Бүжин, Амина хоёрыг өрөвдөж, заримдаа өмнөөс нь халаглан шүүрс алдаж, цөөхөн тохиох гэрэлт мөчүүдэд нь баярлан хайрлаж, ирээдүйг нь гэрэлтэй байгаасай хэмээн залбирсаар монголчууд “Надад ирээгүй хайр” олон ангит киног шимтэн үзэж байна. Тус уран бүтээлд амьдралын хатуу бүхнийг ээжтэйгээ туулсан, эмээгийнхээ халуун дулаан хайранд өсөж хүмүүжсэн дэндүү хэрсүү 16 настай Амина охины дүр бий. Түүний дүрийг СУИС-ийн дөрөвдүгээр курсийн оюутан Б.Хонгорзул бүтээсэн юм. Хэрсүү, хөөрхөн Аминагийн дүрээр үзэгчдийн хайрыг татаад байгаа Б.Хонгорзулын ярилцлагыг та бүхэнд хүргэж байна.

-Танд энэ өдрийн мэнд хүргэе. “Надад ирээгүй хайр” олон ангит киноны Аминагийн дүрд тоглосон байгаа шүү дээ. Дүрийн саналыг анх хэзээ авсан бэ. Зохиолоо унших үед хамгийн эхэнд юу бодогдож байв? 

                -Киноны саналыг энэ жилийн дөрөвдүгээр сард манай продюсер н.Нямжав эгч залгаад “Чамайг "Урт өдрүүд" ОАУСК-аас харсан юмаа, ирж уулзаж болох уу” гэсэн. Тэгээд хамгийн анх кино багийнхан болон зохиолтойгоо танилцсан. Зохиолыг анх уншиж байхдаа амьдралын олон өнгийг олж харсан. Хүнийг хайрлах, ялангуяа эмэгтэй хүнийг хайрлах мэдрэмж илүүтэй төрсөн. Хүн хүнийг уучилж чаддаг байхыг, өөрийгөө гаргуунд нь хаяхгүй байх, хүн таньж сурах гээд олон зүйлийг киноныхоо зохиолоос сурсан даа. Хүмүүс Бүжингийн дүрийг тэнэг гэж их хэлж байна лээ, надад лав тэгж санагдаагүй ээ. Харин ч өрөвдөж хайрламаар дүр.”Ийм тэнэг хүн гэж байх уу, өнчин гэхээрээ л ийм байдаг юм уу” гэсэн шүүмж их байсан. Хэдий кино зохиол ч гэсэн амьдралд ийм хүн олон байгаа, үүнээс хэцүүг туулж яваа хүн ч бий. Хүний зан араншин төлөвшилд гэр бүлийн хүмүүжил маш чухал байдаг. Бидэнд зааж зөвлөх аав ээж, ах эгч найз нөхөд бий харин Бүжинд байхгүй шүү дээ. Бүжингийн дүр ээжтэй минь их адилхан санагддаг юм. Гэнэн зан нь, ээж минь бага байхдаа ээж аавыгаа алдаад эмээ дээрээ өссөн. Их өрөвч хүнд итгэмтгий маш зөөлөн сэтгэлтэй хүн. Хааяа жоохон хүүхэд шиг таних, танихгүй бүх хүнд өөрийн чадахаараа тусална. Тэр чинээгээр муу хүн их, найз гэчхээд өөдгүй зан гаргасан хүн ч байдаг. Гэхдээ л миний ээж уучлах сэтгэлийг харамгүй хүмүүст өгнө. Бага байхад уур хүрдэг байлаа, насанд хүрэх тусам ээжийгээ улам хайрламаар санагддаг болсон. Яг л “Бурханы хүмүүст туслаарай” гэж явуулсан сахиусан тэнгэр шиг санагддаг юм. Азаар ээж маань сайн хадам, сайн нөхөртэй учирсан. Ингээд бодохоор гэнэн цайлган итгэмтгий хүмүүс хорвоогийн хаа сайгүй бий. Ээжтэй минь дүрийн зан араншин адилхан санагдсан болохоор хамтарч тоглоход нэг л дотно бас илүү их өрөвдөх сэтгэл төрж байлаа.

-Амина тун тогтворгүй харилцаатай гэр бүлтэй, хэцүү амьдрал туулсныхаа дараа эмээгээ түшиж өдий амьдарсан хүүхэд шүү дээ. Уран бүтээлчийн хувиар Аминагийн дүрийг тодорхойлбол?

