Австралийн Канберрад хотод жил бүр болдог уламжлалт National Multicultural фестивальд монголчууд анх удаа 100 гаруй хүний бүрэлдэхүүнтэй оролцож нэг цагийн үзүүлбэр үзүүлэхдээ эх орныхоо үндэсний ёс уламжлалын сурталчлан, таниулжээ. Тэгвэл тус үйл ажиллагааг зохион байгуулж, оролцсон Ч.Маралгоотой ярилцлаа. Тэрбээр Канберра хот дахь монгол бүжиг, соёлын нэгдэл болох MDance Collective-ийн үүсгэн байгуулагч билээ.

-Танд энэ өдрийн мэнд хүргэе. Австралийн нийслэл Канберра хотод монголчууд өв соёлоо сурталчиллаа шүү дээ. Том үйл ажиллагааны ард гарсан сэтгэгдлээсээ хуваалцахгүй юу?

                -Бидний хийсэн үйл ажиллагаа зарим хүнд сүртэй том зүйл шиг санагдахгүй байж мэднэ. Гэхдээ миний хувьд бол олон санаачилга, төлөвлөлт зохион байгуулалт мөн хариуцлага шаардсан хүндхэн ажил байлаа. Зургаан сарын турш өдрийн бодол, шөнийн зүүд болж сайн бэлдэхийн хичээсэн. Өөрт байгаа бүх чадвар, хүч чадал, сэтгэл зүрхээ зориулж хийсэн болохоор ард нь амжилттай гарсандаа үнэхээр их баяртай байна. Үүнийг амжилттай болгохын тулд хажууд үргэлж тусалж дэмжиж, надтай сэтгэл нэгдэн хамтран ажилласан Канберра хотын ах, эгч нартаа гүнээ талархаж байна. Тэр дундаа гар нийлэн бүх ажлыг хамтран бэлдэж, өөрийн хувийн амьдрал, албан ажлаа хүртэл хойш нь тавьж байсан н.Отгондалай эгчдээ маш их баярлаж байгаа.

-Зургаан сарын турш юун дээр хамгийн их анхаарч бэлдсэн бэ?

                -Бүжгийн тоглолт хариуцсан багшийн хувьд надад бүтэн цагийн тоглолтын үзүүлбэр маань хамгийн чухал байсан. Тоглолтын нэг цагийн эрх авсан мөчөөс эхлэн хөтөлбөрөө төлөвлөж эхэлсэн. Үзэгч олон түмэн, гадаад хүмүүст монгол бүжиг, соёлын гайхамшгийг харуулахын тулд хөтөлбөрөө маш их бодож тунгааж байж гаргасан. Ингээд нэн даруй MDance Collective-ийнхаа бүжигчдийг тогтмол бэлтгэлд оруулж, тэднийхээ ур чадварыг өдрөөс өдөрт дээшлүүлж тайзны хэмжээнд бэлэн болгох нь маш чухал байлаа. Багшийн хувьд ур чадварыг минь сорьж, сайжруулж, олон зүйлийг ухааруулсан зургаан сар байлаа.

NATIONAL MULTICULTURAL ФЕСТИВАЛИЙН ҮЗҮҮЛБЭРЭЭРЭЭ ЭХ ОРНЫХОО ӨВ СОЁЛ, ТҮҮХИЙГ БУСАД ОРНЫ ОРОЛЦОГЧДОД ТАНИУЛАХЫГ ХИЧЭЭСЭН

-100 гаруй хүнийг нэг баг болгож нэг цагийн үзүүлбэр бэлдэх амаргүй байв уу?

                -Бүх оролцогчид маань сэтгэлээрээ нэгдэж чадсан учраас тийм ч хэцүү байгаагүй ээ. Харин ч урьж оролцсон хүмүүс маань уриалгахнаар хандаж, яг л надтай адил “Монголоо сурталчилъя” гэсэн чин сэтгэлтэй байсан учраас надад хүн нэг бүртэй харилцаж, ойлголцоход сайхан байсан. Дашрамд танилын хүрээгээ тэлж, олон ч сайхан найзтай боллоо.

