Улсын хүүхэд, залуучуудын театр тавдугаар сарын 9-нөөс "Ромео Жульетта" жүжгийг үзэгчдэдээ хүргэж эхлэх билээ. Тус жүжгийн Ромеогийн дүрд тоглож байгаа залуу жүжигчин Б.Түвшинбаяртай ярилцлаа.

-Танд энэ өдрийн мэнд хүргэе. "Ромео Жульетта" жүжиг удахгүй үзэгчдэд хүрч эхлэх гэж байна шүү дээ. Бэлтгэл хэр явж байна. Тун завгүй байна уу. Жүжгээ нээх гэж байгаа сэтгэгдлээсээ хуваалцахгүй юу?

                -Хүүхэд залуучуудын театрын хамт олон тав дахь уран бүтээл "Ромео Жульетта" жүжгээ үзэгчдэд хүргэхээр тун завгүй ажиллаж байна. Жүжигчид, арын албаныхан жүжгээ нээхээр сандарч, бүхнийг асуудалгүй дуусгахыг хүсэж байгаа. Айдастай, сандралтай өдрүүд үргэлжилж байна.

-Ромеогийн дүрд тоглох болсноо мэдэх ямар байсан бэ. Тухайн үед юу бодогдож байв?

                -Анх Ромеогийн дүрд тоглох болсноо мэдээд баярлахын зэрэгцээ “Би хайрыг яаж илэрхийлж чадах билээ” гэж бодсон. Надад итгэсэн  хамт олноо бодож үүрэг хариуцлагатай ажиллахыг хүссэн. Миний хувьд энэ орчлонгийн хамгийн муу муухай бүхнийг эдгээж чадах зүйл бол хайр гэдгийг жүжгээрээ харуулмаар байна.

-Өмнөх Ромео нараас чиний бүтээх Ромео юугаараа онцлог байх бол?

                -Өөрөөрөө дамжуулж гаргах Ромеогийнхоо ааш зан, үзэл бодлыг нь ямар байлгах уу гэж их бодсон. Уран бүтээл гэдэг тухайн үеийнхээ нийгэмтэй холбогддог шүү дээ. Найруулагчийн шийдэл, харуулахыг хүссэн зүйлийг л дамжуулахыг хичээж байна. Хайр гэдэг юунд ч баригдахгүй зүйл.

-"Ромео Жульетта" жүжгийг өмнө нь үзэж байсан уу, тухайн үед ямар мэдрэмж төрж байв. Тэр үд хэн Ромеон дүрд тоглож байсан бэ?

                -Жүжигт тоглохоосоо өмнө 1968 оны киног үзэж байсан. Дүрийн судалгаа хийж байхдаа Улсын хүүхэд, залуучуудын театрын жүжигчин У.Готов гуай анхны Ромео болж тоглож байсныг мэдсэн. Дараа нь 1996 онд УДЕТ-ын гавьяат жүжигчин О.Гэрэлсүх, 2015 онд Б.Шинэбаяр жүжигчин тоглосон. Чадварлаг жүжигчдийн үргэлжлэл болж отгон Ромео болсондоо баяртай байна.

- Жульеттаг ярихгүй, дурдахгүй өнгөрч болохгүй шүү дээ. Хамтрагчийнхаа талаар ярихгүй юу?

                -Өөртэйгөө адилхан залуу уран бүтээлчтэй хамтарч тоглож байна. Бид үзэгчдэд сайн уран бүтээл үзүүлэхийн тулд адилхан сандарч, догдолж байна. Үзэгчдэд мэдрэгдэх үнэн хайрыг үзүүлэхээр бэлдэж байна даа.

-Сургуулиа төгсөөд Улсын хүүхэд залуучуудын театрт орсон юм билээ. Яагаад театрын жүжигчин болохоор шийдэв?