                -Амина дэндүү хэрсүү, сэргэлэн адтай охин. Гэхдээ л 16 нас гэдэг бол төлөвшиж дуусаагүй байгаа гэсэн үг шүү дээ. Юу хийж байгаа, юу хэлж байгаа тэр бүхнийхээ буруу зөвийг бүрэн таньж мэдээгүй. Хүмүүс “Ээжийгээ асрахгүй, аваад яваач тэнэг охин” гэдэг сэтгэгдлүүд бичсэн байсан. Дүрийн өмнөөс тайлбарлахад, хэрвээ би гээд бодоод үзэхээр ээж нь аав, эмээ хоёрт нь гомдсоноосоо болоод охиндоо халамж хайр хангалттай өгч чадаагүй, өдрийн хоолоо залгуулахын тулд шил тушаана, хайр халамж гэдэг зүйлийг мэдрэлгүйгээр бага насаа өнгөрөөсөн. Эмээ дээрээ очсоноор анх удаа амгалан тайван халуун дулаан мэдрэмжийг авсан байх. Тэгээд дахиад 10 жилийг эмээтэйгээ өнгөрөөчихөөр дэндүү дасчихсан байгаа. Ээжээсээ хол өсчихсөн, яг юу хийхээ мэдэхгүй тулгамдсан үе байсан байх. Ээжийгээ шоронгоос гарсны дараа уулздаг хэсгийг авах үед үнэхээр өр зүрх эмтэрмээр байсан. “Миний хөөрхөн ээж юу үзэж туулсан болоод ийм болчихсон юм бэ” гэж бодогдоод ээж рүүгээ харж ч зүрхлэхээргүй хэсэг. Тэгээд сийлсэн туулай өгдөг шүү дээ, энийг хөөрхөн гараа өвдтөл сийлсэн байхдаа үргэлж намайг санаж байсан байхдаа гээд уйлаад л байсан. Тэр бол үнэхээр надад маш хүнд сцен байсан.

-Эмээтэйгээ амьдарч эхлээд бүр ч их сэргэлэн, цовоо охин болсон юм шиг санагдсан. Таны хувьд цовоо сэргэлэн, дэггүй охины дүрд ажиллах ямар байв. Өөрөөс нь хэр өөр зан араншинтай дүр вэ?

                -Би өөрөө эмээтэйгээ өссөн болохоор их дотно байсан. Манай эмээгийн дүрд тоглосон С.Болормаа багш маань их зөөлөн энергитэй хүн яг эмээтэй минь адилхан халуун дотно мэдрэмж төрүүлсэн. Хамтран тоглоход нэн таатай байсан. Амина намайг бодвол илүү нээлттэй, цовоо сэргэлэн санагддаг. Би чинь амьдрал дээрээ ихэнхдээ чимээгүй дуу цөөтэй. Ойр дотнын хүмүүстэйгээ бол илүү нээлттэй л дээ. Амина маань гэр бүлийн тогтворгүй байдалд өссөн болохоор бас их дураараа. Өөрөөсөө өөр хүний дүрд тоглох надад их сонирхолтой байсан. Миний хийж чадахгүй зүйлийг Амина чадна. Аминагийн дүрээр хүмүүстэй илүү нээлттэй харилцаж сурсан.

-Киноны орос хувилбарыг нь үзэж байсан уу. Өөрийнхөө дүрийг тус уран бүтээлээс онцолж харсан уу?

                -Бага байхдаа л үзэж байсан. Одоо давтаад үзчихвэл орос киноны дүрийг дуурайчхаж магадгүй гэж бодоод үзээгүй ээ. Дуурайхгүй гэж бодсон ч үзчихээр цаанаасаа тэр зураглал нь нүдэнд харагдана шүү дээ. Өөрөө бодож өөрөөрөө тэр дүрийг илэрхийлэхийг хүссэн.

-Сүүлийн өдрүүдэд “Надад ирээгүй хайр” киног шимтэн үзэгчид нэмэгдсэн. Тэр хэрээрээ жүжигчид рүү хандсан сэтгэгдэл их ирж байгаа юм билээ. Танд ямар сэтгэгдэл хамгийн их ирж байна?

