“I love my luv”, “Дурлалын сезон”, “Энэ бол хайр” тэргүүтэй дуугаараа алдартай охидын  “Honeymoon” хамтлаг “Яг мөн” гэх шинэ уран бүтээлээ хэдхэн хоногийн өмнө сонсогчдодоо хүргэсэн билээ. Тус хамтлаг дахин идэвхтэй уран бүтээлээ хийж цомог гаргаж, тоглолтоо хийхээр зорьж байгаа аж. Ингээд тус хамтлагийн ахлагч, Маск продакшны жүжигчин Б.Солонготой ярилцлаа.

 -Шинэ уран бүтээлээ сонсогчдодоо хүргэсэн “Honeymoon” хамтлагт баяр хүргэе. Удаан хугацааны дараа шинэ уран бүтээлээ гаргасан сэтгэгдлээсээ хуваалцахгүй юу?

-Урлагт дуртай, “Honeymoon” хамтлагийг сонсдог хүмүүстээ энэ өдрийн мэндийг хүргэе. Сэтгэл үнэхээр дүүрэн байгаа. Хүмүүс таалан хүлээн авч сонсоосой. Уран бүтээлээ хийгээгүй таван жил болсон байна. Энэ хугацаанд гишүүн тус бүр хувийн ажил, амьдралдаа анхаарал хандуулж байлаа. Биднийг сүүлд уран бүтээл гаргаж байх үед цар тахлынх хөл хорио гарч, бүх зүйл зогссон таагүй үе байсан.

-Хамтлаг анх хэрхэн байгуулагдаж байсан юм бэ, яагаад “Honeymoon” гэж нэрлэв?

-“Honeymoon” хамтлагийг бэлтгэл ангиасаа найзууд байгуулсан. Бид одоо ч хамгийн сайн найзууд, нэгнийхээ түшиг тулгуур нь. Тухайн үед Б.Урангоо “Honeymoon” гэх нэрийг өгсөн. Бал сар гэсэн утгатай, хосын хурмын дараа өнгөрүүлдэг тэр хайр ундарсан цаг хугацаа шиг мартагдашгүй өдрүүдийг бэлгэдэж өгсөн.

 -Анх байгуулагдсаныхаа дараа бүх л зүйлсээ өөрсдөө хийдэг байсан гэсэн. Тухайн үед тулгардаг бэрхшээл байв уу?

-Анх нэгдсэн цагаасаа бүх дууныхаа санааг гаргаж, дүрс бичлэгээ өөрсдөө санаачилж хийдэг байсан. Энэ удаа ч гэсэн бүгд оролцож хийсэн.

-Танай хамтлаг ямар хамтлагаас үлгэр дуурайлал авч байв?

-Арван жилдээ "Sweetymotion" хамтлагийн эгч нарыг харж дуулах, хамтлаг болох урам зориг авч байсан. Дөрвөн гишүүн бүгд дотоод сэтгэлээ гаргаж, мэдрэмжээ нийлүүлж “Honeymoon” хамтлагийг бүтээсэн.

-Таны хувьд хамтлагийнхаа уран бүтээлүүд дундаас нэг дууг онцолж яривал. Тус дуу яагаад таны хувьд онцгой, хайрлам бүтээл вэ?

-“i love my luv” юм болов уу, бидний хийсэн анхны каунтри жанрын дуу байсан. Дүрс бичлэгийг нь байгальд хийсэн учраас илүү дууг минь амилуулсан санагддаг.

-Маск продакшнд анх хэрхэн орж байв, сайхан дурсамжуудаасаа хуваалцахгүй юу?

-Би багаасаа дуучин, жүжигчин болно гэж боддог байлаа. Энэ тэмүүлэлдээ хүрсэндээ баяртай байдаг. Хүн инээлгэх дуртай, түүнээсээ эрч хүч авдаг хүүхэд байлаа. Анхнаасаа Маск продакшнд орохыг хүсэж байсан, тэр зорилгодоо хүрсэндээ ч баяртай байдаг.

-"Масктай Монгол" шоу тоглолтоор дахин тайзан дээрээс үзэгчидтэйгээ уулзсан мэдрэмж ямар байв?

