Татар хамтлагийн анх байгуулагдсан мөч, тэдний туулсан амьдралыг харуулах Татар уран сайхны кино үзэгчдийн хүртээл болсон билээ. Тус уран бүтээлд дуучин Жагаа буюу Ч.Жаргалсайханы дүрд тоглосон залуу уран бүтээлч Н.Түвшинтэй ярилцлаа.

-Танд энэ өдрийн мэнд хүргэе. “Татар” кино нээлтээ хийж үзэгчдэд хүрч эхэллээ шүү дээ. Сэтгэгдлээсээ хуваалцахгүй юу?

                -Үнэхээр сайхан байна. Учир нь “Татар” кино, киноны нээлт гээд бүгд анхных учраас цаг мөч бүрийг нандигнаж байна. Нэг талдаа ингэж хөөрч баярлаж байгаа ч, гаднаа гаргаагүй жаахан айдас байна. Үзэгчид хэрхэн хүлээж авч байгаа бол, би ямар харагдаж байгаа бол гээд бодох, санаа зовох зүйл олон байна. Кино нээлтийн дараа үзэгчид надад баяр хүргэхэд л багахан тайвширч, баярласан. Үзэж өссөн, үлгэр дуурайлал авдаг уран бүтээлчид магтаж, баяр хүргэхэд итгэж өгөхгүй байсан. Нээлтийн үеэр киногоо үзчихээд гарч ирээд хамгийн эхэнд ангийнхаа багштай уулзсан. Багшид минь их таалагдсаныг мэдээд багшаараа бахархуулах зүйл хийсэндээ баярласан.

-Анхны уран бүтээлийнхээ гол дүрд тоглох үнэхээр том сорилт байсан байхдаа?

                -Сургуулиа төгссөн даруйдаа уран сайхны киноны гол дүрд тоглоно гэдэг ховор тохиох зүйл байх. Анх намайг Жагаа ахын дүр дээр сонголоо гэх үед баярлах, гайхах зэрэгцсэн. Кинонд тоглох гэрээгээ хийчхээд хамгийн эхэнд ээж, багш хоёртоо баярт мэдээгээд хуваалцсан. Гол дүрд тоглоно гэдэг нэг талаараа том хариуцлага байлаа. Аливаа уран бүтээл гэдэг багийн ажил байдаг. Тэр дундаа кино уран бүтээл олон хүний хөдөлмөр, цаг хугацаа учраас илүү хариуцлагатай ажиллахыг хичээсэн. Дөнгөж төгссөн надад итгэл хүлээлгэсэн Aranjin pictures-ийн хамт олонд баярлалаа.

-Дүр нь хийсвэр зохиол биш, бодит хүн шүү дээ. Дүрийнхээ судалгааг хэрхэн хийв?

                -Бодит хүний дүрийг бүтээх амаргүй юм билээ. Тэр дундаа олны танил эрхмийн дүр учраас бүүр ч хэцүү, хариуцлагатай байлаа. Дүрийн мань эзэн өөрийнх нь түүхийг хэрхэн амилуулсныг үзнэ шүү дээ. Дүрийн судалгаагаа кинонд тэнцсэн өдрөөсөө хойш хийсэн. Жагаа ахын хийж байсан уран бүтээл, оролцож байсан нэвтрүүлэг, бичсэн дуу гээд бүх зүйлийг нь мэдэхийг зан чанараас нь өөртөө бага ч гэсэн шингээхийг хичээлээ. Дүрийн судалгаан дээр Татар хамтлагийн Мөөгий ах их тусалсан. Бидэнд 10-20 жилийн өмнө гаргаж байсан CD, сонинд өгсөн ярилцлага, ирсэн захидал гээд хамгийн нандин архивуудаа харуулж, түүхийг нь ярьж өгсөн. Татар хамтлагийн өмнө нь сонсож байгаагүй дуунуудаа сонссон. Кино зохиол миний дүр ямар нөлөөтэй, ямар сэтгэлд хөдлөлөөр хандаж байгааг гаргахыг хичээсэн. Нээлтийн үеэр киногоо үзэхдээ өөрийнхөө алдааг харж, шүүж үзсэн. Энэ удаагийн уран бүтээл дээр гаргасан алдаагаа дараа дараагийнхаа уран бүтээл засаж, сайжруулах болно.

-Кинонд нь тоглохоос бусдаар танд Татар хамтлаг болон дуутай нь холбоотой дурсамж бий юү?

                -Намайг төрж байхад Татар хамтлаг байгуулагдаж байсан болохоор анх хийж байсан уран бүтээлүүдийг нь мэддэггүй байлаа. дунд ангид байхдаа анх “Бороо” дууг сонсож байсан. Тэр үедээ ямар гоё дуу вэ гээд үгийг нь цээжилж байлаа. Өөрөө ч үг бичиж, дуу хийх гэж оролцож эхэлсэн.

-Үзэгчид “Бусдын хайрыг хүндэл” гэх үгний утгыг ойлгуулсанд баярлалаа гэсэн байсан. Тэгвэл та энэ үгийг хэрхэн ойлгодог вэ?

