Хүүхэлдэйн театр насанд хүрэгчид болон ахлах ангийнханд зориулан анх удаа хүүхэлдэйн жүжиг найруулан тавьж байгаа нь Одиссей пластик бүжгэн жүжиг билээ. Тус уран бүтээлийн Пенелопагийн дүрд тоглож буй жүжигчин Б.Буд-Эрдэнэтэй ярилцлаа.

-Танд энэ өдрийн мэнд хүргэе. Хүүхэлдэйн театрын шинэ уран бүтээл Одиссей жүжгийн ямар дүрд тоглож байгаа вэ. Тус жүжигт тоглож байгаа сэтгэгдлээсээ хуваалцахгүй юу?

                -Одиссейн эхнэрийн Пенелопагийн дүрд ажиллаж байгаа. Тус дүр маань хүүхэлдэй учраас хүүхэлдэйг нь амилуулж байгаа юм. Нэр хүндтэй туульсын гол утга санааг нь авч пластик хүүхдийн бүжгэн жүжиг болгон тавьж байгаа. Энэ жанр нь тухайн зохиолын үйл явдлыг илүү биеэрээ илэрхийлэх учраас хүүхдүүдийн сонирхлыг татахаас гадна уран бүтээлчдээс тэвчээр шаардаж байна.

-Таны хувьд Pro театрын уран бүтээлч шүү дээ. Өмнө нь Щелкунчик хүүхдийн жүжгийн тоглож байсан. Энэ удаа Хүүхэлдэйн театртай хамтарч ажиллаж ямар байна?

                -Бид 2010 онд Орос Улсын Санкт-Петербург хотын театр урлагийн академид сурахдаа Хүүхэлдэй театр, хоёр улсын Соёлын яамны хамтарсан тэтгэлэгт хөтөлбөрөөр явсан. Эх орондоо ирээд Хүүхэлдэйн театртаа ажиллах ёстой байсан боловч тухайн үед орон тоо байгаагүй юм. Тиймээс ОХУ-ын Улан-Үдэ хотод урилгаар очиж, Үлгэр хүүхэлдэйн театрт нь долоон жил ажилласан. 2022 онд Монголдоо ирээд Pro театрыг байгуулсан. 2024 оны гуравдугаар сард жүжигчний орон тоо гарсан учраас ирж ажиллах санал тавьсан юм. Үүнээс хойш Хүүхэлдэйн театрын үндсэн жүжигчнээр ажиллахаас гадна өөрсдийн байгуулсан Pro театраа орхилгүйгээр уран бүтээлээ хийж байгаа.

-Одиссей жүжиг бусад жүжгээс юугаараа онцлог болсон бэ?

                -Хүүхэлдэйн театр насанд хүрэгчдэд зориулсан уран бүтээлтэй болохыг зорьж, тус жүжгийг тавихаар шийдсэн. Бүжгийн жүжиг нь хүүхэлдэй ашиглаж байгаагаараа онцлог байгаа. Жүжигчид бүжиглэнэ, хүүхэлдэйгээ амилуулна энэ дундаас хамгийн онцлог нь тус жүжиг ямар үггүй, бүгдийг биеийн хөдөлгөөн, царайны хувирал, бүжгээрээ илэрхийлнэ.

-Хүүхдүүд рүү чиглэсэн уран бүтээл гаргахын хамгийн сайхан нь юу байдаг вэ?

                -Хүүхдүүд жүжиг үзээд бүх л үйл явдалд нь итгээд сайн талын баатрыг дэмжээд тухайн дүрийн төлөө амьдраад байгаа нь хамгийн хөөрхөн.

-Уран бүтээлчид “Одиссей” жүжгээрээ юу хэлэхийг, ойлгуулахыг хичээж байгаа бол?

                - Одиссей жүжиг ахлах болон насанд хүрэгчдэд зориулсан уран бүтээл. Бидний хувьд жүжгээрээ эр хүн гэр бүл, үнэт зүйлийнхээ төлөө ямар их зориг гарган олон зүйлийн туулдгийг харуулна.

