Онцгой байдлын алба хаагчдын ажил, тэдний эр зориг, итгэл үнэмшлийн талаар өгүүлэх “Халуун бороо” уран сайхны кино үзэгчдэд хүрч байгаа билээ. Тус киноны жүжигчин Э.Ууганболортой ярилцлаа.

-Танд энэ өдрийн мэнд хүргэе. Манай уншигчдад өөрийгөө танилцуулаад яриагаа эхлэх үү?

           -Сайн байна уу, Намайг Эрхэм-Ундрахын Ууганболор гэдэг. СУИС-ийн Театрын урлагийн сургуульд Б.Отгонбат багшийн удирдлага дор сурдаг. Өөдрөг зантай, дүрээ амь шигээ хайрладаг нэгэн. Урлаг бол миний хувьд амьсгал. Би тоглосон дүрээрээ дамжуулж хүний сэтгэлийн хамгийн анир чимээгүй буланг хүртэл илэрхийлэхийг эрмэлздэг. Анхны уран бүтээл маань “Милл” кино компани “Халуун бороо” УСК киноны сэтгүүлч Нандингийн дүр байлаа.

-Онцгой байдлын алба хаагчийн жаргал, зовлонг харуулсан “Халуун бороо” кинонд тоглолоо шүү дээ. Сэтгэгдлээсээ хуваалцахгүй юу?

           -Кинонд ажилласан цаг мөч бүр миний амьдралын эргэлтийн цэг байж чадсан. Амьдралын бодит үнэнтэй нүүр тулгарсан юм шиг санагдсан. Онцгой байдлын алба хаагчдын ажил бол зүгээр нэг мэргэжил биш амь өрссөн тангараг, өдөр бүр үхэлтэй зэрэгцэж алхдаг эр зоригийн илэрхийлэл юм билээ. Тэдний дэргэд байхад “Би чинь кинонд тоглоод байна уу, юу болоод байна” гэж гайхах үе олон байлаа. Алба хаагчдын хийж байгаа бүхний цаана тэсвэр хатуужил, уужуу ухаан, нөхөрлөлийн дулаан уур амьсгал оршиж байдгийг хажуугаас нь харж, зүрхээрээ мэдэрсэн. “Халуун бороо” УСК минь алба хаагчдын хариуцлага, эр зориг, тэвчээр, нөхөрлөл, хүний амь аврахын төлөөх тулааныг  харуулсан уран бүтээл. Миний хувьд энэ бүтээл жүжигчний замналын эхлэл байснаараа  онцгой байлаа. Одоо ингээд санахад бүх дурсамж минь үнэхээр сайхан байна. Тэдний гүйлдэх хөлийн чимээ, хүний амь аврахын төлөө цохилох зүрхийг мэдэрсэн.

-Анхны уран бүтээл нь байв уу, дүрийн санал ирэхэд хэрхэн хүлээж авсан бэ, хамгийн их эмээсэн зүйл нь юу байв?

         -Тийм ээ, миний анхны мэргэжлийн уран бүтээл. Би хөдөөгөөс хичээлдээ бэлдэх гээд хотод ирчихсэн байхад багш залгаад “Кинонд тоглох боломж байна, очоод уулзчих” гэсэн. Очихдоо их сандарч байсан ч сайхан уур амьсгалтай хүмүүс угтсан учраас хурдан тайвширч, ярилцсан. Уулзалтынхаа дараа тэнцэх эсэхээ ч мэдэхгүй байж багштайгаа яриад хэр их баярлаж байгаагаа хуваалцсан. Орой нь Нандингийн дүрд тэнцсэнээ сонсоод баярлахын зэрэгцээ хэрхэн дүрээ сайн гаргаж тоглох билээ гэж эмээсэн. Өөртөө эргэлзэж байхад багш, гэр бүл, кино багийнхан минь надад итгэж сайн ажиллах урам зориг өгсөн.

