Хөгжилтэй, сургалтай бичлэгээрээ үзэгчдийн танил болсон "Дииииид" продакшны дэлгэцийн анхны бүрэн хэмжээний уран бүтээл болох “Мөнгөний дүрэм” кино есдүгээр сарын 1-нд нээлтээ хийх билээ. Тус продакшны жүжигчин Э.Ариун-Эрдэнэтэй ярилцлаа.

-Танд энэ өдрийн мэнд хүргэе. “Мөнгөний дүрэм” шинэ уран бүтээл нь тун удахгүй нээлтээ хийх гэж байна. Сэтгэгдлээсээ хуваалцахгүй юу?

                -Та бүхэндээ энэ өдрийн мэнд хүргэе. Айдас, сандрал, догдлол давхцаад нэлээн түгшүүртэй өдрүүдийг өнгөрүүлж байна. Бид контент хийж гурван жил цуглуулсан мөнгөөрөө энэхүү уран бүтээлийг хийсэн. Бүгд л сэтгэл зүрхээ зориулсан гэхдээ мөнгө гэдэг зүгээр л тоо юм байна лээ. Киноны зураг авалт үргэлжилж байхад бид байгаагаасаа байхгүйг нь хүртэл бүхнээ шавхсан даа. Тийм ч учраас одоо бидэнд алдах эрх байхгүй. Сайн уран бүтээл болсон гэж бодож байгаа. Гэхдээ үүнийг хамгийн зөв шүүх хүмүүс нь үзэгчид гэж бодож байна.

-Уран бүтээлчийн хувьд “Мөнгөний дүрэм” уран сайхны киногоороо үзэгчдэд юу хүргэхийг зорьсон бэ?

                -Бидний уран бүтээлд хэлэх гэсэн гол нэг санаа байгаа. Үүнийг одоо хэлэхэд арай эрт болов уу. Үзэгчид маань үзээд өөрсдийнхөөрөө шүүх байх.

-Анх продакшн нь хэрхэн нэгдэж байсан юм бэ?

                -Анх Э.Тодбаяр, Ж.Ямаранз, Г.Билгүүн бид дөрөв оюутан байхаасаа найзалсан, нэг ангийнхан. Н.Болдбаатар манай доод курсийн дүү байсан юм. Продакшны маань эрчүүд оюутан байхаасаа контент хийж эхэлсэн. Мундаг найзуудтай гэдгээрээ үргэлж бахархаж, гангарч амьдардаг даа. Анх найзуудынхаа зарим бичлэгт оролцдог байсан юм. Дараа нь “Дурсамж” гэсэн хуудас нээгээд хуучин дуутай холбоотой дурсамжуудыг сэргээх зорилготой бичлэг хийж байгаад бүр хамт ажиллах болсон доо.

-Хамтдаа хийсэн анхны бүрэн хэмжээний уран бүтээл учраас туршлага дутах зүйл байсан байх. Эсрэгээрээ залуус учраас зоригтойгоор олон шинэ зүйлсийг туршиж үзсэн байх даа. Уран бүтээлээ өөрсдөө үзэх ямар байсан бэ?

                -Мэдээж бид залуу хүмүүс учраас туршлага бага байсан. Алдаа, дутагдал байгаа ч бидэнд итгээд дэмжиж, хамтарч ажилласан уран бүтээлчид болон кино багийнхан, арын албаны хүмүүсээсээ их зүйл сурч авсан даа. Бидэнд олон зүйл зааж, ойлгуулсан багийнхандаа баярлалаа. Киноныхоо эвлүүлгийн анхны хувилбарыг үзээд найзуудаараа бахархаж, аархал төрсөн. Бид төсөөлж байснаасаа илүүг чаджээ гэсэн бодол төрж, өөрийн эрхгүй уйлсандаа.

-Яагаад жүжигчин болохоор шийдсэн юм бэ, юу нөлөөлөв?

                -Багаасаа дуу хөгжимтэй их ойрхон өссөн. Гэхдээ ерөнхий боловсролын сургуульд байхдаа спортын, эршүүд хүн байсан. Одоо бол арай эмэгтэйлэг болсон байгаа нь энэ. Төгсөх ангийн урлагийн үзлэгээр жүжигчилсэн тоглолт хийж байсан юм. тэр үед хүүхдээ алдсан ээжийн дүрд тоглож байлаа. надад зориулж алга ташиж байгаа чимээ, тэр үед авсан мэдрэмж надад үнэхээр сайхан санагдсан учраас спортыг орхиод жүжигчин болохоор шийдсэн дээ. 

-Өөрийнхөө тоглосон кино, контентыг үзэх ямар байдаг вэ?

                -Анх их эвгүй байдаг байсан. Одоо бол арай дасчихсан. Өөрийнхөө тоглосон бүтээлийг үзэхдээ өөрийнхөө алдааг хайж, илүү сайжруулах талаар л боддог доо.

-Гэр бүл нь жүжигчин болно гэхэд нь хэрхэн хүлээж авсан бэ. Дэмждэг үү?

                -Гэр бүлийнхэн минь намайг үнэхээр их дэмждэг. Гэхдээ мөнгөөр бус хайр, урмын үгсээр. Цаг, минут бүрд дэмждэг гэрийнхэндээ баярлалаа. Хамаатнууддаа ч маш их баярладаг. Кино эхлэхийн өмнө ээж минь хагалгаанд орсон юм. Тэр үед “Миний дүү ажилдаа яв. Ээжийг нь бид нар сайн харж байна” гээд явуулсан. Тэр үед ямар их баярлаж байгаагаа хэлж чадаагүй ч үнэхээр их талархсан шүү. Та хэдийнхээ итгэлийг алдалгүй, ачийг нь нэг өдөр хариулна аа, дүү нь.

-Продакшныхаа ганц эмэгтэй жүжигчин байх ямар  байдаг вэ?

                -Эрчүүдтэй ажиллах тун амар санагддаг. Алдаа гаргавал шууд л нүүрэн дээр хэлнэ. Анх хүмүүсийн намайг муулж байгаа сэтгэгдлүүдийг уншаад сэтгэлээр унадаг байлаа. Тийм үед найзууд минь их урам өгч дэмжинэ “Битгий тоо” гэх үгийг тун олон хэлсэн дээ. Одоо бол тэр бүр тоохгүй ээ. Продакшныхаа ганц эмэгтэй байх заримдаа гоё ч амаргүй үеч бий. Шантрах, гутрах, өөрийгөө голох үе бий. Тэр бүрд дэргэд минь хамт байж дэмждэг, надад хир халдааж үзээгүй, хайрладаг найзууддаа баярлалаа. Энэ дашрамд найзууддаа хайртай шүү, золигууд минь та хэд байгаа учраас өнөөдрийн би байгаа шүү.

-Танай продакшныг нэгтгэдэг зүйл юу вэ?

                -Миний хувьд бид яг л нэг гэр бүл юм шиг санагддаг. Нэгнийгээ нэг өдөр ажилдаа ирэхгүй бол санаа зовно, бодно, ярина. Хамгийн гол нь биднийг мөрөөдөл минь нэгтгэдэг. Цаашид ч олон зүйлийг хамт туулж, бүтээх болно оо.

-Таны болон продакшных нь дараагийн зорилго юу вэ?

                -Олон зүйлс бий. Тэр бүр цаг хугацааны аясаар мэдэгдэх байх.