“Братан”, “Ахан дүүс”, “Өв залгамжлагч” тэргүүтэй уран бүтээлүүдийн гол болон туслах дүрд тоглосон жүжигчин Г.Очирбаттай ярилцлаа.

-Танд энэ өдрийн мэнд хүргэе. “Өв залгамжлагч” олон ангит кинонд ажилласан сэтгэгдлээсээ хуваалцвал, кино нь үзэгчдээс эерэг үнэлгээ авсаар дууслаа шүү дээ?

-Эрхэм уншигчдадаа энэ өдрийн мэнд хүргэе. "Өв залгамжлагч" кино үзэгчдээс өндөр үнэлгээ авч, залуусын үзэх дуртай уран бүтээл болсонд баяртай байгаа. Манай кино төслийн багийнхны зорилго ч тэр байсан. Залууст үзүүлэх өнгөлөг бөгөөд тэдний үеийнхний харж, боддог зүйлс, багийн ажиллагааг харуулахыг зорьсон. Гарааны бизнес эхлэхэд хаана ямар саад учирч болохыг судалгаанд үндэслэн харуулсан. Тэр ч зорилгодоо хүрсэн учраас хүмүүст кино маань илүү хүрсэн байх. Кино багийнхан маань гар нийлж чадсан учраас сайн уран бүтээл бүтсэн гэж бодож байгаа.

-Таны дүрээр зохиолч, найруулагчид юу илэрхийлэхийг хүссэн бол. Таны дүрийн онцлог юу байсан бэ?

-Анх киноныхоо үйл ажиллагаа хариуцсан продюсероор нь ажиллаж байхдаа дүрийн уншлага хийх бүрд Батаа захирлын хэсгийг уншдаг байсан юм. Тэгсэн найруулагч маань намайг тус дүр дээрээ өөрөө тоглох санал тавьсан. Группийнхээ өв залгамжлагч болохын тулд буруу зам бүрийг сонгож, хүнд муу санасаар өөрөө сүүлд нь тэрэндээ ороогддог шүү дээ.  Амар аргаар амжилтад хүрэхийн тулд буруу бүхнийг хийсэн хүнд шан нь ирдэг гэдгийг л харуулдаг.

-Өмнө нь ажиллаж байсан уран бүтээлүүдээс нь хэр өөр дүр байсан бэ?

-Гол дүрийнхнийг зовоож, илт буруу үйл хийдгээрээ эргээд тэр нь бүтэлгүйтдэгээрээ өмнө нь тоглож байсан дүрээс өөр байлаа. Эсрэг дүр гэдэг ер нь өөрсдийнхөө хувьд эерэг дүр шүү дээ. Уран бүтээлчид нь эсрэг дүрийг нарийн гаргаж, яагаад энэ үйлдлийг хийж байгааг нь харуулах хэрэгтэй. Хэдийгээр кино зохиол дээр эсрэг хэмээгдсэн ч тухайн дүрийн хувиар амьдарч “Миний үйлдэл зөв” гэж бодож тоглох хэрэгтэй санагддаг. 16 ангийн турш эсрэг дүр болж тоглох сонирхолтой байлаа.

-Тус уран бүтээлийг хийсэн багийнхныхаа талаар ярихгүй юу?

-Багийнхан маань сайн гар нийлж ажилласан, дүрийн сонгон шалгаруулалтыг зураг авалт хийгдэхээс жилийн өмнө сонгогдсон байсан. Гол дүрийн залуус бүгд мэргэжлийн сургуулийг төгссөн уран бүтээлчид. Багийнхандаа цаашдын уран бүтээлд нь өндөр амжилт хүсье.

-Анхны дүр нь ямар уран бүтээлийнх байв. Тухайн үеийн үеийн мэдрэмжийг эргэн санавал?

- Оюутан байхдаа MNB телевизийн олон ангит кинонд боксчин Санчир хүүгийн дүрд тоглож байсан. Туслах дүр хэдий ч зуны турш зураг авалтад оролцсон. Сонирхолтой олон зүйл сурсан мөч байсан. Оюутан гэж гололгүйгээр уран бүтээлд тоглох боломж олгосон хүн бүхэнд баярладаг.

-Яагаад жүжигчин мэргэжлийг сонгох болов. Юу хамгийн их нөлөөлсөн юм бэ?

- Дунд сургуульд байхдаа хүүхэд бүр хүсэл сонирхлоо тодорхойлж эхэлдэг шүү дээ. Би ч тэдний нэг байсан. Нийгмийн идэвхтэй ангийнхныгаа төлөөлж оролцдог хүүхэд байлаа. Төгсөөд эргэлзэлгүй СУИС-д элссэн. нэлээн хойно өөрөөсөө  "Би яагаад жүжигчин болсон юм бол" гэж асуусан л даа. Намайг жаахан байхад жүжгийн дуу телевизээр их гардаг байсан юм. Нэгэнтэйгээ зодолдоно, хайрлана, үзэн ядна бараг л кино шиг үйл явдалтай дүрс бичлэгүүдийг үзэх дуртай байж. Дүрс бичлэгт гарч байгаа жүжигчдийг харж, тэднээс үлгэр дуурайлал авч, хүсэл мөрөөдлөө болгосон доо.

-"Братан" кино таны тоглосон анхны гол дүр байв уу. Тус уран бүтээлийн талаар ярихгүй юу?

- УДЭТ-аас гарч, чөлөөт уран бүтээлч болсны дараа "Братан" киноны дүрд тоглох санал ирсэн. Жүжигчний хувиар зодоонтой, адал явдалтай кинонд тоглох сонирхол байсан учраас дүрийн саналыг хүлээн авсан. Репперүүд болон жүжигчидтэй хамтарсан нь тухайн уран бүтээлийг илүү сонирхолтой болгосон санагддаг.

-Адал явдал, зодоонтой кинонд тоглох ямар байв. Танаас ямар ур чадварыг шаарсан бэ?

- Зодооны хэсгийн зураг авалтыг хийхэд СУИС-д сурсан хөдөлгөөний хичээлүүд тун тусалсан даа. Ер нь зураг авалт тун сонирхолтой өрнөсөн.

-“Ахан дүүс” киноныхоо талаар ярихгүй юу?

-Хүмүүсийн сэтгэлд хүрсэн уран бүтээлд ажилласандаа баяртай байдаг. Бөхөөгийн дүр туслах дүрүүд дундаас хамгийн олон үзэгдэлтэй нь байсан. Бөхөөгийн өсөж дэвжих мөч, эхнэртээ тусалж байгаа нь үзэгчдэд хүрч, зарим хүмүүсийн залуу насыг санагдуулсан гэсэн сэтгэгдэл ирсэн. Кино багийнхандаа сайхан уран бүтээлийн ард гарсанд нь дахин баяр хүргэе.

-Ирээдүйд ямар дүр бүтээх юм сан гэж боддог вэ?

-Уран бүтээлч бүр ямар нэг дүрийг төсөөлж мөрөөддөг байх. Театрт байхдаа Ромеогийн дүрд тоглож үзсэн. Дахин сонгодог жүжгийн гол дүрд тоглохыг хүсдэг. Дэлгэцийн уран бүтээлийн хувьд үзэгчдийг омогшуулах цагдаа, аврагчийн дүрд тоглохыг хүсдэг дээ.