37 дахь жилдээ зохион байгуулагдаж буй "Гоёл" наадмын топ моделиор А.Хулан тодорсон билээ. Тэрбээр 22 жил загварын тайзнаа алхаж буй туршлагатай нэгэн юм. А.Хулан “Гоёл-2016” наадмын шилдэг эмэгтэй загвар өмсөгчөөр тодорч байсан юм. Ингээд А.Хулантай ярилцсанаа танд хүргэж байна.

-“Гоёл 2024” наадмын топ модель болсон танд баяр хүргэе. Баярын сэтгэгдлээсээ хуваалцаач?

-Баярлалаа, үнэхээр их баяртай байна. “Гоёл” наадамдаа 20 дахь жилдээ оролцоод топ модель гэх эрхэм хүндтэй шагналын эзэн боллоо. Өөрийнхөө хүсэж, мөрөөдөж явсан алдрынхаа эзэн болсондоо баяртай, жаргалтай байна.Монголын дизайнеруудын холбооны удирдлагууд болон үргэлж дэмжиж байдаг ээждээ баярлалаа 

-Анхны загварын тайзыг нь асуухгүй өнгөрч боломгүй байх. Тухайн тайзнаас юу мэдэрсэн бэ?

-Хагмийн анхны загварынхаа тайзан дээр гарахын өмнө үнэхээр их сандарч байснаа санадаг. Хэдийгээр олон жил өнгөрсөн ч тайзан дээр гарах бүрдээ сандардаг хэвээрээ. Гэхдээ үргэлж сэтгэл хөдөлгөсөн сайхан мэдрэмж авдаг.

-Тайзан дээр алхах үедээ юуны талаар боддог вэ. Хүн бүрийн харц тань дээр болон өмссөн хувцсан дээр нь төвлөрч байгааг мэдрэх үед ямар санагддаг вэ?

-Дизайнерын урт хугацаанд бодож, ур ухаанаа гарган урласан хувцсыг хүмүүст хамгийн сайхнаар нь, онцгой хэсгүүдээс нь нэгийг ч үлдээлгүйгээр бусдад харуулах ёстой хүмүүс бол загвар өмсөгчид. Ийм асар хариуцлагатай ажил хийдэг. Нэг талаараа амьд “өлгүүр” шүү дээ.

-“Гоёл-2016” наадмын шилдэг эмэгтэй загвар өмсөгчөөр тодорч байжээ. Энэ удаа том модель боллоо. Хамгийн анх хэдэн онд Гоёл наадамд оролцож байсан юм бэ. Шагнал авах мөчид тэр үеэ дурссан уу?

-Би 2005 оноос “Гоёл” наадамд оролцож эхэлсэн. Тухайн үед ахлах сургуулийн сурагч байлаа. 2016 онд наадмынхаа шилдэг эмэгтэй загвар өмсөгч болсон. Тухайн үед баярлахын зэрэгцээ хүрэх дараагийн зорилгоо бодсон. Намайг шилдгээр өргөмжилсөн хүмүүсийн итгэлийн хүлээж илүү сайжрах ёстой гэж бодсон доо. Тэр үед хүсэж байсан мөрөөдөлдөө хүрч, топ модель болж чадлаа.

-Манай моделиуд олон улсын чанартай тив дэлхийн наадам, тэмцээнүүдэд маш их оролцдог болсон. Таны хувьд ямар тэмцээнд оролцож байсан бэ?

-Олон улсын үндэстний хувцасны наадамд оролцож багаараа тэргүүн байрт шалгарч байсан. Олон улсын тэмцээнд оролцох үед Монгол охидын харц, алхаа нь онцгой. Бусад орны охидоос илүү царайны зөв хэлбэртэй, техник сайтай байдаг.

-Загвар өмсөгчөөр ажиллаж байх үеийн хамгийн гоё үг, тохиолдол юу байв?

-Би төрөөд нэг жилийн дараа "Гоёл 2016" наадамдаа оролцож шилдэг нь болсон. Тухайн үед наадамдаа орохын тулд 98 килограммаас 57 килограмм болтол турсан юм. