Миний хувьд тэр тун эрч хүчтэй нэгэн, гарт нь боломж ирэх юм бол хойш тавилгүй зүтгэдэг юм шиг санагддаг. Хэдий мэргэжлээр нь сураагүй огт өөр ажил хийдэг ч “Хэзээ нэгэн цагт кинонд тогловол би бэлтгэлтэй байх хэрэгтэй” гээд өдөр бүр бэлтгэл хийж, өөрийгөө бэлдсээр л байж. Чин хүсэл, авьяас нь түүнийг “Хавтас хэрэг” олон ангит киноны хоёрдугаар бүлгийн гол дүрээр шагнажээ. Анги бүртээ өөр өөр хавтаст хэргээр биднийг аялуулж, хүмүүст сэрэмжлүүлэг өгсөөр байгаа “Хавтас хэрэг” киноны гол дүрд тоглосон Б.Хулантай ярилцлаа. 

-“Хавтаст хэрэг” олон ангит киноны хоёрдугаар бүлэг үзэгчдийн сонирхлын татсан ангиудаар үргэлжилсээр байна. Тус уран бүтээлд тоглосон сэтгэгдлээсээ хуваалцахгүй юу?

-Миний нэр төрийн хэрэг байлаа. Шилдэг жүжигчидтэй хамтарч “Хавтаст хэрэг” киногоо олны хүртээл болгож байгаадаа баяртай байна. Кинонд тоглож байхдаа олон зүйл сурлаа. Бодит хэргүүдээс сэдэвлэсэн уран бүтээл учраас эмзэглэх, хүндээр хүлээж авах зүйл ч цөөнгүй байлаа.

-Бодит хэрэг гэдгийг нь мэдэж байгаа учраас хамгийн их эмзэглүүлсэн хэрэг нь аль ангийнх байв?

-Эмэгтэй хүн учраас хүний наймаа, охидын биеийг үнэлүүлсэн хэрэг, педофил буюу хүүхэд хүчирхийлэгчийн талаарх хэрэг хамгийн хэцүү нь байсан.

-Хүн бүрийн сонирхлыг татаж буй “Хавтас хэрэг” олон ангит киноны мөрдөгчийн дүрд хэрхэн тоглохоор болов?

-“Хавтаст хэрэг” киноны дүрийн сонгон шалгаруулалтын талаарх мэдээг харсан ч “Мэргэжлийн жүжигчин” гэсэн шалгуур байгааг хараад орхичихсон. Гэтэл кино багаас холбогдоод “Найруулагч маань тантай уулзах хүсэлтэй байна, та дүрийн шалгаруулалтад орох боломжтой юу” гэсэн. Тэгээд 3-4 шалгаруулалтад орсон. Сүүлийн шалгаруулалтын үеэр надаас үсээ тайрч чадах эсэхийг асуусан л даа. Ташаа давсан урт үстэй байсан ч дүр, зохиол маань таалагдаж байсан учраас эргэлзэлгүй тайруулж, кинондоо тоглохоор болсон.

-Кинод тоглоно, жүжиглэнэ гэж өмнө нь бодож байв уу?

-Би багаасаа кинонд тоглохыг хүсдэг байсан. Хэдий өөр чиглэлд ажиллаж байгаа ч далд ухамсартаа “Хэзээ нэгэн цагт кинонд тоглож магадгүй” гэсэн бодолтой байж өөрийгөө бэлдсэн. Боломж ирэх юм чанга атгана гэсэн бодолтой бэлдэж байсан. Тэр бодол минь гэнэт л нэг өдөр биелчихсэн.

-МУГЖ С.Болд-Эрдэнэ болон Б.Баяржавхлантай хамтарч тоглох ямар байв. Тус хоёр жүжигчний хувьд илүү туршлагатай байсан байх?

-МУГЖ С.Болд-Эрдэнэ ахтай хамтарч тоглох нэр төрийн хэрэг байлаа. Би энэ хоёроосоо дутахгүй тоглохыг хичээсэн. Манай хоёр зураг авалттай өдрийн өглөө нь үгээ хараад дор нь бэлдэж, жүжиглэж байхад би хэд хоногийн өмнөөс эхлэн бэлдэж байж зэрэгцэж байсан. Чирэгдэхгүй, зэрэгцэж л ажиллахыг хичээсэн дээ. Тэр утгаараа би өөрийгөө хурцалж, олон зүйл сурсан байх. Мэргэжлийн үг хэллэгийг хүнд ойлгомжтойгоор хэлэхээс эхлээд жүжигчний мэргэжил амар зүйл огтоосоо биш гэдгийг ойлгосон доо.

-“Хавтаст хэрэг” киноны хамт олон хоёр бүлэг, нийт 32 ангиараа хүмүүст юуг хэлж, анхааруулахыг хүссэн юм бол?

-Монголд болсон хэргүүдээс сэдэвлэсэн учраас хүмүүс эрсдэл байгаа гэдгийг ойлгож, сэргийлээсэй гэж хүссэн байх. Жишээ нь, педофил хэргийн талаарх ангийн дараа олон үзэгч тус хэргээс сэрэмжилж бусдадаа тус ангийг үзэхийг уриалсан байсан. Ер нь сургамж аваасай, анхаараасай л гэж хүсэж хийсэн уран бүтээл.

-Фитнесээр яагаад хичээллэж эхэлсэн бэ. Таны сонирхлыг татсан зүйл нь юу байсан юм бэ?

