"Alaga&Nymka" продакшны ээлжит уран бүтээл “Homies 2” уран сайхны кино арванхоёрдугаар сарын 27-ноос үзэгчдэд хүрч эхэлсэн билээ. Тус уран бүтээлтэй холбоотойгоор жүжигчин Н.Номинзултай ярилцлаа.

-“Homies 2” уран сайхан киногоо амжилттай нээсэн багийнханд нь баяр хүргэе. Сэтгэгдлээсээ хуваалцахгүй юу?

-“Homies” уран сайхны киноны эхний анги IPTV-ээр гарч байсан. Харин хоёрдугаар анги маань өргөн дэлгэцээр үзэгч олон хүрч байгаа. Зургадугаар сараас эхлээд киноныхоо ажилд шамдаж, зураг авалтаа хийсэн уран бүтээлээ үзэгчдэдээ хүргэж байгаадаа баяртай байна. Киногоо нээхийн өмнө айдастай, догдлолтой өдрүүдийг өнгөрүүлсэн. Би киногоо урьдчилж үзээгүй, үзэгчидтэйгээ хамт нээлтийнхээ үеэр анх удаа үзсэн.

-Уран бүтээлчийн хувьд “Homies 2” уран сайхны киногоороо үзэгчдэд юу хүргэхийг зорьсон бэ?

-Хүн бүрд өөр бодол төрөх байх. Миний хувьд нөхөрлөлийн үнэ цэнийг харуулах уран бүтээл болсон гэж бодож байгаа.

-Анх продакшн нь хэрхэн нэгдэж байсан юм бэ?

-2019 онд “Аглуу” энтертайнментын “Хөшиг нээгдэхэд нууц задарна” тоглолтод оролцож нэгэнтэйгээ танилцсан. Тэгээд контент хийж, залуустаа үлгэр дуурайлал үзүүлэхийг хүсэж нэгдсэн. Цар тахлын хөл хориотой үед ажлаа эхэлсэн учраас хүндрэлтэй асуудалтай олон тулгарсан. Шинэ бүхнийг эрэлхийлсэн залуус байсан учраас сэдвээ олсон даруй “Хийцгээе” гээд дайрцгаана. Анхнаасаа сайн хандалттай байгаагүй ээ, видеог маань цааш түгээсэн таван хүн байлаа гэхэд тэр нь бид өөрсдөө л байдаг байлаа. Тийм байхад ч бидэнд итгээд үргэлж дэмжиж байсан хүмүүс бол гэр бүл, тэдэндээ баярлалаа.

-Хамтдаа хийсэн анхны бүрэн хэмжээний уран бүтээлийнхээ талаар яривал?

-“Мах үү, шөл үү” контентыг IPTV-гээр хүмүүст хүргэж байсан. Алдсан, оносон зүйл олонтой уран бүтээл. Тухайн үед гаргасан алдаагаа дахин гаргахгүйн төлөө хичээж ажиллаж байгаа.

-Яагаад жүжигчин болохоор шийдсэн юм бэ, юу нөлөөлөв?

-Би зургадугаар ангидаа Монголын хүүхдийн ордны драмын дугуйланд явж эхэлсэн. Тэгээд есдүгээр ангиасаа “Хувьсал” продакшнд дадлага хийсэн юм. Тэнд л тайз, дэлгэцийн уран бүтээлүүдийг гоё сайхантай танилцаж, дуртай болсон. Энэ мэргэжлийн сонгох итгэл илүү нэмэгдсэн л дээ.

-“Хувьсал” продакшнд байхдаа кинонд тоглож байв уу, олон зүйл сурсан байхдаа?

-Олны хэсэгт тоглож байсан. Тухайн үед эгч нарын хувцсыг солино, арын албанд ажиллаж байхдаа алдаа гаргана түүнээсээ айж, уйлна. Гэхдээ хамгийн бага нь байсан учраас загнуулахаасаа илүү эрхэлдэг байлаа. Ер нь хаана ч очсон хамгийн бага нь байдаг байсан учраас одоо “Эгчээ” гэж дуудуулахаар сонин санагддаг, надаас өөр хүнийг дуудаад байгаа юм шиг сонсогддог.

-Өөрийнхөө тоглосон кино, контентыг үзэх ямар байдаг вэ?

-Киногоо үзээд зарим зүйл дээр хүссэн шигээ сайн байж чадаагүйгээ хараад харамсах тохиолдол цөөнгүй. Алдаа, оноогоо л их хардаг даа. Уран бүтээлд тоглох бүрдээ айдастай эхэлдэг. “Энэ дээр алдчихвал яах уу, хүсэж, төсөөлсөн шигээ дүрээ гаргаж чадахгүй бол яах уу” гэдэг бодол үргэлж төрдөг.

-Жүжигчнээр ажиллаж байхдаа мэдэрдэг хамгийн сайхан зүйл нь юу вэ?

-Дүрээсээ хамаараад эмч, багш, цагдаагийн амьдралаар хэсэгхэн амьдардаг. Хүний амьдралыг хүнээр дамжуулж, хүнд хүргэдэг учраас мэргэжил минь надад хамгийн үнэ цэнтэй. Мэргэжил бүрийн нандиныг мэдэрч чаддаг даа.

-Продакшныхаа ганц эмэгтэй жүжигчин байх ямар  байдаг вэ?

-Хайр мэдэрч ажилладаг даа. Зохиол ирсний дараа надад хамгийн тохирох дүрийг нь өгдөг. Загнуулах үе байх ч хайрлуулсан үе нь олон. Гурвуулаа зөвлөгөө өгнө. Гэхдээ юмыг өөр талаас нь харж, өөр зөвлөгөө өгдөг. Нэг нь аж амьдрал, нөгөө нь уран бүтээл дээр зөвлөнө.

-Танай продакшныг нэгтгэдэг зүйл юу вэ?

-Сэтгэл юм болов уу, нэг ширхэг бууз байсан ч бүгд хувааж иднэ, нэгнийгээ үргэлж боддог. Ярилцаагүй ч нэгнийгээ гэсэн сэтгэл нь адилхан байдаг.

-Контентууд нь хандалт өндөртэй болохын хэрээр сөрөг сэтгэгдэл ч олон авсан юм шиг санагдсан. Жишээ нь, хараалын үг хэтэрхий их хэлж байна гэж шүүмжлүүлдэг шүү дээ. Тус шүүмжлэлийг яаж хүлээж авсан бэ?

-Бидний үеийн залуус манай контентыг үздэг гэж боддог байсан. Гэтэл бага насны хүүхдүүд үздэг байсан юм билээ. Үүнийг мэдсэнийхээ дараа багачуудад буруу үлгэр дуурайлал үзүүлж болохгүй ээ ойлгосон, зөв байх гэж хичээж эхэлсэн.

-Таны болон продакшных нь дараагийн зорилго юу вэ?

-Олон зүйл төлөвлөж байна, зарим зүйлсийг бүтээхээр ажиллаж байгаа. Тэр дундаа тайзны уран бүтээл гаргахаар ажиллаж байгаа.