АНУ-ын “Towson Univercity”-д тэнцэж, волейболын багтай нь гэрээ байгуулж, Монгол Улсаас “NCAA”-ийн түвшинд волейбол тоглохоор болсон анхны тамирчдын нэг С.Тэмүүлэнтэй ярилцлаа. Тэрбээр Монгол Улсын шигшээ багийн тоглогч бөгөөд Хилчин багийн тамирчин юм.

-Танд энэ өдрийн мэнд хүргэе. АНУ-ын “Towson Univercity”-д тэнцэж, волейболын багтай нь гэрээ байгуулсанд баяр хүргэе. Сэтгэгдлээсээ хуваалцахгүй юу?

                -АНУ-ын “Towson Univercity”-аас суралцах, багт нь тоглох урилга авсан. Үгээр хэлж барамгүй сайхан байна. Сургуульдаа явна гэхээс доголж байгаа.  Олон сургуультай ярилцсаны элсэлт тус сургуульд 100 хувийн тэтгэлэгтэй суралцахаар болсон. “NCAA”-ийн түвшинд тоглодог сагсчид байдаг ч волейболын тамирчин байдаггүй юм билээ.

-Сургуульдаа тэнцэж, багтай нь гэрээ байгуулах болсон мэдээгээ хэзээ сонссон бэ, тэр үеийн сэтгэл хөдлөлөөс хуваалцвал?

                -Сургуульдаа орох үе шат нь нэлээн удаан үргэлжилдэг юм билээ. Хоёрдугаар сараас эхлэн сургуулиудтай ярилцаж байгаад тавдугаар сарын сүүлээр “Towson Univercity”-тай гэрээгээ хийж, албан ёсоор элсэж, багийнхаа нэг хэсэг болсон. Тэр үед айсан, догдолж, сандарсан, үгээр хэлэхийн аргагүй их баярласан. Хилчин багийн маань Б.Мишээл адилхан нөхцөлөөр сурч, тоглох гэж байгаа.

-Баярт мөчийг нь гэр бүл, багш, багийнхан нь хуваалцсан байх. Тэд хэрхэн хүлээж авав?

                -Гэр бүлийнхэн минь их баярласан. Багш минь сайн зөвлөгөө, өгч чадвараа илүү сайжруулаад ирээрэй гэсэн. Багийнхан, найзууд минь бүгд баярт мөчийг минь хуваалцаж, сайн сайхан бүхнийг хүссэн дээ.

-АНУ-ын “NCAA”-ийн түвшинд волейбол тоглох анхны монгол тамирчин болж байгаа юм билээ. Баярлахаас гадна үүрэг хариуцлага мэдэрч байгаа байхдаа?

                -“NCAA”-ийн түвшинд волейбол тоглох анхны тамирчид нь Б.Мишээл бид хоёр болж байгаа. Цаашид монгол тамирчдыг илүү дээд түвшинд тоглоход нь чухал үйл явдал учраас хариуцлагатай байж хичээх хэрэгтэй. Монголд чадвартай, авьяастай, тууштай, хариуцлагатай тамирчид байдгийг харуулахыг хичээнэ.

-Гадаад улсын тамирчидтай нэг баг болж бэлтгэл хийж, тоглолтод оролцоно шүү дээ. Тэднээс юу сурч авахыг хүсэж байна?

                -АНУ-ын “NCAA”-д олон орны тамирчид тоглодог юм шиг санагддаг. Баг болгон өөр тоглолтын хэв маяг, техниктэй. Ази тамирчид цөөн учраас илүү хүчний волейбол тоглодог. Бусад орны тоглогчдын тоглолтын арга барил, ур чадвар, техник, хувийн зохион байгуулалт, бэлтгэлээс нь суралцахыг хичээнэ.

-Волейболын спортоор хичээллэж эхэлсэн үеийнхээ талаар ярихгүй юу. Яагаад тус спортыг сонгох болов, юу хамгийн их нөлөөлсөн бэ?

                -Волейболын спортоор есдүгээр ангиасаа эхлээд хичээллэж эхэлсэн. Ээж минь волейболын мастер. Намайг бага байхаас эхлээд спортоор хичээллүүлэх гэж их хичээдэг байсан. Тэр үед төдийлөн сонирхдоггүй байсан ч наймдугаар ангид байхдаа “Монгол туургатан” гэх тэмцээнийг үзэж байгаад шигшээ багийн тамирчдын дийлэнх нь Хилчин багийнх байхыг харчхаад “Хилчин” багт ороох юм бол ийм гоё тэмцээнд орж болох юм байна гэж ойлгоод анх “Хилчин” багтаа элсэж байсан.

