Дэлхийн хамгийн нэр хүндтэй уран бүтээлчид, загвар өмсөгчдийн зургаар сэтгүүлээ чимдэг Harper’s Bazaar magazine-ий зураг авалтад орсон Монгол загвар өмсөгч Т.Индранилыг бид онцолж байна. БНХАУ-ын Шанхай хотод сурдаг 23 настай охин сонирхол мөрөөдлийнхөө төлөө тууштай хичээж, шантралгүй хөдөлмөрлөсөөр Gui Yang brand, Bottega Veneta, ZUGZUC тэргүүтэй брэндтэй хамтарч ажилладаг модель болжээ.

Түүний цахим хаяг: indrapil

-Танд энэ өдрийн мэнд хүргэе. БНХАУ-ын загварын шоу, зураг авалтад ордог шүү дээ. Монголд байхдаа энэ чиглэлээр ажиллаж байсан уу. Анх энэ салбарт хөл тавьж байсан үеэ дурсахгүй юу?

                -Сайн байна уу, би 14 настайгаасаа моделиор ажиллаж эхэлсэн. Фото моделиор ажиллаж эхэлсэн тухайд Playtime фестиваль дээр явж байхад зургийг минь дарж байсан. Дараа нь өөрөө дахин холбогдож, студид зураг авалт хийж байсан юм. Тэгж анх зураг авалтад орж үзсэн дээ. Тэр үеэс моделиор ажиллах чадвартайгаа мэдэж, зураг авалтад орох, моделиор ажиллах санал ирдэг болсон. Монголд оролцож байсан хамгийн том зураг авалт нь Matrix салоны 20 жилийн ойн баярт зориулсан зураг авалт байсан. тэр үед анх удаа Монголынхоо топ моделиуд, шилдэг уран бүтээлчидтэй хамтарч байлаа. Мөн анх удаа төсөөлж байснаасаа ч өндөр цалинтай ажиллаж байсан. Өөрөөрөө үнэхээр их бахархаж билээ.

-Тэгвэл БНХАУ-д хэзээнээс ажиллаж эхэлсэн юм бэ?

                -Би Шанхай хотод ирээд бараг гурван жил болж байна. Анх удаа гэрээсээ хол, удаан хугацаагаар сурахаар явсан болохоор эхэндээ орчиндоо дасах гэж их хичээсэн дээ. Багаасаа л олон төрлийн зүйл туршиж үздэг байлаа. 14 настайгаасаа Viviana гэх урланг нээж гар урлалын зүйл зарж, халаасны мөнгөндөө нэмэрлэдэг байлаа. Гэрийнхнээсээ халаасны мөнгө авахгүйгээр өөрөө бүгдийг болгохыг хичээнэ. Урлангаараа дамжуулж бүтээгдэхүүнээ борлуулна, төрөл бүрийн цагийн ажил хийдэг байсан. Гэтэл Шанхайд гадаад оюутан болохоор төдийлөн цагийн ажил хийж чадахгүй, гэрийнхний минь явуулдаг хэрэглээний мөнгө бага биш ч хүрэлцэхгүй байсан. Энд ирсэн зорилго минь сурах учраас хичээлдээ шамдахын хажуугаар дуртай зүйлээ хийхийг хүссэн учраас моделийн агентлагуудтай холбогдож, ажлын ярилцлагад орсоор байсан ч нэг жилийн турш татгалзсан хариу л авсан. Шантармаар байсан ч “Би л хангалттай хичээхгүй байна. Илүү хичээх хэрэгтэй” гэж өөрийгөө зоригж, хичээсээр одоогийнхоо агентлагт сонгогдож, амжилттай ажиллаж байгаа.

-Загварын салбарт дуучин, жүжигчин, загвар өмсөгчид гээд энэ салбарт ажиллах хүн олон шүү дээ. Тэднээс онцгойрч Harper’s Bazaar сэтгүүл дээр гарна гэдэг том амжилт. Сэтгүүл дээрээс өөрийгөө харахад ямар мэдрэмж төрсөн бэ?

