлыг улам нэмэгдүүлсэн, ашиглах сонирхлыг төрүүлсэн нэмэлт цэсүүдтэй байсан. Хэрэгцээт зүйлийн жагсаалт бүхий ээж, хүүхдийн цүнх, биеийн жингийн хяналт, ургийн хөдөлгөөн, төрөх үеийн өвдөлт бүртгэх зэрэг өөрийн оролцоот цэсүүд багтана. Хөгжүүлэлтийн дунд үеэс хэрэглэгчдэдээ зориулж видео зөвлөмжүүд оруулж эхэлсэн. Зураг оруулж, тэмдэглэл бичиж оруулах дурсамж хадгалах хэсгийг нэмсэн. Дурсамжаа хадгалдаг ээж болоход нь туслах зорилготой. Хүүхдийн өсөлт, хөгжлийн графикийг оруулж өгсөн. Хүүхдийнхээ өндөр, жинг зөвлөмж хэмжээтэй харьцуулж, хянах боломжийг гаргаж өгсөн. Зөвлөмж доор сэтгэгдэл бичих хэсгийг бий болгосон. Энэ нь ээжүүд хоорондоо сэтгэгдлээр харьцаж болохоор болгосон юм. Энэ мэтчилэн олон  шинэчлэлт хөгжүүлэлт хийсэн. Одоо ч хийсээр, илүү сайжруулахаар төлөвлөсөөр байгаа.

-Таныг анх ээж болж байх үед ийм апплейкшн байсан ч болоосой гэж бодогдсон үе бий юу?

              -Том охин маань 2005 онд төрсөн болохоор тийм бодол төрж байгаагүй. Харин гуравдахь хүүхэд дээрээ жирэмсний гадаад апплейкшн суулгаж хэрэглэж үзсэн. Тэр үед ийм монгол хэлтэй апплейкшн байвал зүгээр л юм байна гэж бодол төрж байлаа. Учир нь хүн бүр англи хэлтэй апплейкшн ашиглах боломжгүй гэж боддог. Би ч өөрөө тэр үед зарим зөвлөмжийг нь бүрэн гүйцэт орчуулж уншиж чаддаггүй байсан.

-Жирэмсэн, бага насны хүүхэдтэй ээж бүр хэрэглэдэг апплейкшнуудын нэг шүү дээ. Ээжүүдээс талархлын сэтгэгдэл олон ирдэг үү. Тэр дундаас хамгийн сэтгэлд үлдсэнийгээ хуваалцаж болох уу?

             -“Үнэхээр хэрэгтэй апплейкшн. Хоёр дахь жирэмслэлтдээ дахиад ашиглаж байна, баярлалаа. Улам гоё болгоорой” гэж олон хэрэглэгчид маань сэтгэгдэл ирүүлдэг. Энэ өгүүлбэрээс дахин хэрэглэж байгаа гэдэг хэсэг нь надад илүү их сэтгэгдэл төрүүлдэг. Хүн ер нь өөрт таалагдаагүй, дургүй зүйлээ дахин хэрэглэдэггүй шүү дээ. Тэгэхээр манай апплейкшнын чанарыг илэрхийлж байгаа нэг үзүүлэлт гэж дүгнэдэг.

-Таны дараагийн зорилго, төлөвлөгөө юу вэ?

          -Би хүүхэд байхаасаа л ном их уншдаг байсан. Сүүлийн үед дадал хэвшүүлэх чиглэлээр ном уншиж, судалгаа хийж, өөр дээрээ ч хэрэгжүүлж байна. Энэ чиглэлээр мэдлэгээ зузаатгаад, өөрийнхөө ярих, илтгэх ур чадварыг улам сайжруулж, хуримтлуулсан туршлага, эзэмшсэн боловсрол, олж авсан мэдлэгээ хуваалцаж, хүмүүст хэрэгтэй зүйл зааж эхлэх бодолтой байна.