                -Багаасаа урлагт дуртай, бүжиглэдэг хүүхэд байсан л даа. Бадмаараг ахлах сургуульд сурч байхдаа “Шинэ үе” продакшнд орсон юм. Бүжиглэнэ, туслах дүрд тоглоно. Тэгж явсаар энэ мэргэжилд  татагдаж, жүжигчин болохоор шийдсэн. Жүжигчин болсноор ганцхан Б.Түвшинбаяраар амьдрахгүй, оноогдсон дүр бүрээрээ амьдрах боломжтой. Миний сонирхлыг хамгийн их татсан зүйл нь энэ.

-Хамгийнхаа анхны дүрийг авахад ямар санагдаж байв?

                -Стэгэл хөөрдөг юм билээ. Дүрээ яаж өөрөөрөө дамжуулж гаргах уу гэж их боддог юм билээ. Дүрээ гаргахын тулд жингээ хасаж, нэмэх гээд өөртөө их анхаарч эхэлдэг юм билээ. Хамгийн анх "Арслан хүлэгт баатар"хүүхдийн жүжгийн гол дүрд тоглосон.

-Хүүхдийн жүжигт ажиллах ямар байв. Хүүхдүүдэд хүргэхийн тулд өөрийгөө баатар гэдэгт итгэлтэй байх ёстой болсон байх?

                -Хамгийн үнэнч, гоё үзэгчид шүү дээ. Нүд нь гялалзаад “Одоо яах бол” гэж догдолж үздэг. Баярлаж, уурлаж байгаа нь ил байдаг учраас авдаг мэдрэмж нь илүү бодит, сайхан байдаг.

-Өмнө нь “18 дахь хаврын хайр” жүжгийн гол дүрд тоглож байсан шүү дээ. Одоо яг 18 настай хүүхдүүд сургуулиа төгсөх гээд догдолж байдаг цаг шүү дээ. Өөрийнхөө 18 насыг дурсахгүй юу. Тэр үед очвол өөртөө юу гэж хэлэх вэ?

                -Би эргээд 18 насандаа очвол ангийнхантайгаа илүү цагийн өнгөрүүлж, дурсамж бүтээх байсан. Төгсөлт болж байгаа энэ үед 18 настайдаа дүү нартаа “Өөртөө итгэлтэй бүхнийг хийгээрэй. Хүссэн зүйлийнхээ төлөө тэмцээрэй, зорилгодоо үнэнч байгаарай. Сайн байна уу, баярлалаа, баяртай гэдэг гурван үгийг амьдралдаа хэлж хэвшээрэй гэж хэлнэ.

-Театрын жүжигчний онцлог нь үзэгчидтэйгээ шууд харилцаж, тэдний хариу үйлдлийг мэдэрдэгт байдаг шүү дээ. Энэ онцлогийн тадаар яриач, анх тайзан дээр гараад жүжиглэхэд ямар санагдсан бэ?

                -Хамгийн амьд мэдрэмжийг үзэгчдээсээ авч байна гэдэг юутай ч зүйрлэшгүй сайхан. Театрын жүжигчин хамгийн хариуцлагатай ажил юм шиг санагддаг. Алдах эрхгүйгээр жүжиглэнэ гэсэн үг шүү дээ.

-Залуу уран бүтээлчийн хувиар ямар жүжигчин, уран бүтээлч байхын хүсдэг вэ?

                -Чимээгүй хийдэг уран бүтээлч байхыг хүсэж байна. Өгсөн үүрэг даалгаврын чанартай дуусгачхаад даруухан сууж байдаг хүн байхыг хичээдэг дээ.

-Ажиллахын хүсдэг дүр бий юү?

-Инээдмийн жүжиг, кинонд тоглож үзэхийг хүсдэг.

-Таны дараагийн зорилго, төлөвлөгөө юу вэ?    

                -Одоогийн байдлаар "Ромео Жульетта" жүжгээ амжилттай нээж, үзэгчдэдээ хүргэхийг л хүсэж байна. Бүх анхаарлаа тус жүжигтээ л зориулж байна даа.