Төрөх тасгийн эмч нар эх, ураг хоёрыг аврахын төлөө ямар их хичээдгийг, эцэг эхчүүдийн тэсвэр тэвчээр, үрээ гэх сэтгэлийг харуулсан “Эрсдэлтэй төрөх тасаг” олон ангит кино үзэгчдийн хүртээл болсоор байгаа билээ. Тус уран бүтээлд Төгсөө эмчийн дүрийг бүтээсэн залуу жүжигчин Э.Мөнхбаяртай ярилцлаа. Тэрбээр Арилди медиа агентлагийн үүсгэн байгуулагч билээ.

-Танд энэ өдрийн мэнд хүргэе. “Эрсдэлтэй төрөх тасаг” олон ангит кино үзэгчдийн хүртээл болж, долоо хоног бүр дараагийнхаа ангийг догдлон хүлээж байна. Уран бүтээлчийн хувьд сэтгэл дүүрэн өдрүүд өнгөрч байна уу?

                -Уран бүтээлчийн хувьд аз жаргалтай өнгөрүүлсэн гурван сарын хугацаа байлаа. Зураг авалтын үед олон зүйл сурсан. Үзэгчидтэйгээ адилхан долоо хоног бүр киногоо хүлээж, догдолж байна. Өөрийнхөө дүрийг үзэгчийн хувиар харж, өөртөө үнэлэлт, дүгнэлт өгч байна даа.   

-Дүрийнхээ талаар ярихгүй юу, зохиол дээрээс уншсан дүрээ амилуулах ямар байв?

                -Киноны зохиол дээр дүр бүрийн зан чанар, онцлогийг бичсэн байсан юм. Жишээ нь, Үжин эмч шийдэмгий гэдэг бол Төгсөө эмч дээр махлаг гэсэн тодотгол байсан. Би өөрөө ч жаахан махлаг. Тиймээс жин маань тус дүрд тэнцэхэд их нөлөөлсөн юм шиг байна лээ. Дүрийнхээ зохиолыг их уншсан, найруулагчтайгаа ч сайн ярилцсан. Найруулагч маань “Яг ингэж тогло” гэж хэлэхгүйгээр бодохыг өөрөөрөө ажиллах боломж олгосон. Өмнө нь хоёр ч уран бүтээл дээр эмчийн дүрд тоглож байсан юм, гэр бүлийн минь хүн ч эмч болохоор энэ мэргэжлийн дүрд тоглох дуртай, ажлыг нь сайн ойлгодог.

-Эмч нар үзэх учраас зүүгээ зөв барих, эмнэлгийн хэллэгийг зөв хэлэх гээд олон зүйл дээр анхаарах шаардлага гарсан байх. Сургалтад суух эсвэл мэргэжлийн эмч нар хажууд нь зөвлөж байв уу?

                -Эхнэр маань төрөх тасгийн эмч болохоор надад дүрийн судалгаа хийх боломж их байлаа. Эмнэлгийн үг хэллэг, мэс заслын хутгаа хэрхэн зөв барих уу гээд олон зүйл дээр зөвлөгөө авсан. Мэргэжлийн хүн үзээд чамлах зүйлгүй уран бүтээл болоосой, бодит байдлаас битгий зөрөөсэй гэж бодож уран бүтээлээ хийсэн. Уран бүтээлчид Нийслэлийн Амгалан амаржих газрын эмч нарын дор 10 гаруй хоног дадлагад гарсан. Жүжигчин болсноороо эмч нарын олон жил сурч хөдөлмөрлөсөн мэргэжлийг хэдхэн хоногт заалгаж, сурахыг хичээсэн. Эмч нар маань үнэхээр их тусалсан.

-Төрөх тасгийн эмч нарт ямар асуудал хамгийн их тулгардаг юм шиг санагдсан бэ?

                -Төрөх тасгийн эмч нарт олон асуудал тулгардаг юм билээ. Эх, ураг хоёрыг амь нас, эрүүл мэнд гэдэг нэгдүгээр асуудал. Дараа нь ар гэрийг нь тайвшруулна. Нийгмийн олон янзын стресс бухимдал, зантай хүмүүстэй харилцдаг юм билээ. Төрөлт гэдэг төлөвлөгддөггүй, үргэлж цаг минуттай уралддаг ажил. Кинонд тоглох явцдаа төрөх тасгийн эмч нар ямар их ачаалалтай, авхаалж самбаатай ажилладаг юм бэ гэдгийг ойлгож, биширсэн.

-Кинон дээр гарсан зарим үйл явдал бодит амьдрал дээр ч тохиолдож байгаа шүү дээ. Тэр тохиолдлуудаас хамгийн эмзэглүүлсэн нь юу байсан бэ. Жишээ нь, 40 цаг гэрт нь төрүүлэхийн тулд байлгасан гэдэг шиг?

                -Төрөлт, мэс заслын 32 өөр төрөлтийн жишээ гардаг, үүний 20 нь бодит үйл явдлаас сэдэвлэгдсэн. Миний хувьд халдварт өвчтэй эхтэй холбоотой анги дээр хамгийн их эмзэглэсэн. Мөн хорих ангиас ирж төрчхөөд эх хүүхдээсээ салж байгаа үе ч тун хүнд туссан. Хэдийгээр бүгд зохиолын дагуу байсан ч ийм үйл явдал гарч байж дээ гэж бодогдоод сэтгэлд тээглээд байсан.

