“4-тэй”, “Шөнийн хот”, “Baby boo” тэргүүтэй дуугаараа сонсогчдын анхаарлыг татаад буй залуу уран бүтээлч Megone-тэй ярилцлаа.

-Энэ өдрийн мэнд хүргэе. Таны “4-тэй” дуу цахим сүлжээнд хит болж байгаа шүү дээ. Тус уран бүтээлийнхээ талаар ярихгүй юу?

                -Анх тэгж сайн хүмүүст хүрнэ гэж бодоогүй ээ. Tiktok дээр нэлээн сайн хандалт авсан байна лээ. Yotube дээр өөрийнхөө хаягаас нийтэд хүргэсэн анхны уран бүтээл. Өмнө нь, найзуудынхаа сувгаар дамжуулж дуу гаргаж байсан. Хүмүүст сайн хүрч байгаад нь баяртай байгаа.

-Тус уран бүтээл таны анхны уран бүтээл шүү дээ. Анхны дуугаа цахим сүлжээнд хуваалцах үеийн мэдрэмжээсээ хуваалцахгүй юу?

                -Дуугаа нийтэд хүргэхдээ олон зүйл бодож, төсөөлөөгүй ээ. 1000-2000 хүн л сонсох байх гэж бодсон. Их хүлээлт тавиагүй ч сайн хүмүүст хүрсэнд баяртай байгаа.

-Siente-тэй хамтарсан Baby boo дууны талаар ярихгүй юу хэдхэн хоногийн өмнө гарсан ч хүмүүсийн сонсох дуртай дуу болсон байна. Туршлагатай уран бүтээлчтэй хамтрах  ямар байв?

                -Уран бүтээлч Siente анх дуу хийж эхэлсэн үеэс нь сонсдог, мэддэг байсан. Ах хамтрах санал тавьж, 2-3 дуу явуулсан. Хамгийн их таалагдсан дуун дээрээ үг, хоолойгоо явуулаад нөгөөдөр нь дүрс бичлэгээ хийсэн. Тун шуурхай ажилласан, Хамтарч ажилласанд баярлалаа.

-Baby boo дуун дээр “40 давхар дөрвөн цайз” гэсэн мөр байсан л даа. Дөрвийн тоонд тийм дуртай хэрэг үү?

                -Тодорхой, гүнзгий утга байхгүй ээ. Хайраа илэрхийлэхдээ мөр холбосон л тохиолдол юм. “Би чиний төлөө ийм их зүйлийг ганцаараа хийж чадна” гэсэн утгатай.

-Таны тайзны нэр тун содон юм. Яагаад Megone гэж нэрлэсэн юм бэ?

                -Megone гэдэг нэрийн утга нь Me gone буюу нэг л өдөр байхгүй болно гэсэн үг.

-Хэзээнээс уран бүтээлч болно гэж боддог болсон бэ. Зорилгодоо хүрсэн сэтгэгдэл ямар байна?

                -Дунд ангид байхдаа л хөгжим ямар гоё болохыг ойлгосон. Найз маань найз охиндоо зориулж дуу хийхээр шийдсэн юм. Тэгээд манай гэрийн орцны хамгийн дээд давхарт нь гарч байгаад youtube-ээс ая тавиад дууны шүлэг бичих гэж оролдсон. Хөгжим хийнэ гэж бодож байгаагүй зүгээр л сонсогч байсан хүүхдэд тэр үеийн мэдрэмж үнэхээр сайхан байсан. Түүнээсээ хойш тасралтгүй дуу хийдэг болсон. Бага багаар сайжирсаар л байна. Эргэн тойрны дуу хийдэг хүмүүс надад их нөлөөлсөн дөө.

-Залуу реппер, артистууд олон болсон шүү дээ. Тэднээс юугаараа онцгойрохыг хүсдэг, юу нь илүү онцгой байдаг бол?

                -Зарим уран бүтээлчдийн хийж байгаа хөгжим жаахан хуучирсан юм шиг санагддаг. Бүгд биш ч тодорхой хэсэг нь. Миний хувьд урлагийг өдөр бүр шинэчлэгдэж, дэвшиж байх ёстой зүйл гэж боддог. Шинэ төрлийн зүйлсийг туршиж, шинэчлэхийг эсвэл Монголд хараахан орж ирээгүй байгаа жанраар уран бүтээл хийж үзэх эрмэлзэл бий. 

-Уран бүтээлүүдээсээ сонсогчдодоо онцолж санал болгох дуу бий юү?

                -Хэдхэн хоногийн өмнө Gvnsor, Choirayung хоёртой хамтраад “Шөнийн хот” гэсэн уран бүтээл гаргасан. Тэр дуугаа хүмүүст санал болгоно.

-Дуу хөгжим таны хувьд юу вэ?

                -Миний амьдралд тун чухал байр суурь эзэлдэг. Амьдралын нэг хэсэг.

-Амьдралаас юуг чухалчилдаг вэ?

                -Өдөр бүр цаг минут бүрийг үр бүтээлтэй, аз жаргалтай өнгөрүүлэхийг хичээдэг дээ.

-Дууныхаа үгийг өөрөө зохиодог шүү дээ. Дуугаараа дамжуулж юу илэрхийлэхийг зорьдог вэ?

                -Тухайн дууг хийж байх үедээ мэдэрсэн миний сэтгэл хөдлөл, сайхан зүйлсийг сонсогчид минь ч гэсэн мэдэрч байгаасай гэж хүсдэг. Мэдүүлэхийг хичээдэг.