Урлагийн гавьяат зүтгэлтэн, “UBS” телевизийн захирал, хөгжмийн зохиолч Л.Балхжавын нэрэмжит “My Voice” шоуны ялагч Э.Цогтбаяртай ярилцлаа.

-Танд энэ өдрийн мэнд хүргэе. “My voice” шоуны ялагч болсон танд баяр хүргэе. Үндэсний шоуны ялагч болсон сэтгэгдлээсээ хуваалцахгүй юу?

                -UBS телевизээс уламжлал болгон зохион байгуулдаг My voice шоуны ялагч болж, гран-при шагналын эзэн болсондоо баяртай байна. Ялагчийг тодруулах мөч догдлол сандрал дүүрэн дотроо “Би чадсан болов уу” гэж эргэлзсээр байсан. “Эрхэмбаатарын Цогтбаяр” гэж зарлах тэр мөч үнэхээр гайхалтай, өөрийгөө зүүдлээд байгаа эсэхэд ч эргэлзсэн. Огшоод л ирсэн дээ, тун дурсамж дүүрэн үдэш байлаа.

-Анх тус шоунд яагаад орохоор болсон юм бэ?

                -Хань минь намайг шоунд бүртгүүлсэн. Шоу болох гэж байгааг хэлсэн ч эргэлзээд байсан юм. Өөртөө итгэлтэйгээр шоунд оролцох зоригийг эхнэр минь өгсөн юм.

-Цэнхэр дэлгэцээр шоуг үзэх, өөрөө оролцож, өрсөлдөх хоёр тэс өөр байсан байх. Шоуны эхний шатаас эхлээд ямар мэдрэмжүүд төрж байв?

                -Өмнөх шоуг үзэж байхдаа “Хэрэв би шоунд оролцсон бол ингэж дуулах байсан даа гэж бодож, хэддүгээр шат хүртэл явах бол” гэж боддог байсан. Өөрийн биеэр оролцоход төсөөлсөн шиг амархан байсангүй. Энэ удаагийн шоуны оролцогчдыг дийлэнх нь мэргэжлийг байгууллагат ажилладаг уран бүтээлчид байлаа. Өрсөлдөгчдөөсөө эмээж байлаа, шат бүр дээрээ л сандарч, догдолж байлаа даа. Миний дараагийн уран бүтээлүүд төлөвлөгдөж байгаа. “My voice” шоу залуу дуучдыг нийгэмд таниулж байгаа сайхан тэмцээн.

-Бусад оролцогч дунд мэргэжлийн дуучид байлаа гэсэн шүү дээ. Таны хувьд ч мэргэжлийн дуурийн дуучин юм билээ. Энэ талаараа ярихгүй юу?

                -Миний хувьд 2019-2023 онд СУИС-ийг эчнээ ангиар төгссөн. Өмнө нь, Их засаг их сургуулийг эдийн засагч мэргэжлээр төгссөн юм. Угтаа 2019 онд өдрийн ангид нь элссэн ч цар тахлын хөл хорио таарч цахимаар суралцаж байгаад эчнээ анги болгож ангиа сольсон. Намайг СУИС-д ороход өлгийдөж авсан А.Дашпэлжээ, Л.Халиунсүрэн багшдаа баярлалаа.

-Эдийн засагч мэргэжлээс дуурийн дуулаач болсон шалтгаан нь юу байв. Багаасаа дуулдаг хүүхэд байв уу?

                -Өмнөговь аймагт залуу дуучдыг дэмжих, нийтэд гаргах “Мөрөөдлийн өртөө” тэмцээнийг зохион байгуулсан юм. Би тус тэмцээний ялагч болж, СУИС-д дуурийг дуулаачаар суралцах эрхийн бичиг авсан. Ах минь дуурийг дуулаач байсан юм. Бид хоёр багаасаа дууны тэмцээн уралдаанд хамт оролцдог байлаа. Тэгээд нэг гэр бүлээс хоёр урлагийн хүн байгаад хэрэггүй гэж бодоод би өөр мэргэжил сонгож байсан юм. Харамсалтай нь ах минь 2017 онд зуурдаар нас барсан. Тэр үеэс хойш дуулах хүсэл байсан ч зориглож чадаагүй. Гэрийнхэнд минь хэцүү байсан учраас дуучин болох мөрөөдлөө түр хойш нь тавьсан байсан. Сүүлд гэрийнхэн минь намайг дэмжиж, сэтгэл тэнүүн тэмцээндээ оролцож, амжилт гаргасан даа.

-“My voice” шоуны тайзан дээр байхдаа ахыгаа их санасан байхдаа?

                -Дуулах бүртээ л ахыгаа санадаг даа. “Ах минь байсан бол надаас хавь илүү дуулна даа” гэж боддог юм. Ахынхаа авьяастай өөрийгөө жиших ч  юм биш. Үнэхээр гайхалтай авьяас, чадвартай хүн байсан. Ахынхаа хийхийг зорьсон, мөрөөдсөн бүхнийг нь өөрийнхөө хэмжээнд биелүүлж, баярлуулах юм сан гэж хүсдэг дээ. Бага байхад нагац эгч минь ах бид хоёрт ижилхэн хувцас өмсүүлээд л дууны тэмцээнүүдэд оролцуулдаг байлаа. Ах тэргүүн байрт, би дараагийнх нь байрт эсвэл тусгай байрт шалгарна. Амьдралын минь хамгийн дурсамжтай мөчүүд.

-Шоуны шат бүр дээр шүүгчид зөвлөгөө, сэтгэгдлээ хэлдэг шүү дээ. Тэр дундаас хамгийн сэтгэлд хоногшсон сэтгэгдлийг хэн шүүгч хэлсэн бол?

                -Шүүгчдийн сэтгэгдэл бүр надад урам өгч, өөрийгөө хөгжүүлэх түлхэц болж байсан. Зөвхөн энэ шоугаар өөрийгөө хязгаарлахгүй өөрийгөө хөгжүүлээрэй гэж хэлэхэд нь их баярлаж, хичээх ёстойгоо ойлгосон. МУГЖ Д.Отгонжаргал дуучин “Тив дэлхийд нэрээ цуурайтуулж байгаа дуурийн дуучдын араас түүчээлэх боломж чамд байгаа” гэж хэлэхэд их баярласан. Гуравдугаар шатанд хөгжмийн зохиолч Л.Балхжав, яруу найрагч Ш.Гүрбазар ах надад дуу хийж өгнө гэж хэлсэн. Энэ бол миний хувьд хамгийн том шагнал нь байсан даа.

-Тус шоунд хамт оролцсон бусад оролцогчдынхоо талаар дурдахгүй өнгөрч боломгүй байх. Хэдийгээр ялагч болохын төлөө өрсөлдөж байсан ч сайхан нөхөрлөлийг ч бий болгосон байх?

                -“My voice” шоуны оролцогчид бүгд л шилдэг, чадварлаг залуус байсан. Бүгд дүүрэн хүсэл эрмэлзэлтэй. Хагас жилийн хугацаанд нэгнийгээ дэмжиж, зөвлөж, сайхан нөхөрлөлийг бий болгосон.

-Шоуны шат бүр өөр, өөр онцлогтой байсан байх. Тэр дундаас хамгийн дурсамжтай, онцгой нь аль байсан бэ?

                - Тэмцээний дугаар, шат бүр өөр онцлогтой байлаа. Шат бүр дээр сайн дуулж, үзэгчдэд сайхан уран бүтээл хүргэхийг зорьсон. Тэр дундаас хамгийн онцгой нь финалын шат байлаа. Гурван дууг попури болгон найруулж дуулсан. Гэтэл тэмцээнээс тав хоногийн өмнө ханиад хүрч хоолой өвдөж, ханиад хүрсэн. Үнэхээр тэмцээндээ орж чадахгүй болчих вий гэж эмээсэн. Үнэхээр эдгэхгүй бол харамсахгүйгээр тэмцээнээ дуусгана даа, шилдэг 21 оролцогчийн нэг болж чадсан шүү л гэж бодсон. Гэргий минь миний ханиадыг эдгээх гэж олон арга хэрэглэж, хичээсний үр дүнд тэмцээндээ амжилттай оролцсон.

-Таны дараагийн зорилго, мөрөөдөл юу вэ?

                -Ард түмэндээ хүндлэгдсэн уран бүтээлч болохыг мөрөөдөж, үүнийхээ төлөө хичээж байна. Надад ирсэн олон хүний итгэлийг дааж явахыг хичээнэ. “My voice” шоуны ялагч гэх эрхэм алдрыг хүндтэй авч явахыг хичээх болно оо.