-Та аав болж амжсан уу, хэрэв болж амжаагүй бол төрөх тасагт хэсэгхэн ч гэсэн ажиллаад эхнэрээ илүү хайрлаж, халамжлах ёстойг ойлгосон байхдаа?

                -Би нэг хүүтэй, хүүгээ төрөхөд нь хамт төрөх өрөөнд орохыг хүссэн ч тухайн үед цар тахлын хөл хориотой үе байсан болохоор чадаагүй. Дадлага хийгээд төрөх тасгуудад ажиллаж байхдаа ээжүүдийг ямар их тэсвэр тэвчээр, хатуужил гаргаж төрдгийг харсан. Эрэгтэй хүн бүр эхнэрийгээ төрж байхад нь хажууд нь байж, ямар их өвдөлт мэдэрдгийг нь хараасай, юм ойлгоосой гэж хүссэн. Төрж байгаа хүмүүсийг хараад эхнэр минь ямар их хичээсэн бол гэж бодогдоод нулимс цийлгэж байлаа. Дараагийн удаа эхнэртэйгээ заавал хамт төрөх өрөөнд орно оо.

 -Залуу жүжигчдээс гадна туршлагатай жүжигчид ч байсан. Их зүйл сурч, туршлага хуримтлуулсан уу?

                -Хүндэлдэг, хичээл заалгаж байсан багш нартайгаа нэг кинонд тоглох боломж олдсонд баяртай байна. Туршлагатай, мундаг жүжигчдийнхээ зураг авалтын өмнө бэлдэж байгаа арга барил, илүү мэргэжлийн байх гэж хичээж байгаагаас нь олон зүйл сурлаа.

-“Эрсдэлтэй төрөх тасаг” олон ангит кино бусад ижил төрлийн киноноос юугаараа онцгой вэ?

                -Манай кинонд ажилласан жүжигчин, арын алба, найруулагч, зураглаач гээд бүгд дадлагад хамрагдаж, эмнэлийг дотор ажиллаж үзсэн. Бүгд халдвар хамгааллын дэглэмээ сайтар сахиж, тоног төхөөрөмжүүдээ ариутгаж ажилласан. Эмнэлгийн ажилтан шиг л дадал суулгаж ажиллалаа. Хагалгааны жинхэнэ үйл явдлыг харуулж байгаа учраас кино эхлэхийн өмнө үзэгчдэд анхааруулж байгаа.

-Энэ киноны зорилго нэг талаараа үзэгчдэд эрүүл мэндийн боловсрол олгох шүү дээ. Тэгвэл энэ кинонд тоглосны дараа танд ямар өөрчлөлт гарсан бэ?

                -Урлагаар дамжуулж хүмүүст олон зүйл ойлгуулах боломжтой. Манай киног үзсэн үзэгчид төрөлт, эмнэлгийн талаар бага ч гэсэн ойлголт авна гэж найдаж байна. Надад олон өөрчлөлт гарсан шүү. Амьдрал баялаг шүү дээ, манай киноны уран бүтээлчид гэнэтийн байдалд хүүхэд эх барьж авах шаардлагатай болбол анхан шатны бүх арга хэмжээг авч чадна.

-Эмчийн дүрд тоглоод, эмч мэргэжлийн үнэ цэн, сайхан зүйлийг нь мэдэрсэн  үү?

                -Эрсдэлтэй үед чухал шийдвэр гаргах хэрэгтэйг нь ойлгож, эмч мэргэжлээр нь их бахархсан.

 -Өмнө нь мөн эмчийн дүрд тоглож байсан шүү дээ. Тус уран бүтээлийн талаар ярихгүй юу?

                -Эмчийн дүр л байснаас ямар нэгэн байдлаар хагалгаа, мэргэжлийн үг хэллэг хэлсэн хэсэг гардаггүй юм. Тэр үед ч бас уран бүтээлчидтэйгээ хамт яаралтай тусламжийн тасагт очиж ажиллаж үзсэн.

-Та яагаад жүжигчин мэргэжлийг сонгосон бэ. Залуу уран бүтээлчийн хувиар ямар жүжигчин, уран бүтээлч байхын хүсдэг вэ?

                -Долдугаар ангид байхдаа жүжигчин болох талаар анх бодож байлаа. Ахлах сургуулиа төгссөнийхөө дараа ЭЕШ дээр өндөр оноо авч өөр сургуулиудад орох боломж байсан ч эргэлзээгүй СУИС-д шалгалт өгсөн. Шалгалт өгчхөөд өөртөө итгэхгүй, “Хэрэв тэнцээгүй байвал дараа жил дахиж шалгалт өгнө” гэж бодож байлаа. Мэргэжилдээ огт эргэлзэж байгаагүй, жүжигчин болно л гэж шийдсэн. Залуу уран бүтээлчийн хувьд эсрэг дүрд тоглож үзэхийг хүсдэг. Мөн УДЭТ-т тоглож, алтан тайзан дээр гарахыг мөрөөддөг дөө.

-Та дараагийн зорилго, төлөвлөгөөнөөсөө хуваалцахгүй юу?

                -Тавдугаар сард найруулагч мэргэжлээрээ нэг уран бүтээл эхлүүлэхээр төлөвлөсөн байгаа. Бусад уран бүтээлүүдэд оролцож, өөрийгөө хөгжүүлэхийг хичээж байгаа. Өөрийгөө дутуу үнэлэхгүй, үзээд алдана гэсэн төлөвлөгөөтэй байна даа.