-Гал унтраах аврах албаны байранд зураг авалтаа хийсэн шүү дээ. Алба хаагчидтай хамт байж, хажуугаас нь ажлыг нь харах ямар байсан бэ?

         -Бидний хамгийн анхны зураг Амараа ах бид хоёрын хэсгээр эхэлдэг юм. Тэр хэсгийн зураг авалтыг хийх үеэр алба хаагчид гал тогоонд байсан юм. Гэтэл гэнэт галын хонх дуугарч юу болсныг ойлгоогүй байхад бүгд гүйгээд гарцгаасан. Тэдний мэргэжлийг талаарх анхны  гайхширлыг тэгж хэдхэн секундэд л мэдэрсэн дээ. Хурд, хүч, сахилга баттай байдал нь үнэхээр гайхалтай. Биднийг киноны зураг авалт хийж байхад тэд ажлаа хийж байсан болохоор бодит уур амьсгал намайг дүрээ илүү сайн гаргахад тусалсан. Онцгой байдлын байранд ер нь тэдний хажууд байхдаа яг л дүр шигээ энгийн л нэг туршлага мэдлэггүй сэтгүүлч байсан даа.

-Сэтгүүлч бүсгүйн дүрд ажилласан шүү дээ. Тус мэргэжлийн талаар хэр их судалсан бэ?

             -Сэтгүүлч хүн асуух чадвар, үнэн мэдээллийг олон нийтэд хүргэх хариуцлагатай үүргийг хүлээдэг юм билээ. Үнэхээр л мөрдөгч шиг яг хажууд нь бодит байдлаас сурвалжилга бэлтгэдэг. Тус мэргэжлийн талаар мэдээ мэдээлэл уншиж, бичлэг үзэж судалсан. Сэтгүүлчидтэй бол уулзаагүй ээ, ерөнхий өөртөө хэрэгтэй бүх мэдээллүүдийг л судалсан. Миний дүр миний уншиж судалсан шиг сайн сэтгүүлч байгаагүй ээ. Шинээр эхэлж байгаа сонгосон мэргэжлийнхээ утга учрыг ойлгож яваа туршлага нимгэн бүсгүй. Нандингийн хамгийн сайхан зан чанар тууштай нэг зүйлдээ хүрэх гэж хичээдэг, үнэнийг нэхдэг, сайн нийтлэл бичихийн төлөө гал руу орохоос ч буцахгүй эрэмгий дайчин. Хүссэн нийтлэлээ бичиж, шагнал авах мөчтэй зэрэгцэн албан ёсны сэтгүүлч болж чаддаг. Сэтгүүлчдийн нэг нийтлэлийн ард ямар их хүч хөдөлмөр эрэл хайгуул байдгийг дүрээрээ мэдэрсэн дээ.

-Эршүүд, хэлье гэснээ хэлчихдэг эмэгтэйн дүр санагдсан. Зохиолоо уншаад төсөөлж байсан дүрээ бодитоор гаргах ямар байв. Танаас хэр өөр эмэгтэй байсан бэ?

             -Зохиолоо уншаад кинон дээр л ийм юм байдаг байхдаа гэж бодогдож байсан үе бий. Гэхдээ яг ажил эхлэхээр кино гэдэг чинь амьдралаас сэдэвлэдэг шүү дээ, энэ бүгд бодит байж болох юм байна гэж бодогддог. Энгийн бүсгүйн дүрийг гаргах хэрэгтэй ч яг үнэндээ энгийн байх цагаа тулахаар хамгийн хэцүү нь санагдаж байсан. Жүжиглэж байна гэж бодож жүжиглэхээр дэлгэцээр хэтэрхий худлаа бодит биш харагддаг юм билээ. Тэгэхээр аль болох Нандингийн дүрээр амьдрахыг хичээсэн дээ. Нандин бол зоригтой эрэмгий шийдэмгий бүсгүй. Надаас өөр үү гэвэл мэдээж өөр. Гэхдээ заримдаа би Нандинг өөрөөсөө олж хардаг. Нандин бол хэн нэгнийг аврахын тулд юу ч хэлэхээс буцахгүй хүн. “Хэлэх гэсэн үгээ хийх гэсэн үйлдлээ өөрөөсөө нууж амьдрахаа боль” гэж надад хэлээд ч байгаа юм шиг санагдсан.  Дүр минь миний өмнөөс зоригтой байж өгсөн, би тэрний өмнөөс мэдрэмжтэй байж өгсөн. Бид хоёр бие биеэ бүтээсэн.

-Туршлагатай жүжигчидтэй хамтарч ажиллах залуу уран бүтээлчийн хувьд түшигтэй байсан уу?

           -Би тэднээс дүр бүтээх гэхээс илүү “дүр дотор амьдрах” гэж юуг хэлдэг вэ гэдгийг мэдэрч ойлгосон. Үнэхээр заримдаа зүгээр л тэднийг харж суухдаа тэдний ажлын арга барил, хандлага, дуугүй байхад ч дүрээ амьдруулж байдаг уран чадварыг ойлгосон. Дараа дараагийн уран бүтээл дээр минь хэрэг болох олон үнэтэй зөвлөгөө өгсөн ах нартаа баярлалаа.-“Халуун бороо” киноны уран бүтээлчид таны дүрээр үзэгчдэд юу ойлгуулахыг зорьсон бол?

            -Үзэгчдэд бол миний дүр зүгээр л асуулт асууж яваа мото унасан бүсгүй мэт харагдаж магадгүй. Гэхдээ Онцгой байдлын алба тэр тусмаа гал сөнөөгчдийн талаар хараагүй, сонсоогүй мэдээгүй анзаарах ч сөхөөгүй явдаг хүмүүсийн төлөөлөл, тэднийг холбож, ойлгуулах чимээгүй гүүр болсон дүр юм шүү. Хүний бодлыг орхиж явахаасаа илүү, тэр бодолд хөтлөгдөн зүрх сэтгэлтэй нь хамт алхдаг сэтгүүлч болсон юм аа. Тиймдээ ч миний дүр гал дундах дуут дохиог биш, дотор нь нуугдсан хүний амьд зүрхний цохилтыг сонсож чадсан ганц эмэгтэйн байсан юм шүү.

-Залуу уран бүтээлчийн хувиар ямар жүжигчин, уран бүтээлч байхыг хүсдэг вэ?

             -Гэр бүлийнхэн, багш хайртай дотнын хүмүүстээ хүндлэгдсэн хүлээлтээс нь дээгүүр байж чаддаг үнэ цэнтэй уран бүтээлч байхыг үргэлж хичээдэг. Гол нь өөртөө итгэж хүсэж байгаа цагт мөрөөдөж байгаа л бол тэрнийхээ төлөө хүрэх гэж хичээдэг, зорьдог тайз, дэлгэцийн уран бүтээлч байхыг хүсдэг.

-Ажиллахыг хүсдэг дүр бий юү?

        -Амьдралын нэгэн хэсгийн төлөөл болж хүмүүс өөрийгөө олж хараад “Нээрээ ч ингэдэг шүү” гэж бодогдуулсан дүрд тоглохыг хүсдэг. Мөн өөрөөсөө тэс өөр нэгнийг эсвэл тун адилхан нэгнийг гээд олон дүрд тоглохыг хүсдэг.

-Таны дараагийн зорилго, төлөвлөгөө юу вэ?

       -Сургуулиа амжилттай төгсөхөөс гадна өөрийгөө сорих олон дүрд тоглохыг хүсэж байна. “Халуун бороо” киног минь үзэгчид шимтэн үзнэ гэж найдаж байна. Уншигч та нартаа баярлалаа, удахгүй дахин уулзацгаая.