                -Анх төдийлөн чухалчилж сонсож байгаагүй ээ. Зохиолоо авсныхаа дараа үг бүрийг нь ухаж ойлгосон доо. Кинон дээр Кадр “Найз чинь байснаас гөлөг чинь байгаагүй шүү” гэж хэлдэг. Хүн заримдаа эргэн тойронд байгаа хайртай хүмүүсээ санаатай, санамсаргүй байдлаар гомдоочихдог. Тиймээс манай киног өсвөр насныхан маань түлхүү үзээсэй гэж хүсэж байна. Өөрийг чинь хүрээлэх хайртай хүмүүсийнхээ хайрыг хүндэлж яваарай гэдгийг тэр гурван үгээр хэлсэн гэж боддог.

-Уран бүтээлч болох гэж байгаа залуу уран бүтээлчийн хувьд Туулайхүүгийн контентыг хийхэд тун их зориг шаардсан байх. Тус контентын талаар ярьж болох уу?

                -Эхний бөгөөд эцсийн оролцсон сонгуулийн контент байсан. Тэр контентын хийхэд гуравдугаар курсийн оюутан байсан юм. Юм болгоныг л оролдож, хийж үзсэн. Кинонд дуу оруулах, контент хийх, хүүхдийн баяраар алиалагч, сагсан бөмбөгийн тэмцээний үеэр бугын маск өмсөх гээд л. Тэр үед хийсэн контент. Гол нь хэлэх гэсэн санаа нь хүнд хүрсэн гэж бодож байна. Одоо бол оролцох уран бүтээлүүддээ цензуртэй хандаж байгаа.

-Яагаад жүжигчин болохоор шийдсэн юм бэ?

                -Жүжигчин хүн мэдрэмжид шунадаг хүн гэж боддог. Энэ мэргэжлийг сонгоход надад олон зүйл нөлөөлсөн. Багадаа зурагт их үздэг байлаа. Багадаа “Фантастик 4” киног үзэж байснаа санадаг. Супер баатар болохыг мөрөөдөж, алчуур зүүгээд буйлан дээрээс үсэрнэ. Төсөөлөлдөө бол нисэж байгаа юм. Дунд ангидаа урлагийн үзлэгээр нэг жүжгийн хэсгээс тоглосон юм. Тэр үед сэтгэл догдлуулсан, тун сонирхолтой мэдрэмж авч байсан. Өөрөөсөө өөр хүний амьдралд орчихсон ч юм шиг. Тэгээд л ахлах сургуулиа төгсөөд СУИС-д орох сонголт хийсэн дээ. Гэрийнхэн минь бүгд намайг дэмжсэн, бүгд л миний төлөө хичээсэн. Ах эгч хоёр минь СУИС-д ороход анхны хослолыг минь авч өгсөн. Төгсөлтөөрөө өмсөх хослолыг минь ч авч өгсөн. Тэр хослол минь надад их нандин учраас киноныхоо нээлтээр ч өмссөн. Эгч, ээж хоёр минь гитар авч өгч байлаа. Бүх л талаараа намайг урлагийн хүн болохыг дэмжээд байгаа хэрэг. Намайг СУИС-д ороход бэлдэж өгсөн жүжигчин Хосбаяр ахдаа их талархдаг. Хамгийн гол энэ мэргэжилд бүүр ч их дурлуулж, жүжигчин гэх мөн чанарыг таниулсан С.Болормаа багшдаа баярлалаа. Эргэн тойрныхон минь бүгд надад хартай, намайг дэмждэг, тэднийхээ хайрыг дааж явахыг л хичээдэг дээ.

-Дуучин Жагааг хамгийн их дэмждэг найз охин нь нас бардаг хэсэг байдаг шүү дээ. Тэр үеийн сэтгэл хөдлөлийг уран бүтээл дээрээ харуулах амаргүй байв уу?

                -Жагаа ах гадаадад байгаа учраас нүүр тулж ярилцаж чадаагүй. Мөөгий ах бүх л зүйлийг хэлж, түүхүүдээ ярьж өгсөн. Найз охиноо алддаг хэсгийн зураг авалтыг хийх өдөр хүнтэй юм ярихгүйгээр өөрийгөө бэлдсэн. ОБЕГ, Цагдаа гээд кино багийнхнаас гадна олон хүн оролцсон учраас дахин, дахин зураг авалт хийх боломжгүй гэж бодож, сайн жүжиглэхийг хичээсэн. Таван удаа зураг авалт хийхдээ аль болох тэр үед үнэн мэдрэмжээр тоглохыг хичээсэн.

-Танд ажиллахыг хүсдэг дүр бий юү?

                -Оюутан байхдаа тоглож үзэхийг хүссэн дүр олон байсан. Намтарчилсан киноны дүрд ажиллахын хүсдэг байснаа Татар киноны Жагаа ахын дүрд тоглохдоо биелүүллээ. Одоо бол эсрэг дүр эсвэл адал явдалт киноны дүрд тоглохыг хүсэж байна.

-Залуу уран бүтээлчийн хувиар ямар жүжигчин, уран бүтээлч байхыг хүсдэг вэ?

                -Багш минь уран бүтээлч гэж ямар байх ёстойг үлгэрлэж ойлгуулсан. Хамгийн гол нь хариуцлагатай байх ёстойг ойлгодог. Дэлхийн аль ч оронд очсон тэдний таньдаг мэддэг жүжигчин байхыг хүсдэг. Хийж чаддаг уран бүтээлч байхыг хүсэж байна.