                -Агентлагт орсныхоо дараа Samuel Gui Yang brand-ийн загварын тайзнаа алхаж, Bottega Veneta- ийн сурталчилгаанд жүжигчин Shu Qi-тэй хамтарч ажиллаж, загварын салбарт тун амжилттай хөл тавьсан. Шанхайд моделиор ажилласан энэ жилийн хугацаанд алдарт Harper’s Bazaar сэтгүүлийн зураг авалтад оролцсон маань үнэхээр том амжилт байлаа. Анх удаа ХонКонг руу явж, нэр хүндтэй сэтгүүлийн зураг авалтад орно гэдэг миний хувьд үнэхээр том амжилт. Энэ хүртэл тууштай, хүчтэй байж, шантралгүй мөрөөдлийнхөө төлөө хичээсэн болохоор өөрөөрөө үнэхээр бахархаж, талархсан.

-БНХАУ-д загварын чиглэлээр ажиллахын давуу болон сул талынх нь талаар ярихгүй юу?

                -БНХАУ-д ажиллаж, амьдахад үнэхээр амар, тухтай, тайван санагддаг. Бүх зүйл нь бэлэн, гар утас байхад л хүссэн бүхнээ хийнэ. Сайн хамгаалалт, өндөр хөгжилтэй орон учраас ганцаараа амьдрахад, бусад хотууд руу ажиллахаар явахад ч төдийлөн айж, санаа зовдоггүй. Ганц сул тал нь хятадуудад Монголын талаарх ойлголт дутмаг байдаг юм шиг санагддаг. Би зургаан настайгаасаа хятад хэл сурсан болохоор чөлөөтэй ярьж чадна. Бас ази төрхтэй учраас заримдаа намайг хятад хүнтэй андуурдаг. Хаанаас ирснээ хэлэхээр заримдаа Монголын талаар мэддэггүй. Өвөрмонголтой андуурна, заримдаа Монгол Улсын Хятадын нэг хэсэг байсан гэх мэтээр ярьж эхэлдэг. Тэр бүрд нь тайлбарладаг байсан ч сүүлдээ энэ сэдвээр ярихаас зайлсхийх болсон. Гэхдээ моделиор ажиллаж байхдаа Монгол Улсаас ирсэн гэдгээ бахархалтай хэлж, эх орныхоо хамгийн сайхан бүхнийг магтан ярьж, соёлоо хуваалцдаг.

-Загвар өмсөгчийн ажлын хамгийн сайхан зүйл нь юу вэ?

                -Миний хувьд энэ ажлын хамгийн сайхан зүйл нь өөрийгөө нэр хүнтэй брэндүүдийн вэбсайт, сурталчилгааны самбар, цахим сүлжээн дээрээс харах байдаг. Өөрийнхөө зургийг хараад “Би үнэхээр чадаж байна, янзтай байна. Илүү хичээгээрэй” гэж урамшуулах дуртай. Тэгээд дараагийнхаа ажил руугаа инээмсэглээд алхах хамгийн сайхан.

-Таны дараагийн зорилго, төлөвлөгөө юу вэ?

                -Би моделиор ажиллахынхаа хажуугаар, график дизайнерын мэргэжлээр суралцаж байгаа. Өөрөө урлаг талдаа нэлээн сонирхолтой, зураг зурна, баримал урлана, дуулна, шүлэг бичнэ дүрс бичлэг хийнэ гээд урлаж, бүтээх дуртай. Үүнтэйгээ уялдуулаад тус мэргэжлийг сонгосон. Сургуулиа төгссөнийхөө дараа дэлхийгээр аялаад дараа нь интерьер дизайнер эсвэл загвар зохион бүтээгчээр мэргэшиж ажиллах төлөвлөгөөтэй байна. Ирээдүйд моделийнхоо чадварыг илүү хөгжүүлж, дэлхийн шилдэг брэндүүдийн нүүр царай нь болохыг хүсэж байна. Мөрөөдөлдөө хүрэхийг тулд илүү тууштайгаар ажиллаж, хичээх болно оо.