“Заримдаа алдах нь  alright

Залуу байх ер нь so bright

Дураараа дургина so high yeah

Намар, Өвөл, Хавар ээлжилсээр

Залуу нас минь хамт элэгдсээр

Эргээд харахад эргэлзээгүй жаргалтай” хэмээх хөнгөн хэмнэлтэй, сонсоод л баймаар дуугаараа сонсогчдыг татаад буй “Lalatune” амьд хөгжмийн хамтлагийн дуучин Б.Хонгортой ярилцлаа.

-“Lalatune” амьд хөгжмийн хамтлагаа танилцуулахгүй юу. Хэзээнээс нэгдэж хамтлаг болсон бэ, юу та бүхнийг нэгтгэв?

-Сайн байна уу, манай хамтлаг 2023 оны гуравдугаар сард байгуулагдсан. Найзууд, дүү нартайгаа хамтарч “Lalatune”амьд хөгжмийн хамтлагийг бий болгосон. Манай гишүүд бүгд хөгжимд хайртай, уран бүтээл хийх хүсэл эрмэлзэлтэй. Энэ эрмэлзэл биднийг нэгтгэсэн дээ.

-Таны хувьд өмнө нь ганцаарчлан уран бүтээл хийдэг байсан шүү дээ. Хамтлагтайгаа уран бүтээл хийхийн давуу тал олон байна уу?

-Хамтлагтай болохоосоо өмнө ганцаарчилсан уран бүтээлүүдээ гаргадаг байсан. Хамтлагтай байхад олон давуу тал бий, ялгаатай зүйл ч олон. Ганцаараа байхдаа жижигхэн зүйлээс эхлээд бүгдийг нь хийдэг байсан. Ингэж хийснээр хүн олон зүйл сурдаг. Хамтлагаараа байхаар хүн бүр өөрийн чаддаг зүйлээ хийх учраас нэг хүн очих ачаалал нь бага. Дуу илүү баялаг, уран болдог юм шиг санагддаг.

-“Youth” дуугаараа танай хамтлаг юу илэрхийлэхийг, хүргэхийг хичээсэн бэ?

-Бид 2025 онд таван дуутай EP цомог гаргахаар бэлдэж байгаа. “Youth” бол цомгийн эхний дуу. Манай хамтлаг нэг бол өглөө эрт эсвэл нэлээн орой бөөндөө цугларах боломжтой. Учир нь, бүгд ажилтай учраас завтай үед нь цугларах болно. “Youth” дууг бид өглөө уулзаж байх үедээ тухайн цаг мөчийг дүрслэн, залуу хүмүүсийн амьдралын хэв маяг ямар байдгийг дүрсэлсэн. Ерөнхийдөө нийгэм залуусыг алдах эрхгүй юм шиг шүүмжилдэг. Харин бид дуугаараа залууст алдаж болох эрх чөлөө бий гэдгийг хэлж, залуу насаа хамгийн сайхнаар өнгөрүүлээрэй гэх эерэг санааг өгөхийг хичээсэн.

-Таны хувьд яагаад дуучин болохоор шийдсэн бэ. Энэ чиглэлийн мөрөөдөл байв уу?

-Багаасаа хэдий дуучин болно гэж мөрөөдөөгүй ч “MTV телевизийн хөгжмийн хөтөлбөрийг байнга үздэг байсан. Өсвөр насандаа сайн болсон охин маань үнэхээр авьяаслаг нэгэн гитар, төгөлдөр хуур тоглоно, дуулна, бүжиглэнэ. Тэр охинд дуулж өгмөөр санагдаад ахынхаа хатуу утастай гитар дээр гурав хоног бэлтгэл хийсэн. Тэгж л дуу хөгжимтэй холбогдсон доо. Түүнээс хойш олон дууны тэмцээнд орж гэр бүлийнхээ өөрийгөө харуулж, баталсан.  

-Амьд хөгжмийн хамтлагийн дуучин байх ямар байдаг вэ?

-Бүх зүйл дээр дэмтэй байна. Гишүүд маань байгаа учраас бүх зүйлийг өөрийнхөө хийж чаддаг байснаасаа давуулж хийдэг болсон. Аливаа хамт олонд уур амьсгал тун чухал. Бидэнд ямар нэгэн асуудал байхгүй учраас үйл ажиллагаанд маань ямар нэгэн асуудал гардаггүй. Амьд хөгжмийн дуугаралт гайхалтай учраас тэр чимээн дээр дуулна гэдэг үгээр хэлэмгүй. Дижитал хөгжмөөс хэзээ ч мэдрэхгүй мэдрэмжийг амьд хөгжим өгч чаддаг.

-Нэг дуу гаргахын тулд хэдий хэр хугацаанд бэлддэг вэ?

-Зарим дуу тун хурдан зохиогдож байхад цөөн тохиолдолд дуусгаж чадахгүй гацах тохиолдол бий. Хамгийн их цаг авдаг зүйл бол хөгжмийн найруулга.

-Шинэ залуу хамтлагийн хувиар хэр идэвхтэй уран бүтээл хийхийг төлөвлөж байна?

-Одоогийн байдлаар ойрын зорилго бидний цомог байгаа. Гэхдээ бид зөвхөн энэ цомгоор өөрсдийгөө хязгаарлахгүй цаашид пянз гаргаж, тоглолт хийнэ. Гол нь тууштай урт хугацааны хамтралыг хүсэж байгаа.

-Хамтлагийн нэр их өвөрмөц санагдсан яагаад энэ нэрийг өгөх болсон бэ?

-“Lalatune” гэдэг нэрийг эрх чөлөөтэй хөг гэсэн утгаас өгсөн. Lala бол ямар нэгэн хэвшмэл зүйлд баригдахгүй байхыг илэрхийлдэг. Яг энэ үг шиг бид ямар нэгэн энгийн хэв маягт баригдахгүй эрх чөлөөтэй уран бүтээлээ хийхийг хүсэж энэ нэрийг өгсөн.

 -Танай хамтлагийг бусад амьд хөгжмийн хамтлагуудаас онцгой болгох зүйл нь юу байна гэж харж байгаа вэ?

-Бүх хамтлаг өөр өөрийн гэсэн өнгө төрхтэй. Манай хамтлагийн хувьд ямар нэгэн жанрт баригдахгүй уран бүтээлээ хийхийг зорьж байгаа нь бидний онцлог.

-Таны болон хамтлагийнх нь дараагийн зорилго төлөвлөгөө юу вэ?

-Олон зорилго, хийхийг хүссэн зүйлийг төлөвлөгөө байна. Тэр төлөвлөсөн зүйлдээ хүрэхийн тулд хичээнгүйлэн ажиллах болно.