                -Үзэгчид шимтэн үзэж байгаад их талархаж байгаа. Киног минь хайрлаж, өрөвдөж алдаа оноог нь хэлж өгч байгаа үзэгчдэдээ баярлалаа гэж хэлмээр байна. Олон хүмүүс баяр хүргэж магтаалын үг хэлсэн, бүгдэд нь баярлалаа. Найзууд, дотнын хүмүүс минь кино хэрхэн дуусахын асууж, бодогдоод нойр нь хүртэл хүрэхгүй байгаа гэсэн. Би “Тэр чинь цэргийн нууц” гээд хав дараад л байгаа. Үзэгчдэдээ, намайг дэмжиж үргэлж ар талд минь байдаг гэр бүлдээ дахин баярлалаа.

-Аминагийн дүрийг мөн чанарыг хамгийн сайн харуулсан хэсэг таныхаар хэзээ байсан бэ. Аминагийн дүрээр уран бүтээлчид юуг төлөөлүүлж харуулахыг зорьж байгаа бол?

                -Сүүлийн ангиудад гарах Шижирээгийн төлөө өөрийгөө золиосолж байгаа хэсэг л. Аминагийн мөн чанарыг илэрхийлэх байхдаа. Та бүхэн үзсэний дараагаа ойлгох байх. Гэр бүлийн байдал аав, ээжийн хайр халамж хүүхдэд ямар хэрэгтэй болохыг Аминагаар төлөөлүүлж харуулахыг хүссэн байх. Аав, ээжийн хүүхдэд олгох хүмүүжил гэдэг бол асар чухал зүйл. Тэр хүмүүжлээр хүүхдийн цаашдын амьдрал тодорхойлогдоно. Аминагийн хувьд бол хаягдах мэдрэмжийг маш олон удаа авч байсан, дахиж хаягдахаас их айдаг. Энэ айдсаасаа болж буруу сонголт хийнэ, өөрийгөө бодоогүй шийдвэр гаргадаг хэсгүүд олон бий.

-Хүмүүс Аминагийн заримдаа өрөвдөж, зарим нь сайн сайхныг хүсэж, ээж шигээ амьдрал туулах вий гэж эмээж байгаа. Таны хувьд дүрээ өрөвдөж байв уу?

                -Мэдээж төрөлгүй яах вэ, Амина олон зүйлийг туулна харин ч тэр бүртээ их хүчтэй байгаа нь улам өрөвдөх сэтгэл төрүүлж байсан. Тийм энхрий ялдам охин 16-хан насандаа тэр их зүйлийг мэдэрч туулна гэж бодохоор. Би одоо өөрөөрөө төсөөлж үзвэл 16 нас гэдэг бол их нялх санагдаж байгаа байхгүй юу. Хорвоо ертөнцтэй дөнгөж танилцаж эхэлж байгаа үе. Тийм жаахан дээрээ олон мэдрэмжийг туулж үзсэн гэхээр их хүчтэй ч юм шиг. Энэ дүрд тоглож байх хором мөч бүхэндээ дүрээ өрөвдөх хайрлах сэтгэл төрж байсан.

-Таны хувьд өмнө нь “Амьдрал” кинонд тоглож байсан шүү дээ. Таны анхны дүр байсан уу. Анх кинонд тоглоход ямар мэдрэмж төрсөн бэ?

                -Миний анхны кино "Урт өдрүүд" ОАУСК байсан. Зураг авалтын талбайд анх хөл тавих мөчөөс эхлээд бүх зүйл надад шинэ, сонин бас ид шидтэй санагдсан. Тэр үед би өөрийнхөө мөрөөдөлтэй нүүр тулж, яг зөв газраа байгаа юм шиг санагдсан. Тоглосон кино бүр минь надад үнэхээр үнэ цэнтэй боловсрол, сургамж болсон. Зарим дүр намайг илүү тэвчээртэй, уужим сэтгэлтэй болгосон бол зарим нь уучлал, хайр, хүний дотоод ертөнцийн нарийн мэдрэмжийг ойлгуулсан. Хүн бүрийн амьдрал ямар олон өнгөтэйг, сонголт бүр ямар чухлыг ойлгуулсан бүтээлүүдэд ажилласандаа баяртай байдаг.

-СУИС-д сурч байхдаа уран бүтээлд оролцож, тоглоход багш нар нь ямар зөвлөгөө өгсөн бэ?

