“Милан-Кортина-2026” өвлийн XXV дахь удаагийн олимпод 20-хон настай залуу эх орноо төлөөлөн уулын цанын спортоор оролцож, бариандаа орж бахархам амжилт үзүүлсэн. Олимпын нээлтийн хаалгаар Монгол Улсынхаа далбааг бахархалтайгаар намируулсаар орж ирсэн үндэсний шигшээ багийн тамирчин Алтанзулын Ариунбаттай ярилцлаа.

УУЛЫН ЦАНЫН СПОРТООР ӨВЛИЙН ОЛИМПЫН НААДАМД ОРОЛЦСОН АНХНЫ МОНГОЛ ТАМИРЧИН БОЛСОНДОО БАЯРТАЙ БАЙНА

-Танд энэ өдрийн мэнд хүргэе. Уулын цанын спортоор өвлийн олимпын наадамд оролцсон анхны монгол тамирчин болсонд баяр хүргэе. Сэтгэгдлээсээ хуваалцахгүй юу?

                -Анхны монгол тамирчин болсондоо үнэхээр баяртай байна. Гэхдээ энэ амжилтыг зөвхөн миний хувийн амжилт гэж бодохгүй байгаа. Манай баг хамт олон, дасгалжуулагч, гэр бүл, цанын холбоо гээд олон хүний хүч хөдөлмөр, хамтын хичээл зүтгэлийн үр дүн. Тиймээс бүгдэд нь маш их баярлалаа гэж хэлмээр байна.

-Эх орныхоо тугийг бариад олимпын нээлтэд оролцох мөчид юу бодогдсон бэ?

                -Олимпын нээлтэд оролцсон өдрийг яг л саяхан болсон мэт тод санаж байна. Тэр өдөр бэлтгэлээ дуусгаад дасгалжуулагчтайгаа хамт Гоёл кашмерийн хамт олны урлаж өгсөн дээлийг өмсөөд тамирчдын хотхоноос гарахад үүднээсээ эхлээд бусад улсын тамирчид хүрч ирж зураг даруулж, бидний хувцас, түүх соёлын талаар сонирхож байгаагаа илэрхийлсэн. Манай спортын супер одууд хүртэл хувцсыг минь сонирхон ирж танилцаж байлаа. Тэр өдөр хэчнээн хүнтэй зураг даруулснаа ч санахгүй байна. Нээлтийн ёслолын үеэр би Монгол Улсынхаа төрийн далбааг барихаар сонгогдсон. Дасгалжуулагчтайгаа хамт тугаа авах мөчид “Би чадах болов уу” гэж жаахан сандарч, догдолсон. Гэхдээ хэд хэдэн удаа сургуулилж, тугаа намируулж үзсэний дараа өөртөө итгэлтэй болсон доо. Нээлтийн хаалгаар тайван алхаж, ёслолоо амжилттай дуусгасан. Монгол Улсын ээлж ирж, тугаа намируулан алхах тэр мөчид монгол хүн болж төрснөөрөө маш их бахархаж, омогшсон.

-Олимпоор бариандаа орно гэдэг том амжилт шүү дээ. Бариандаа орох мөчид юу бодогдсон бэ?

                -Уулын цанын спортын хувьд хоёр гараа гарч, нийлбэр цагаар дүн гардаг онцлогтой. Хэрвээ уралдааны үеэр унах эсвэл замаас гарах юм бол шууд тэмцээнээс хасагдана. Миний хувьд дасгалжуулагчтайгаа ярилцаад хоёр гараагаа бүтэн дуусгах зорилго тавьсан. Эхний гараа гаргах үед цаг агаар маш муу байсан ч амжилттай бариандаа орж чадсан. Тэр үед өөрөөрөө бахархах сайхан мэдрэмж төрсөн ч “Хараахан дуусаагүй, одоо дахиад нэг гараагаа дуусгаж байж сэтгэл тайвширна” гэж бодогдож, өөрийгөө бэлдсэн. Эхний гараа дуусахад 96 тамирчнаас тал нь замаа дуусгаж чадаагүй байсан нь уралдаан ямар хүнд нөхцөлд болж байсныг харуулсан байх. Хоёр дахь гарааны өмнө тэнгэр цэлмэж, цаг агаар тогтуун болсон, би ч дотроо илүү зоригтой болсон. Гараанд гараад саваа бүр дээр төвлөрч, ямар ч байсан замаа заавал дуусгана гэж бодож уралдсан. Бариа дөхөж, сүүлийн саваагаа сүлжээд барианы шугамыг давах тэр мөчид цасан дээр өнгөрүүлсэн бүх цаг хугацаа, зааланд бэлтгэл хийж хөлсөө урсгасан бүх мөчүүдийн үр дүн гарч байгаа мэт санагдсан. Тэр үед л аав, ээж дээрээ очоод үнсүүлэх юм сан гэж бодогдсон доо.

-Таны хувьд уулын цанын спортыг хэзээнээс сонирхож хичээллэж эхэлсэн бэ. Юу нь таны сонирхлыг татсан бол?

