Азийн залуучуудын III дугаар наадмын таеквондогийн төрөлд хүрэл медаль хүртсэн Б.Бэлгүтэйгийн ярилцлагыг хүргэж байна. Тэрбээр Олимп клубийн тамирчин, Спортын төв сургуулийн 11 дүгээр ангийн сурагч бөгөөд таеквондогийн аварга шалгаруулах тэмцээний долоон удаагийн аварга юм.

-Чамд энэ өдрийн мэнд хүргэе. Азийн залуучуудын наадмаас хүрэл медаль хүртсэнд баяр хүргэе. Сэтгэгдлээсээ хуваалцахгүй юу?

                -Баярлалаа, сэтгэгдэл маш өндөр, сайхан байгаа. Азийн залуучуудын III наадамд анх удаа оролцож, хүрэл медаль хүртсэндээ баяртай байна. Багаасаа ганцаараа медаль хүртэх мэдрэмж жоохон эвгүй байсан ч найзуудаа их дэмжсэн.

-Медалийн тавцан дээр зогсож байх мөчид юу хамгийн их бодогдсон бэ. Алтан медаль хүртэж чадаагүйдээ жаахан ч гэсэн харамссан уу?

                -Медалийн тавцан дээр зогсоход “Алтан медаль аваад төрийн дууллаа эгшиглүүлэх юм сан” гэж их бодогдсон. Мэдээж харамссан ч гэсэн чадах бүхнээ хийсэн болохоор тийм ч удаан харамсаагүй ээ. Тажикстан Улсын тамирчныг ялаад Азийн аваргаар хожигдсон Солонгосын тамирчинтай дахиж тулалдахыг маш их хүссэн. Өнгөрсөн долдугаар сард Малайз Улсад болсон ААШТ-д хүрэл медалийн төлөөх тулалдаанд БНСУ-ын тамирчинд ялагдсан байсан юм.

-Таеквондогийн спортоор анх хичээллэж эхэлсэн үеийнхээ талаар ярихгүй юу. Тус спортын юу нь таны сэтгэлийг тэгж их татсан юм бол?

                -Анх биеэ хамгаалах зорилгоор “Олимп клуб”-ын зааланд анх хөл тавьж байлаа. Миний их сэтгэлийг хамгийн их татсан зүйл гэвэл янз бүрийн сонирхолтой өшиглөлтүүд байсан. Анх усан спортоор хичээллэж байгаад ээж маань таеквондогийн клубт оруулсан юм. Би багаасаа л үеийнхнээсээ өндөр байсан болохоор спортын тамирчин л болох байх гэж боддог байсан. Таеквондо бол уян хатан чанар, тэсвэр хатуужил, хүндлэлийн спорт.

-Хичээллэж эхлээд хамгийн анхны оролцсон тэмцээнийхээ талаар ярихгүй юу. Амжилт гаргасан уу?

                -Хамгийн анхны тэмцээн маань улсын аварга шалгаруулах тэмцээн байсан. Дүрмээ сайн мэддэггүй байсан болохоор амжилт гаргаж чадаагүй ээ. Өвөрхангай аймагт болсон улсын аваргаар  хүрэл медалийн төлөө тулалдаад маш харамсалтайгаар торгуулиар  ялагдаж байсан. Дүрмээ мэдэхгүй болохоор өрсөлдөгчийнхөө нүүрэнд хүрсэн гэдэг шалтгаанаар хожигдсоноо мартагддаггүй. Оноогоор бол илүү явсан юм. Ингээд харахаар таеквондо маш шударга спорт .

-Бусад онцлох тэмцээн, амжилтынхаа талаар ярихгүй юу?

                -Би одоогоор улсын долоон удаагийн аварга, 2023 оны Азийн аварга шалгаруулах тэмцээний мөнгөн медальт, саяхан болж өнгөрсөн Азийн залуучуудын III наадмын хүрэл медаль хүртлээ. Бүх тэмцээн л дурсамжтай байдаг. Олон улсын тэмцээнүүд хамгийн их дурсамжтай байдаг. Өсвөрийн ААШТ-ээс мөнгөн медаль хүртсэн маань Монголын анхны мөнгөн медаль гэдгийг анх сонсоод үнэхээр их баярлаж байсан.

-Таны хамгийн хүчтэй өрсөлдөгч хэн бэ. Тамирчид өрсөлдөгчөөсөө олон зүйл сурдаг шүү дээ?

                -Миний жинд Солонгос, Иран,Узбекстан Улсын тамирчин их хүчтэй өрсөлддөг. Солонгосын тамирчин гэхэд махлаг биетэй болохоор өрсөлдөхөд маш их хүч шаардагддаг тамирчин.

-Оролцож байсан хамгийн дурсамжтай тэмцээнийхээ талаар ярихгүй юу. Онцолж байгаа шалтгаан нь юу вэ?

                -Анхны улсын аваргын алтан медалиа Дундговь аймагт авч байсан. Анхны гэдэг утгаараа хэзээ ч мартахгүй онцлох тэмцээн байдаг.

-Тулааны спортоор хичээллэхэд шантрах үе гарч байв уу. Хэрхэн даван туулсан бэ?

                -Спортоос шантрах үе гэвэл бэртэл авах, бэртэлтэй байх үе л байдаг даа. Сая энэ тэмцээний өмнө шагайгаа хүртэл хазгай гишгээд, бэртэлтэй оролцсон. Бэртэл авчихаар л их шантардаг. Тэсвэр тэвчээрээр багш нарынхаа тусламжтай л давж гарч байгаа.

-Таеквондогийн спорт амьдралд нь хэрхэн нөлөөлсөн бэ?

                -Би цаг маш сайн баримталдаг болсон гэж бодож байна. Мөн хүндлэлийг сурч яваа.

-Тэмцээний тулааны талбар дээр гараад тулалдахад ямар мэдрэмж төрдөг вэ?

                -Хамгийн эхний тулаан дээр маш их сандардаг. Үргэлжлүүлээд багшийнхаа зөвлөгөөг сонсоод, тулалдахад болчихдог. Ялах мэдрэмж хамгийн гоё.

-Амжилт гарахад юу хамгийн их нөлөөлдөг вэ. Тамирчин хүний хувьд сэтгэл зүйгээ хэрхэн бэлддэг вэ?

                -Нөлөөлдөг олон зүйл бий. Аав, ээж, багш дасгалжуулагч, баг хамт олон гээд бүх зүйл нөлөөлдөг. Найзуудын минь нэг түрүүлж тулалдаад ялагдаж, орж ирээд уйлаад сууж байгааг харах хамгийн хүнд тусдаг. Тийм байдал харчихаар санасан, төлөвлөсөн тулаанаа гаргаж чаддаггүй юм байна лээ. Ер нь хамгийн түрүүнд тулалдах их амар байдаг.

-Танд оролцохыг хүсдэг тэмцээн бий юү, дараагийн зорилго юу вэ ?

                -Бүх тамирчдын хамгийн том мөрөөдөл болох олимпод өрсөлдөж, төрийн дууллаа эгшиглүүлэн алтан соёмбот далбаагаа мандуулахыг мөрөөддөг. Хамгийн ойрын зорилго минь Азийн залуучуудын олимпод амжилттай оролцож, медаль хүртэх л байна даа.