                -Манай сургууль их ачаалалтай ажилдаг л даа урлагийн хүмүүсийг илүү хатуужилтай, ачаалал даах чадварыг хөгжүүлэхийн тулд тэгдэг байх. Түүний хажуугаар кинонд явна гэдэг бол бас л чанга байсан шүү. Бүгдийг амжуулах хэрэгтэй, цагаа төлөвлөж сурна. Ажил хичээлийнхээ ачааллыг зохицуулна гээд олон зүйл тулгарахын зэрэгцээ суралцах юм их байсан. Ангийн минь багш их зохион байгуулах чадвар сайтай хүн л дээ, олон ажлыг чанартайгаар цаг тухайд нь амжуулж чаддаг, үнэхээр биширмээр. Багшаасаа бас үлгэр дуурайлал их авсан. Бид нарт зааж зөвлөхдөө “Хэдий их ажилтай байсан ч өөрийгөө хаяж болохгүй, ядаж хувцсаа угаагаад цэвэрхэн өмсчихдөг байх хэрэгтэй. Ялангуяа урлагийн хүн олонд харагдаж байгаа учир өөрийгөө анхаарах хэрэгтэй нэг биед гурван өнгөнөөс олон хувцас өмсөх нь зохимжгүй” гээд олон зүйлийг зааж зөвлөнө. Ангийн багш маань намайг хамгийн их дэмжиж урам өгч, үлгэр жишээ минь байдаг.

-Яагаад жүжигчин болохоор шийдсэн бэ?

                -Би бага байхаасаа л их мөрөөдөмтгий хүүхэд байсан, олон мэргэжил мөрөөднө. Эмч, багш, цагдаа, хөгжимчин, тогооч, дуучин,бүжигчин гээд бүгдийн мөрөөднө, төсөөлж тоглоно. Бага байхдаа дүрд орж тоглох их дуртай хүүхэд байлаа. Хүүхдүүдтэй тоглож байхдаа эмээ нь болж жүжиглээд, гэнэт уйлж хамт тоглож байгаа хүүхдүүд гайхтал тоглоно. Нэг удаа дунд ангид байхад хөгжмийн багш маань нэг хөгжим тоглоод бид хэдийг нүдээ аниад мэдэрч сонсоорой гэсэн юм. Тэгээд нүдээ аниад сонслоо, их гоё сүүлдээ өөрөө тоглож байгаа юм шиг бүр хөгжимдөө орчихсон. Гар хуруугаа жигтэйхэн хөдөлгөөд л тэгж байгаад нүдээ нээсэн ангийнхан бүгд над руу хараад намайг шоолж байдаг юм. Би уг нь мэдрэмжээ илэрхийлэхээс айдаггүй юу мэдэрч байна шууд гаргачихдаг хүүхэд байсан юм.Тэр үеэс эхлээд яагаад ч юм хаалттай болчихсон. Бусад урлагийн хүмүүс чинь ангидаа их идэвхтэй байсан гэд ярьдаг шүү дээ,  би бол урлагийн үзлэгт ч ордоггүй хүүхэд байлаа. Хүмүүсээс хараат болчихсон дахиад намайг шоолох юм шиг санагдаад. Тэгэхээр хүүхдийн сэтгэл зүй тийм эмзэг байдаг хэрэг, нэг удаагийн айдсаас болоод олон жилийн айдас үүснэ. Эцэг эхчүүддээ хандаж хэлэхэд хүүхдүүддээ хүнийг гомдоохгүй байхыг үг ямар хүчтэй, нэгнийгээ байгаагаар нь хүлээн зөвшөөрөхийг олон төрлийн хүмүүс байдаг шүү гэдгийг зааж сургаж байгаасай гэж хэлмээр байна. Энэ олон мөрөөдөл, хүслийг бүгдийг мэдэрч үзмээр байсан хамгийн тохиромжтой нь жүжигчин юм шиг санагдсан. Би бүгдийг туршиж үзэж болно судалж болно, мэдэрч болно. Өөрөөсөө гардаг олон өнгийн мэдрэмжээ энэ мэргэжлээр гаргаж чадах юм шиг. Энэ мэргэжлийг эзэмшвэл би насан туршдаа жаргаж хийх юм шиг санагдсан учраас сонгосон. Мөн сургууль минь надад өөртөө итгэх итгэлийг дахин өгсөн. Одоо хэн нэгнээс ичиж өөрийнхөө мэдрэмжийг дарахгүйгээр илэрхийлдэг болсон шүү.

-Таны дараагийн зорилго, төлөвлөгөө юу вэ?

                -Эхлээд өөрийгөө олон талаас нь хөгжүүлнэ. Боловсролыг нэн тэргүүнд тавина гэж бодож байна. Дахин дахин сурсаар л байна. Энэ хүртэл уншсан хүн бүхэнд баярлалаа. Эрүүл энх аз жаргалыг хүсье.