-Нэг цагийн үзүүлбэрээрээ эх орныхоо юуг сурталчлан таниулж, харуулахыг хүсэв?

                -Нэгдүгээрт, бидний хүсэж бүртгүүлсэн нэг цагийн тайзны бүжгийн үзүүлбэр ерөөсөө л манай MDance Collective -ийн эрхэм зорилготой нягт холбоотой байлаа. Монгол урлаг соёл, тэр дундаа монгол бүжиг, бий биелгээ ямар өвөрмөц, баялаг, он удаан жилийн түүхтэй, гайхалтай утга учир агуулж байдгийг гаднынханд гайхуулж, таниулах зорилготой байсан. Мөн гадаадад амьдардаг ч гэсэн Монгол үр хойч минь энэ сайхан үндэсний өв соёлоороо бахархдаг байгаасай, хүмүүст нүүр бардам үзүүлдэг байгаасай гэсэн өчүүхэн хүсэлдээ хөтлөгдөн хийж байгаа зүйл минь юм л даа. Дараагийн том үйл явдал нь бид 1500 хүний бүрэлдэхүүнтэй уг фестивалийн Парад алхалтад монголчуудаараа үндэсний хувцас дээлээрээ гоён нэгэн цөм болж бахархалтайгаар нэгдэн алхсан. Үүнд бидний зорилго бол ерөөсөө үндэсний хувцсаараа гангарч, гаднынханд өв соёл, урлаг уран сайхан, уртын дуу, морин хуур, үндэсний бүжгээрээ өөрсдийгөө тодорхойлон таниулах байсан. Анхны жил хэдий ч бид тун амжилттай үндэсний бөх, сур харваачид, мэргэжлийн морин хуурч, дуучид, бүжигчид хийгээд дээлээрээ гоёсон найман настай балчраас 80 настай буурал хүртэл олон монгол гэр бүлүүдийн бүрэлдэхүүнтэй өргөн дэлгэр оролцсон.

-M dance collective бүжгийн нэгдлийн талаар ярихгүй юу, хэзээ үүсгэн байгуулагдсан бэ, ямар чиглэлээр үйл ажиллагаа явуулж байна?

                -Манай бүжгийн нэгдэл байгуулагдаад дөнгөж нэг жил болж байна. 2025 оны хоёрдугаар сард хамгийн анхны хүүхдүүдэд зориулсан монгол бүжгийн сургалтаа хийж байсан. Хүрээгээ тэлээд насанд хүрэгчдэд ч мөн бүжгийн сургалт орж эхэлсэн. Бид тогтмол бүжгийн хичээл орохоос гадна, улирал бүр төгсөлтийн баяр хийж шавь нар маань эцэг эхийнхээ өмнө тайлан тоглолт үзүүлдэг. Нэг жилийн хугацаанд бүх л Монгол соёлын үйл ажиллагаануудад шавь нараа бэлдэж оролцуулсан байна. Монгол Улсаас Австралийн Холбооны улсад суугаа Элчин Сайдын Яамны тогтмол үйл ажиллагаанууд дээр манай шавь нар бүжгийн тоглолтоо толилуулдаг. Мөн саяхан манай хотод байгаа монголчууд анхны үндэсний их баяр наадмаа өргөн дэлгэр тэмдэглэсэн бөгөөд үүнд манай бүжигчид өөрсдийн дэглэж, бэлдсэн үндэсний бүжгээрээ оролцсон. Дээр дурдсанчлан манай нэгдэл монголчууд хамтдаа өв соёлоо сурах орон зайг бий болгож, монгол бүжгийн өвийг хүүхэд багачуудад, монгол гэр бүл болгонд өвлүүлж үлдээхийг зорьж ажиллаж байна даа.

-Та бүжгийн багшаар ажиллаад хэр удаж байгаа вэ. Яагаад багшлах болов?                     