-Фитнесс бол миний мэргэжил, энэ чиглэлээр хичээллэж багшаад 14 жил болж байна. Сүүлд энэ мэргэжлээ илүү гүнзгийрүүлж эрүүл мэндийн цогц дасгалжуулагч болсон. Одоо илүү дааврын эрүүл мэндийн тадаар илүү судалж байна. Энэ чиглэлээр эмэгтэйчүүддээ илүү туслахыг хүсэж байгаа. Би 16 настайгаасаа аэробикээр хичээллэж эхэлсэн. Тухайн үед бүжгийн хамтлагтай, загварын дугуйланд явдаг, нийгмийн идэвхтэй хүүхэд байлаа. Загварын дугуйланд явахад алхаа, зүс царайнаас гадна бие, галбиртаа анхаарах хэрэгтэй гэж бодсон. Тэндээс фитнесээр хичээллэхээр болсон ч цаг хугацаа өнгөрөх тусам фитнесээр хичээллэх илүү энгийн зүйл болж, өглөө босоод шүдээ угаахтай ижил дадал болсон. Жил бүр л шинэ сурч байна. Үргэлж өөрийгөө шинэ мэдлэгээр цэнэглэх хэрэгтэй, “Сурч болсон” гэж бодсон цагаас эхлээд уналтад орно. Одоо бол миний хувьд фитнесээр хичээллэж гоё сайхан бие галбиртай байхаас илүү сэтгэц болон биеийг минь эрүүл байлгаж байгаа нь илүү чухал санагддаг. Бусад хүмүүст ч гэсэн зөвхөн турах хэрэгсэл бус эрүүл мэндэд чухал дадал гэдгийг нь ойлгуулахыг хүсдэг.

- ЗАЛУУ ХҮН УЧРААС ӨӨРИЙГӨӨ СОРЬСООР Л БАЙХЫГ ХҮСДЭГ-

-Нөхөр тань цахим сүлжээнд тантай байгаа хөгжилтэй бичлэгүүдээ тавьдаг шүү дээ. Анх цахим сүлжээнд тавигдахад нь хэрхэн хүлээж авсан бэ?

-Би чинь жаахан дотогшоо хүн, харин нөхөр маань нэлээн нийтэч төрлийнх. Гэрт өчнөөн л юм болно тэр бүрд миний дүрс бичлэгийг хийж байгааг мэддэггүй. Өөрийгөө л бичиж байгаа юм шиг эсвэл утсаа үзэж байгаа юм шиг харагддаг. Сүүлд намайг бичдэгийг ойлгосон. Нэгэнт цахим сүлжээнд тавигдаж, хүмүүс үзчихсэн учраас тоодоггүй. Надад бол тийм ч муухай зүйл биш, хүлээн зөвшөөрчихсөн.

-Зөрүүлж өөрийг нь шоглох талаар бодож байв уу?

-Үгүй ээ, тэгвэл тавилттай болчихно шүү дээ. Миний бичлэгүүд чинь ямар ч төлөвлөсөн зүйлгүй, би арзайгаад сууж байгаа нь тэр шүү дээ.

-Нөхөртэйгөө танилцсан үеэ дурсаж болох уу?

-Бид танилцаад 10 жил болж байна. Тухайн үед цахим сүлжээгээр л танилцсан даа, над руу чатаар “Байна уу” гэж бичиж байсан юм. Би сайн санаж байна “Сайн уу, юу байна” биш “ Байна уу” гэж бичсэнийг нь хараад “Энэ ямар сонин хүн бэ “ гэж бодоод хариу бичээгүй. Би АНУ-аас ирээд удаагүй байсан учраас “Шүрэн бугуйвч” киног үзээгүй учраас танихгүй, зургийг нь хараад “Ямар содон төрхтэй юм бэ” гэж л бодсон. Тэгээд гурав хоногийн дараа дахиад “Байна уу” гэж бичихээр нь хариулаад харилцаж эхэлсэн дээ. Тэр үед Б.Чинсанаа Юнителд ажилладаг, “Сурталчилгаанд тоглох уу” гэж асуусан санагдаж байна, цаашлаад найзууд болсон. Тэгж байгаад хосууд болсондоо би өөрийгөө найрагдаж байгаа ч мэдээгүй, нэг мэдэхэд найз бүсгүй нь болчихсон байсан.

-Нөхрийнхөө ямар зан чанарт хамгийн их татагдсан бэ?

-Үнэхээр сайн сонсогч, би чинь дүрэлзсэн, сэтгэл хөдлөл өндөртэй хүн. Зарим зүйл болохгүй үед гэнэт уурлана, гэхдээ удалгүй тайвширчихна. Яг тэр ууртай, ассан үед намайг тайвшруулдаг. Хэрэв Б.Чинсанаа урдаас уурлах юм бол би улам л уурлана шүү дээ. Намайг тайвширсны дараа надад “Ингэ, тэг” гэж үзэл бодлоо тулгадаггүй, аргадаж, ярилцаж, зөвлөдөг. Ер нь эмэгтэй хүн ярьж стрессээ тайлдаг шүү дээ, яг тэр үед минь сонсоод л байдаг. Тэгээд үнэхээр хүмүүжилтэй, аливаа зүйлийн тунг тааруулж чаддаг.

-Одоо өөрийгөө сорихыг хүссэн дүр бий юү?

-Ингэж хэлж болох болов уу, одоо бол морь унаж, нум сум харвасан түүхэн уран бүтээлд тоглож, өөрийгөө соримоор байна. Залуу хүн учраас өөрийгөө сорьсоор л байхыг хүсдэг. Өөрийгөө нэг  мэргэжил, чадвараар хайрлалгүй гарч ирсэн боломж бүрийг ашиглаарай.