-Удаан хугацааны дараа шоу тоглолт хийх үнэхээр сайхан байлаа. Хүмүүст инээд бэлэглэсэн өдрүүд хамгийн сайхан нь байдаг даа.

-“Honeymoon” хамтлагийн гишүүдийг нэгтгэдэг зүйл юу вэ. Ямар хамтлаг байхыг хүсдэг вэ?

-Дуулах дуртай, урлагт хайртай охид. Бид хүсэл мөрөөдлөөрөө нэгдсэн. Энэ маань биднийг дахин уран бүтээл хийж эхлэхэд нөлөөлсөн. Уран бүтээлээрээ хүмүүст дотоод сэтгэлийн таашаал, баяр баясал, хайр гээд бүх л сайхныг мэдрүүлэхийг хүсдэг. Манай хамтлагийг сонсох дуртай нас, насны сонсогчид байгаа. Тэдэндээ уран бүтээлээрээ зөв үлгэр дуурайлал үзүүлж хань, найз нь байхыг хүсэж, хичээж ажилладаг.

-Хамтлагийнхаа дууг үе үе сонсож, сайхан дурсамжуудаа эргэн санадаг байв уу?

-Бид 2010 онд байгуулагдаж байсан. Тэр үед хийсэн уран бүтээлүүдээ сонсож, давж гарсан бэрхшээлүүд, хамтдаа өнгөрүүлсэн сайхан дурсамжаа эргэн санаж, нэгэнтэйгээ ярилцах дуртай. Хамтдаа ажиллахгүй ч үргэлж сэтгэлд уяатай байдаг даа. Түр завсарлах хугацаанд олон хүн “Honeymoon” хамтлагийн дуунд дуртайгаа илэрхийлж, уран бүтээл гаргахыг хүлээж байгаагаа хэлсэн.

-Сонсогчдоосоо сонсож байсан хамгийн сайхан үгс юу вэ?

-Олон сайхан урмын үг сонссон. Тэр дундаас нэг охин найз залуугаасаа салчхаад “Honeymoon” хамтлагийг дууг сонсож эрч хүч авч, өөртөө итгэлтэй болсон гээд уйлж байсан. Тэр охин одоо болтол санаанаас гардаггүй юм.

-Би танай хамтлагийн “i love my luv” дуунд тун дуртай л даа. Тус дуу хэрхэн бүтсэн талаар ярьж болох уу?

-“I love my luv” дууг ая зохиогч Г.Ганг ах маань зохиосон. Тэр үед талийгаачийн зохиосон гурван дууг сонсчхоод хамтлагаараа “I love my luv” дууг сонгож, дуулсан. Бүгд энэ дуунаас нэг мэдрэмж авч, хэн ч зөрөлгүйгээр сонгосон.

-Шинэ уран бүтээлээ гаргасан юм чинь цаашид өөр уран бүтээл, тоглолт хийх үү?

-2024 оны уран бүтээл “Яг мөн” дуу байлаа. Шинэ он гаргаад улирал бүр шинэ дуу гаргахаар төлөвлөж байна. Бид уран бүтээлээ хийх том төлөвлөгөө байгаа. Цаашид шинэ цомог хийнэ. Одоогийн бүрэлдэхүүнээ сонсогчдодоо олон сайхан уран бүтээл хүргэнэ.

-Урлагийн чиглэлээр явах шийдвэрийг хэзээ гаргасан бэ?

-Урлагийн чиглэлээр явна гэдгээ арван жилдээ байхдаа мэддэг байсан. Урлагийн үзлэгт идэвхтэй орно, сургуульдаа хамтлаг байгуулаад “Одод болох хүслэн” гэх мэт олон тэмцээнд ордог байлаа.

-Таны болон хамтлагийнх нь дараагийн зорилго, төлөвлөгөө, мөрөөдөл юу вэ?

-Хүний сэтгэлд үлдсэн олон сайхан хит уран бүтээл гаргахыг хүсэж байна. Мөн сонсогчидтойгоо хамт тоглолтоо хийхийг, шинэ цомог гаргахыг зорьж байна.