                -Би албан ёсоор бүжгийн сургууль төгссөн мэргэжлийн бүжгийн багш биш л дээ. Гэхдээ хүүхэд байхаасаа бүжгээр хичээллэсэн, бүжгийн урлагт дуртай нэгэн.  Сурсан мэдсэнээ бусдад хуваалцах чин сэтгэлийнхээ үүднээс Канберра хот дахь монголчууддаа өөрт байгаа ур чадвартаа суурилан монгол бүжгийн урлагаар дамжуулан өв соёлоо түгээх, таниулах зорилгоор Mdance Collective ийг үүсгэн байгуулаад бүжиг зааж эхэлсэн.

-Таны хувьд Австрали Улсыг хэзээ зорьсон бэ, тэнд ямар чиглэлээр ажиллаж, суралцаж байна?

                -Би Австрали улсад 2024 оны хавар ирсэн одоогоор гадаад харилцааны мэргэжлээр суралцаж байна. Чөлөөт цагаараа монгол бүжгээ заахаас гадна Салса, Бачата гэх мэт Латин Америк бүжгийг сурч, хүмүүст зааж эхэлсэн.

-Бүжгийн урлагаар хичээллээд хэр удаж байгаа вэ. Анх бүжгийн урлагийг сонгосон шалтгаан нь юу байв?

                -Багаасаа л бүжиглэх дуртай байсан. Ээж маань намайг 10 настайгаас эхлээд төрөл бүрийн бүжиг, гимнастикийн дугуйланд явуулдаг байлаа. 16 хүрээд Монголын Se Dance Production-д гэрээт бүжигчнээр ажиллаж эхлээд монгол бүжигт илүү их дурласан даа.

-Бүжиглэж байхдаа мэдэрдэг мэдрэмжүүдийнхээ талаар ярихгүй юу?

                -Бүжиглэж байхдаа би өөрийгөө хамгийн эрх чөлөөтэйгөөр мэдэрдэг, илүү өөртөө итгэх итгэлтэй болдог. Бүжгийн хөдөлгөөнөөрөө би өөрийгөө бүрэн дүүрэн илэрхийлж чадаж байгаа мэт санагддаг. Бүжиг хэдийгээр миний мэргэжил биш ч амьдралын минь зайлшгүй нэг хэсэг

-Бүжгээр хичээллэснээр хувь хүнд ямар эерэг өөрчлөлтүүд гардаг бол. Давуу тал нь юу вэ?     

                -Бүжгээр хичээллэх нь олон эерэг давуу талтай. Биеийн бүх булчинг хөгжүүлж, уян хатан байдал, тэнцвэр сайжруулдаг тул бие махбодын эрүүл мэндэд нэн тустай. Дасгал хөдөлгөөн болохоос гадна сэтгэлзүйн аугаа их бясалгал болдог, баяр баясал авчирдаг. Цаашлаад багаар ажиллах чадвар нэмж, нийгмийн идэвхтэй байхад хүртэл тусалдаг.

-Багшлах, шавь нартай байхыг сайхныг яривал?    

                -Мэргэжилийн диплом байхгүй ч гэсэн би хүнд мэдлэг чадвараа хуваалцаж, багшлах их дуртай. MDance Collective-ийнхэн маань намайг багш гээд хүндлэн хүлээж авдагт талархахын зэрэгцээ, том хариуцлагыг алхам тутамдаа санаж, өдрөөс өдөрт илүү сайн багш байхын тулд хичээдэг дээ. Шавь нартай байхын сайхан нь тэднийхээ сайжирч байгааг харах, илүү өөрсдөдөө итгэлтэй, урам зоригтой болохыг харах, мөн гэр бүл ойр дотно хүмүүсээс нь чин сэтгэлийн “Баярлалаа, багш аа” гэдэг үг сонсох байдаг даа.

-Таны болон багийнхных нь дараагийн зорилго төлөвлөгөө юу байгаа вэ?

                -Манай бүжгийн нэгдлийн дараагийн зорилго бол одоо орж байгаа сургалтаа илүү өргөжүүлж, цахимаар бусад хотын хүмүүст хүргэдэг болох, шавь нартайгаа Австралийн бусад хотоор зочилж тоглолт хийх байна даа.

INSTAGRAM:marilyn_1105

FACEBOOK:Maralgoo Chinguunjav