-Багачууд хэний анзаараагүйг анзаарч мэдэх гярхай үзэгчид шүү дээ. Тиймээс хүүхдийн жүжгийн дүр таныг илүү сорьж байгаа байх даа?

                -Хүүхдүүд үнэхээр гярхай шүү. Үүнээс гадна анхаарал төвлөрөх чадвар нь насанд хүрсэн хүнтэй харьцуулахад бага байдаг юм. Тиймээс хүүхдүүдийн анхаарлыг нэг сарьзнуулчихвал дахиж тэр анхаарлыг олж авна гэдэг тун хэцүү. Уран бүтээлчдийн хувьд тэдний анхаарлыг алдахгүй байх олон аргыг ашигладаг. Жүжиг үзэж байгаа бол зөвхөн жүжигтээ төвлөрөх нөхцөлийг нь бүрдүүлдэг юм. Тэр анхаарлыг алдахгүйн төлөө хичээж байгаа үйлдэл нь жүжигчдийг хамгийн их сорьдог доо.

-Хүүхэд бүр багадаа үзэж байгаа хүүхэлдэйн киноны баатрынхаа оронд өөрийгөө төсөөлдөг шүү дээ. Тэгвэл өөрийгөө нэг үлгэрийн баатартай зүйрлээч гэвэл хэн байх вэ?

                -Хамгийн эхэнд Бэмби хүүхэлдэйн кино бодогдлоо. Тэр хүүхэлдэйн киноны Бэмбигийн нүд бодогдоод байгаа учраас тус дүрийг л нэрлэх юм байна.

-Таны хувьд “Щелкунчик” хүүхдийн жүжгээс гадна “Инээмтгий хүн” жүжигт тоглосон шүү дээ. Тус хоёр жүжиг огт өөр хүмүүст зохиулсан уран бүтээл. Аль жанрынх нь жүжиг таныг хамгийн их сорьсон бэ, яагаад?

                -Хоёулаа огт өөр жанрын уран бүтээл учраас төрөл бүрдээ намайг  их сорьсон. Надаас тэс өөр хоёр хүнийг шаардсан учраас. “Инээмтгий хүн” Pro театрыг байгуулсны дараах анхны том хэмжээний жүжиг байсан учраас үг дээрээ анхаарах шаардлага гарсан. Учир нь ОХУ-д удаан ажиллаж амьдарсан учраас монгол үгээ хэтэрхий өргөлттэй хэлээд байсан юм билээ. “Щелкунчик” жүжгийн монголчууд балетаар нь сайн мэддэг шүү дээ. Үүнийг гэр бүлийн жүжиг болгон тавьсан. Инээмтгий хүний дараа “Щелкунчик” жүжиг дээр ажиллаж эхэлсэн. Одоо бодоход “Инээмтгий хүн” жүжиг намайг илүү сорьсон байх. 30 настайдаа “Щелкунчик” жүжгийн долоон настай охины дүрийг бүтээх амаргүй байсан шүү, “би долоон настайдаа ямар байсан билээ” гэж олон удаа бодсон.

-Яагаад жүжигчин болохоор шийдсэн бэ. Юу нь таны сонирхлыг татсан юм бэ?

                -Үнэндээ багаасаа жүжигчин болно гэж бодож байгаагүй ээ.  ОХУ-ын сургуульд хүүхэд явуулж байгаа талаарх мэдээ сонсоод өөрийгөө сорьсон, тэнцсэн. Миний хувьд сургуульдаа сурч байхдаа мэргэжлийнхээ сайхныг мэдэрч, улам дуртай болсон доо.

-Цаашид ямар дүрд өөрийгөө сорих бодолтой байдаг вэ?

                -Монголд ирээд дэлгэцийн уран бүтээлд оролцоогүй байгаа. Цаашид кино урлагт өөрийгөө сорих бодол, зорилготой байгаа.