                -Би анх таван настайгаасаа гэр бүлээ дагаж цанаар гулгаж эхэлсэн. Ах, эгч нар маань Sky Resort-ийн том зам руу явдаг байхад ээж минь намайг дагуулж хамгийн жижиг, анхан шатны замаар гулсуулдаг байсан. Ээж маань өөрөө цанаар сайн гулгадаггүй байсан ч миний суурийг маш сайн тавьж өгсөн гэж боддог. Анхандаа зүгээр л сонирхлын хүрээнд гулгадаг байсан. Харин дараа нь тэмцээн уралдаанд оролцож үзээд улам сонирхолтой санагдаж, улмаар тамирчны түвшинд хичээллэж эхэлсэн дээ.

-Олимп эх орноо төлөөлж оролцох эрхтэй болчхоод юу бодсон бэ. Бэлтгэлээ хэр хугацаанд хангасан бол?

                -Дөрвөн жилийн өмнө 2022 оны өвлийн олимпыг үзэж суухдаа “Яагаад би орж болохгүй гэж, дараагийн олимпын үед би хэдэн настай байх билээ” гэж бодоод өөртөө зорилго болгож байлаа. Уулын цанын спортод бага онооны зарчим явагддаг. Өөрөөр хэлбэл тэмцээнд сайн уралдвал бага оноо, муу уралдвал их оноо авна. Би анх тэмцээнд орж эхлэхдээ 500 орчим оноотой байсан. Гэтэл олимпын эрх авах босго 120 оноо. Энэ нь өмнөх олимпуудтай харьцуулахад илүү хэцүү шалгуур байлаа. Зарим хүмүүс “2026 оны олимпод арай амжихгүй, 2030 оныг харъя” гэж хэлж байсан ч дасгалжуулагч болон гэр бүл маань надад хамгийн их итгэж байсан. Эцэст нь 2025 оны арваннэгдүгээр сард оролцсон тэмцээнүүдээс олимпын эрхийн оноогоо авч чадсан. Тэр үед ямар их баярласан гэж санана. Гэхдээ энэ бол дөнгөж эхний даваа гэдгийг мэдэж байсан. Тэр өдрөөс эхлээд бүх зүйлдээ илүү анхаарч, олимпын гараандаа бэлтгэж эхэлсэн.

-Монгол Улсад тус спорт спортын хөгжил хэр байдаг вэ. Бэлтгэл сургуулилт хийх газар бий юү?

                -Монгол Улсад уулын цанын спорт одоо л хөгжиж эхэлж байна гэж боддог. Сүүлийн жилүүдэд эцэг эхчүүд хүүхдүүдээ багаас нь цанаар хичээллүүлэх нь нэмэгдэж, жил бүр шинэ тамирчид гарч ирж байна. Ирээдүйд дараагийн олимп, дэлхийн аварга шалгаруулах тэмцээнд би гэлтгүй манай өсвөр үеийн тамирчид эх орноо төлөөлөн амжилттай оролцоно гэдэгт итгэлтэй байна. Миний хувьд Sky Resort цанын бааздаа бэлтгэл сургуулилтаа хийж ирсэн. Энэ бааздаа бэлтгэл хийсний үр дүнд олимпын эрхээ авч, амжилттай оролцож чадсан.

-Тус спортын хөгжилд юу саад болдог гэж боддог вэ. Ямар дэмжлэг хэрэгтэй байдаг вэ?

                -Манай спорт нэлээд үнэтэй спортуудын нэг. Олон төрлийн хэрэгсэл шаарддаг. Мөн оноо авах тэмцээнүүд Монгол Улсад зохион байгуулагдах боломжгүй учраас заавал гадаадад очиж оролцдог. Одоогоор шигшээ багт хоёр тамирчин, нэг дасгалжуулагч ажиллаж байна. Хэрвээ энэ тоог нэмэгдүүлж, санхүүжилтийн дэмжлэг илүү сайн байвал олон тамирчин амжилт гаргах бүрэн боломжтой.

-Анх тэмцээнд оролцож, тамирчидтай өрсөлдөх ямар байсан бэ. Хамгийн анхны тэмцээнийхээ талаар ярихгүй юу?

                -Миний хувьд 2016 оны өсвөр үеийн улсын аваргын тэмцээн хамгийн дурсамжтай нь. Тэр үед өөрийн үеийн тамирчидтай өрсөлдөж түрүүлсэн нь надад үнэхээр их урам өгсөн. Тэр үеэс эхлээд тэмцээн уралдаанд  болгонд оролцож, өрсөлдөх дуртай болсон доо.

-Бэлтгэл сургуулилтаа хэрхэн хийдэг вэ. Бэрхшээлтэй үеийг хэрхэн давдаг вэ?

                -Цасан дээрх бэлтгэлээ Sky Resort дээр хийдэг. Харин биеийн хүчний бэлтгэлээ GAN CrossFit дээр хийдэг. Энэ дашрамд CrossFit-ийн Rocky болон Марлаа багш нартаа маш их баярлалаа.

-Гараанд гарахаасаа өмнө заавал хийдэг зүйл бий юу?

                -Гараанд гарахаасаа өмнө “Чи чадна аа, Ариба” гэж өөртөө хэлдэг. “Ариба” гэдэг нь миний хоч юм л доо, ингэж өөрийгөө зоригжуулдаг.

-Таны дараагийн зорилго, төлөвлөгөө юу вэ?

                -Цаашдын зорилгоо илүү том тавьсан байгаа. Одоохондоо нууц байлгасан нь дээр байх. Гэхдээ 2030 оны олимпод оролцох эрх авахын төлөө шаргуу хичээх болно.