-Багаараа оролцсон анхны тэмцээн нь хэзээ байв. Тухайн үеийн мэдрэмжээсээ хуваалцвал?

                -Анхнаасаа хичээллэсэн баг минь Хилчин. Багийнхан маань дандаа 4-5 жил хичээллэчихсэн хүүхдүүд байсан учраас дандаа сэлгээд суудаг байлаа. 2017 оны өсвөрийн аварга шалгаруулах тэмцээнд ороод үеийнхээ хүүхдүүдийн чадварыг хараад өөрийгөө чамлаж, илүү хичээж эхэлсэн.

-Волейболын спортыг өөрийнхөө тодорхойлбол?

                -Волейболын спорт миний хувьд амьдралтай тун ойрхон спорт юм шиг санагддаг. Гаргасан алдаа бүр айлд оноо болж очдог. Өөрсдөө хичээж, талбай дээр байгаа зургаан хүн хамтдаа баг болж тоглож байж оноо авч, ялалт байгуулдаг. Хүнд олон зүйл ойлгуулж чаддаг спорт гэж боддог.

-Хамгийн дурсамжтай тэмцээн гэвэл ?

                -Намайг есдүгээр ангиасаа Хилчин багт орсноос хойших нэг үеийн тамирчид багаараа Үндэсний дээд лигт тоглож үзсэн. Эхэндээ сандарсан ч өөрийгөө чөлөөлж, өөрийнхөө арга барилыг олж байсан. 18-19 насны хүүхдүүд анхны дээд лигийн тэмцээнд тоглоод аварга болох мэдрэмж үнэхээр гайхалтай байсан. Одоо ч тэр тоглолтыг үргэлж санадаг.  

-Заал дүүрэн үзэгчдийн алга ташилт, халуун энерги дунд тоглох мэдрэмж ямар байдаг вэ?

                -Үнэхээр сайхан. Тоглолтын эрч хүчийг үзэгчид маань л өгдөг юм. Хөгжөөн дэмжигчид сайн байвал тамирчид илүү сайн тоглодог юм шиг санагддаг.

-Тоглолтын үеэр сэтгэл зүйгээ хэрхэн бэлтгэдэг вэ?

                -Тоглолтын өмнө аль болох эерэг зүйл бодож, сэтгэл зүйгээ тайван байлгахыг хичээдэг. Хэтэрхий хариуцлага үүрч, их юм болдох юм бол өөрийгөө хүчлээд байгаа юм шиг санагддаг. Өөрийгөө тайван байлгаж өөрийнхөө тоглолтод анхаарч тоглодог.

-Энэ спортоор хичээллэж байгаа хүүхдүүдэд зөвлөгөө өгч, туршлагаасаа хуваалцвал?

                -Спортоор хичээллэж байгаа хүүхдүүдийг тууштай байгаасай гэж хүсдэг. Тууштай байвал амжилт хүлээж байдаг. Мөн хаана, ямар багш дээр хичээллэх нь тун чухал. Хэзээ ч өөрийгөө голж болохгүй, өөрийгөө хурцалж, сайжруулж байгаарай. Гадаадын багт тоглохыг хүсэж байвал хэзээ ч  хичээл, сургуулиа хойш нь тавьж болохгүй, тэнцвэртэй авч явах хэрэгтэй.

-Энэхүү спортоор хичээллэж эхлэхдээ өөртөө тавьж байсан зорилго мөрөөдөлдөө хүрсэн үү. Дараагийн зорилго юу байгаа вэ?

                -Анх хичээллэхдээ хүрэхийг хүссэн өндөрлөг байгаагүй. Гэхдээ хэзээ ч АНУ-ын оюутны лигт тоглохоор явна гэж төсөөлөөгүй. Нэгэнт тоглож байгаа юм чинь гээд өөрийгөө хаяхгүй. Очоод чадах бүх зүйлээ хийнэ, олон зүйл сурна. Хоёр жил АНУ-ын оюутны лигтээ тоглож байгаад Хилчин багтаа эргэн ирж, дээд лигийн аварга авахыг хүсэж байна.

-Ярилцлага өгсөн танд баярлалаа, амжилт хүсье.

                -Баярлалаа.