Тун удахгүй нээлтээ хийх “Тусгал” олон ангит киноны Азаагийн дүрд тоглосон залуу жүжигчин Э.Анутай ярилцлаа. Тэрбээр СУИС-ийн Театрын урлагийн сургуулийн төгсөх курсийн оюутан билээ.

-Танд энэ өдрийн мэнд хүргэе. Кино нь удахгүй нээлтээ хийх гэж байгаа шүү дээ, догдлол дүүрэн байна уу

                - Догдлол дүүрэн байна, надаас илүү гэрийнхэн минь нээлтийн өдрийг хүлээж байгаа. “Тусгал” олон ангит кино миний анхны дэлгэцийн уран бүтээлийн дүр учраас бүх шинэ сонирхолтой байсан. Мөн олон зүйл сурсан адал явдлаар дүүрэн аялал байлаа. Хэдийгээр туршлага дутаж мэдэхгүй, чадахгүй зүйл олон байсан ч кино багийн ах эгч нар минь намайг дэмжиж байсан учир тайван тухтай ажиллах боломжтой байсан. Кино багийнхныхаа ачаар  ямар ч хүнд хэцүү нөхцөлийн зураг авалтыг даваад гарсан. Дэндүү хөгжилтэй, жаргалтай үеийг өнгөрүүллээ дээ. Залуу уран бүтээлчийн хувьд үнэхээр үнэ цэнтэй мөч.

-Олон ангит кинонд ажиллах ямар байв, киногоороо дамжуулж уран бүтээлчид юу хүргэхийг зорьсон бол?

                -Олон ангит кино гэдэг тун урт хугацааны ажил байдаг. Тус уран бүтээлийг хийх санаа дөрвөн жилийн өмнө гарсан юм билээ. Уран бүтээл болох хүртлээ дөрвөн жил хөгжүүлэлт хийж сайжруулсаар өнгөрсөн жилийн өдийд зураг авалтаа хийж эхэлсэн дээ. Монголд өсвөр насныхан болон залуучуудад зориулсан уран бүтээл хомс байдаг юм шиг санагддаг. Тэдний хувьд сэтгэл зүй гэр бүл найз нөхөд хичээл, сургууль гээд насанд хүрсэн хүмүүсээс дутахааргүй олон асуудал дотроо тээж байдаг. Энэ бүгдийг тод томруунаар харуулахыг зорьж ажилласан. Нас биед хүрсэн хүмүүсийн мэдэрдгийг тэд ч ялгаагүй адилхан мэдэрч байдгийг, өсвөр нас бол хүүхэд биш хувь хүн болохоор төлөвшиж байгаа хүний амьдралын маш эгзэгтэй эмзэг үе гэдгийг харуулахыг зорьсон.

-Та зохиолоо уншихдаа дүрээ хэрхэн төсөөлсөн бэ, төсөөлснөө бодит болгоход хамгийн хэцүү байсан зүйл нь юу байв

                -Киноны нэгдсэн уншлага дээр Азаагийн дүрийг анх төсөөлөхдөө хөнгөн хийсвэр, хурц тод зан араншинтай бүхнийг мэддэг, чаддаг гэж өөртөө барддаг арван жилийн жаахан хүүхэд л гэж төсөөлсөн. Дотроо бий болгосон дүрээ гаргахад  миний хувьд жүжигчний уран чадвар болох хэм хэмнэл нэгэн хэвийн явах эсвэл заримдаа хэтрүүлэх тоглолт гаргаж байсан санагддаг. Өөрийнхөө бодсоноор тоглоод дараа нь монитор дээр хараад л өөрийгөө голох дутуу мэдрэгдэх үе байдаг юм билээ. Явцын дунд учраа олж, харц болон үйлдлийн тоглолтынхоо уялдааг ойлгож эхэлсэн. Цаашид илүү их туршлага хуримтлуулж сурч мэдэх хүсэл тэмүүллээр дүүрэн байна. Мэдлэг чадварт хязгаар гэж байдаггүй гэдэг шүү дээ.

