Гэр бүлийнхэнтэйгээ үзэж, инээд баясал, аз жаргал мэдрэх “Гэрэл” инээдмийн кино  үзэгчдэд хүрч эхэлсэн билээ. Тус уран бүтээлийн эршүүд зантай цагдаа бүсгүйн дүрд тоглосон залуу жүжигчин Б.Дэлгэрмөрөнтэй ярилцлаа.

-Танд энэ өдрийн мэнд хүргэе. “Гэрэл” уран сайхны кино үзэгчдэд хүрч эхэллээ. Уран бүтээлчийн хувиар сэтгэгдлээсээ хуваалцахгүй юу?

-Арванхоёрдугаар сарын 6-наас бүх кино театруудаас “Гэрэл” кино маань гарч эхэлсэн. Хөөрхөн хөнгөн зохиолтой, нийгмийн энэ их стрессээс хэсэгхэн завсарлага авч, гэр бүлийнхэнтэйгээ инээж үзэх кино болсон.

-Тус уран бүтээлийн дүрд хэрхэн тоглохоор болов?

-Анх тус уран бүтээлийг хийх санаа надаас гарсан юм. Санаагаа “Этик” продакшны зохиолч, найруулагч Г.Даваазул ахад хэлж зохиолоо бичүүлсэн. Би гэр бүлд гэрэл түгээсэн,  хөгжилтэй кино хиймээр байсан юм. Зохиолынхоо санааг гаргасан учраас хүргэх гэсэн санаагаа хамгийн сайн мэднэ гэж бодоод найруулагч маань надад гол дүрд тоглох боломж олгосон байх.

-Тун эршүүд зантай цагдаа эмэгтэйн дүрд ажиллах ямар байсан бэ?

-Цагдаа л биш болохоос би дүртэйгээ тун адилхан. Зохиолоо намайг бодож, харж байгаад бичсэн учраас миний зантай, чанартай тун төстэй бичсэн байх.

-МУГЖ П.Эрдэнэзаантай аав охин болж тоглолоо шүү дээ. Хамтран тоглоод том нөмөр түшиг байсан байхдаа?

-Зохиол ирсний дараа аавын дүрд ямар жүжигчин тогловол хамгийн сайн нийцэх бол гэж удаан бодсон. Найруулагчтайгаа хамт удаан бодсоны эцэст П.Эрдэнэзаан ахыгаа сонгосон. Одоо бодоход хамгийн сайн тохирсон санагддаг, тэр аавын дүрийг П.Эрдэнэзаан ах л гаргаж чадсан. Ахтайгаа хамтарч тоглох болоход эхлээд чадвар дутаж, чирэгдэх байхдаа гэж их санаа зовж, сүрдэж байсан. Зураг авалтын үед П.Эрдэнэзаан ах үргэлж хажууд байж, зөвлөгөө өгч, тусалсан. Тун зөөлөн хүн юм билээ, ахаасаа олон зүйл сурсан. Саналыг минь хүлээн авч, хамтарч ажилласан ахдаа баярлалаа.

-Та зохиолоо уншихдаа дүрээ хэрхэн төсөөлсөн бэ, төсөөлснөө бодит болгоход хамгийн хэцүү байсан зүйл нь юу байв?

-Зохиол маань хоёр удаа солигдсон. Би зохиол солигдоход Г.Даваазул ахад ямар нэгэн санал хэлээгүй, илүү сайн болоод ирнэ гэдэгт нь итгэж байсан. Зохиолоо уншаад төсөөлсөн бүхнээ хийсэн, бэрхшээлтэй зүйл азаар тун бага байлаа. Зохиол маань гэгээлэг учраас саадгүй бүтсэн юм болов уу.

-Өмнө нь ажиллаж байсан уран бүтээлүүдээсээ “Гэрэл” кино юугаараа онцлог байв?

-Миний өмнө тоглож байсан уран бүтээлүүдээс өөр байсан зүйл нь насанд хүрэгчдэд зориулсан хэсэг байгаагүй нь байлаа. Хулгай хийж, хүн алсангүй эхлэлээсээ дуустал хөнгөн, инээдмийн байсан нь миний хувьд онцлог байсан.

-Анхны дүр нь ямар уран бүтээлийнх байв. Тухайн үеийн үеийн мэдрэмжийг эргэн санавал?

-Би Дорнод аймагт төрж, өссөн. Аймгийнхаа телевизэд багаасаа ажилласан. Арван жилийн сурагч байхдаа “Аз жаргалын эрэлд” киноны гол дүрд тоглосон. Кинонд тоглох болохдоо ямар их хөөрч, баярлаж байснаа огт мартдаггүй юм. Одоо заримдаа киногоо үзэхээр хэдхэн хоногийн өмнө тоглосон киногоо үзэж байгаа юм шиг мэдрэмж авдаг. Миний амьдралын том дурсамжуудын нэг л дээ.

-Яагаад жүжигчин мэргэжлийг сонгох болов. Юу хамгийн их нөлөөлсөн юм бэ?

-Багаасаа л жүжигчин болно гэдэг байлаа. Би тун сониуч зантай гэхдээ юмнаас их амархан уйдна. Тэгэхээр олон төрлийн зүйл хийхгүй бол болохгүй юм шиг санагддаг байсан. Тиймээс надад хамгийн сайн тохирох мэргэжил нь жүжигчин юм шиг санагдсан. Бүх зүйл нь шинэлэг, үргэлж сурах зүйлтэй байдагт нь хамгийн их хайртай.

-“Гэрэл” киноны уран бүтээлчид киногоороо дамжуулж үзэгчдэд юу хүргэхийг хичээсэн бол?

-Манай киноноос ямар нэгэн логик дараалал хайх шаардлагагүй. Гэхдээ хажуудаа байгаа нэгэндээ анхаарал тавьж, хайрлаарай гэх санааг хүргэхийг хичээсэн. Бид ээж, аавыгаа үргэлж хамт байх юм шигээр санаж, гомдоодог. Гэхдээ үргэлж хам байж чаддаггүй, тиймээс дараа нь харамсах зүйл үлдээхгүйгээр хайрлаж, халамжлаарай гэх санааг бага ч гэсэн шигтгэхийг хичээсэн. 

-Ямар зарчим баримталдаг уран бүтээлч байхыг эрмэлздэг вэ?

-Хүний итгэлийг алдахыг хүсдэггүй. Итгэлийг нь олох тун хэцүү, цаг хугацаа шаардлагатай. Гэхдээ итгэлийг нь алдах тун амархан шүү дээ.

-Ажиллахын хүсдэг дүр бий юү?

-Хүний зүрхэнд хүрсэн, намайг яг л тэр дүрээр минь санах уран бүтээлд ажиллахыг хүсдэг дээ.