Монгол Улсын Мотокросс, Эндурогийн тамирчин ОУХМ П.Төрбаттай ярилцлаа. Тэрбээр Турк Улсад зохион байгуулагдсан FIM Hard endure дэлхийн аварга шалгаруулах тэмцээний тав дахь гараанд тун амжилттай оролцоод ирсэн билээ.

FIM HARD ENDURO ДЭЛХИЙН АВАРГЫН ЦУВРАЛ ТЭМЦЭЭНД АМЖИЛТТАЙ ОРОЛЦОЖ, GOLD FINISH ХИЙСЭНДЭЭ БАЯРТАЙ БАЙНА

-Танд энэ өдрийн мэнд хүргэе. FIM Hard enduro дэлхийн аваргын цувралын тав дахь гараанд уралдлаа шүү дээ. Тус тэмцээд оролцсон байгаа сэтгэгдлээсээ хуваалцахгүй юу?

                -FIM Hard enduro дэлхийн аваргын цувралынхаа тав дахь гараанд хэдхэн хоногийн өмнө уралдлаа. Миний анхны Hard enduro-гийин тэмцээн байсан. Дөрвөн жилийн дараа тус тэмцээндээ оролцож, тэмцээнээ амжилттай бариандаа орж, gold finish хийсэндээ баяртай байна.

-Таны хувьд тус уралдаанд хэд дэх удаагаа оролцож байгаа вэ?

                -Энэхүү уралдаан гурав дахь удаагаа оролцож байна. Нэг удаа зохион байгуулагчаар оролцож байсан. Энэ жил тамирчны хувиар оролцлоо.

-Мотоспортын эндуро төрлийн УАШТ-ий долоо дахь гараанд амжилттай оролцсон шүү дээ. Тус тэмцээний талаарх сэтгэгдлээсээ хуваалцахгүй юу. Долоон гарааг амжилттай дуусгах ямар байв?

                -Эндурогийн УАШТ энэ жил долоон гараатайгаар зохион байгуулагдсан. Эндуро мотоспортын холбоо байгуулагдаад жил болох гэж байна, би ч холбоондоо идэвхтэй ажиллаж байгаа. Анх удаа холбоо байгуулагдаж, эндуро төрлийн цуврал тэмцээн зохион байгуулагдаж эхэлсэнд баяртай байгаа. Цаашид уламжлал болон зохион байгуулагдана гэдэгт итгэж байна.

-Мото спортоор тогтвортой амжилт гарахад юу нөлөөлсөн бэ?

                -Аль ч спортод амжилт гаргахын тулд тууштай байдал байдаг. Тууштай, хичээл зүтгэлтэй байсны үр дүнд амжилт гарч байгаа гэж боддог. Мөн намайг үргэлж дэмждэг гэр бүл, багаас минь бэлдэж дасгалжуулсан багш нар, дэмжигч байгууллагууддаа их баярладаг даа.

-Экстрим спортод дурлах шалтгаан юу байв?

                -Үгээр хэлэх боломжгүй үнэхээр сайхан мэдрэмжийг энэ спортоос авдаг. Спортоор хичээллэдэг тамирчинд тэр мэдрэмжийг мэднэ дээ. Хүн бүрийн амьдралын хэв маяг өөр байдаг шүү дээ. Миний амьдралын хэв маяг экстрим спорт учраас үүнээсээ таашаал авч амьдардаг. Мотоцикл миний биеийн нэг хэсэг шиг мэдрэгддэг.

-Тамирчид олон саад бэрхшээлийг даван туулсан байдаг. Тус спортын тамирчин болсноор ямар бэрхшээлийг даван туулсан гэж боддог вэ?

                -Олон саад бэрхшээлийг даван туулж байж, тодорхой хэмжээний амжилт гаргадаг. Хувийн амьдрал, гэр бүлийг хойш тавьж байж амжилт гаргадаг юм шиг санагддаг. Тууштай хийхийн тулд зарим зүйлийг хойш тавих хэрэгтэй болдог. Энэ хамгийн том бэрхшээл болдог байх. Тиймээс бэртэл, гэмтэл, санхүүгийн асуудлыг бид бэрхшээл гэж төдийлөн хардаггүй.

-Мотоспортын эндуро төрлийн онцлог нь юу юм бэ. Шавар, элс, уул хад хамгийн мототой гарч боломгүй эрсдэлтэй замаар гардаг юм шиг санагдсан?

                -Энэ төрлийн гол онцлог нь хүний байж болох бүх л тэвчээрийг шалгадаг. Тэвчээртэй, тууштай байж чадвал бариандаа орж чаддаг. Мөн гол уралдах зам нь шавар, мод, ус гээд байгалийн саад, бартаа байдаг. Үүнийг мотоциклтойгоо давах нь энэ төрлийн нэг онцлог нь болдог.

-Бартаат зам дунд зөв замаа олж уралдана гэдэг тамирчнаас тэвчээр, ухаан шаарддаг байх даа?

                -Тийм ээ, хамгийн чухал зүйл. Байгалын бартаа хаана ямар байхыг хэлж мэдэхгүй. Заримдаа төсөөлснөөс гүнзгий шавар байх нь бий. Үүнийг өөрийнхөө сонгосон хамгийн зөв гэсэн замаараа явж туулдаг. Мотоцикл дээр хэр олон жилийн өнгөрүүлсэн, туршлагатай нэгэн бэ гэдэг үүнээс харагддаг. Ухаан гэхээсээ илүү туршлага мэдрэмжийн асуудаг гэж боддог.

-Тэгвэл таны хувьд таныг хамгийн их сорьдог уралдааны зам аль нь вэ?

                -Миний хувьд Австри болон Румын Улсад уралдсан зам хамгийн хэцүү, бартаатай нь байсан. Дөрвөн цагийн дотор хүний бүх л тамир, эрч хүчийг бүрэн шавхаж, дуусгасан. Дараа нь дөрвөн хоног үргэлжилдэг тэмцээн байсан л даа. Нэг уурхайд нөгөө хүн хамгийн хэцүү замуудыг сонгож, тэмцээнээ зохион байгуулдаг.

-Олон улсын тэмцээнд оролцох бэлтгэлээ хэрхэн хийдэг вэ?

                -Ямар тэмцээнд оролцох гэж байгаагаас шалтгаалдаг. Энэ удаагийн тэмцээний өмнө Монголынхоо тэмцээнүүдэд оролцож бэлтгэлээ хангасан.

-Мотоспортод дуртай болох, энэ спортоор хичээллэх болсон шалтгаан нь юу байв?

                -Хүүхдүүд зураг зурж, шүлэг цээжилдэг шиг мэдээ орсон цагаасаа мотоцикл унаж сурсан. Миний өдөр тутмын амьдралын хэв маяг шиг байсан. Багаасаа техник мотоспортод дуртай хүүхэд байсан учраас мэргэжлийн тамирчин болсон.

-Гэр бүлийнхэн нь экстрим спортоор хичээллэдгийг нь хэрхэн хүлээж авдаг вэ?

                -Бага байхад ээж л жаахан айдаг байсан. Насанд хүрсний дараа дуртай зүйлээрээ амжилт гаргаж байгаа учраас хүлээн зөвшөөрч, дэмждэг.

-Таны дараагийн зорилго төлөвлөгөө юу вэ?

                -Энэ өвөл, хаврын дэлхийн аваргын цуврал тэмцээндээ амжилттай оролцож, бариандаа орж, эх орныхоо нэрийг гаргах зорилготой байна даа.