-Анхны уран бүтээл гэсэн шүү дээ. Дүрийн санал ирэхэд хэрхэн хүлээж авсан бэ, хамгийн их эмээсэн зүйл нь юу байв?

                -Анх Солонгос Улсад байхад найруулагч маань холбогдож киноны талаар хэлсэн л дээ. Киноны саналыг их догдол хүлээж авсан. Учир нь, “FILMAX” продакшны ах нартаа үзэгчийн болон оюутны хувиар их бахархаж бас итгэдэг тул чанаргүй дэбүт лав болохгүй байх гэж бодож байсан. Хийхээсээ өмнө эмээж байгаагүй ч зураг авалтын явцын дунд өөртөө сэтгэл дундуур тоглох үе байсан. Тэр үеүдэд жаахан сэтгэлээр унасан. Тэгээд илүү сайн уран бүтээл гаргахын тулд найруулагч зураглаачдаа дахиад нэг, дахиад нэг хэлдэг байсан.

-Анхны уран бүтээл нь олон ангит кино байсан нь илүү их чадвар, тэвчээр шаардсан уу?

                -Монголд ирснийхээ дараа найруулагчтайгаа уулзаад удаагүй байтал миний бие гэнэт өвдөж яаралтай хагалгаанд орсон. Намар хичээл орох болчхоод байдаг. Бие дээрдэж өгөхгүй онош нь олдохгүй дахин хагалгаанд орно гээд л тун асуудалтай үе таарсан. Яг тэр үед эмнэлгийн орон дээр байхдаа олон зүйл бодсон. Сэтгэл санаа ч их хүнд байсан. Яг тэр үед киноноос холбогдож Азаагийн дүр дээр явахаар болсон шүү гэж билээ. Үнэхээр хүсэж байсан болохоор хагалгаанд орсон талаараа тэр үедээ хэлээгүй ээ. Тэр үед намайг дэмжсэн гэр бүл, багш, ангийн хамт олон, найз нартаа болон хичээл сургууль, биеийн байдлыг маань ойлгосон киноны хамт олондоо талархаж байна.

-Яагаад жүжигчин мэргэжлийг сонгох болов. Юу хамгийн их нөлөөлсөн юм бэ?

                - Ээж маань намайг залж чиглүүлж  урлагийн мэдрэмжийг минь хөгжүүлж олон дугуйланд тууштай явуулсан. Намайг энэ хүртэл өдий зэрэгтээ хүргэсэн хүн бол миний ээж. Миний хувьд ухаалаг, энэрэнгүй супер эмэгтэй. Энэ дашрамд “Ээждээ хязгааргүй их хайртай шүү, таны бахархалт охин байхын төлөө хичээж амьдрах болно” гэж хэлмээр байна.

-Ажиллахыг хүсдэг дүр бий юү?

                - Яг л “Notebook” кино шиг романтик драм кинонд тоглохыг их хүсдэг. Залуу насаа мөнхөлж хүн бүрийн мэддэг дурлалт бүсгүйн дүрд ажиллах мөрөөдөлтэй.  Мөн “Swan Lake” киноны Нинагийн дүр шиг триллер кинонд тоглохыг хүсдэг. Театрын тайзанд би маш их хайртай. Миний мөрөөдлийн дүр бол Жульетта. Залуу хүн учраас санаж явахад боломж олдоно гэж боддог. Харин боломж олдвол хэзээ ч алдахгүй. 

-Залуу уран бүтээлчийн хувиар ямар жүжигчин, уран бүтээлч байхыг хүсдэг вэ

                -Хэн бүхэн л мэргэжилдээ үнэнч, эзэн нь байхыг хүсдэг байх. Би ч мөн адил.

Таны дараагийн зорилго, төлөвлөгөө юу вэ?

                -Илүү их аялж, ертөнцийг таньж мэдэж, мэдрэмжээ хөгжүүлэхийг хүсэж байгаа.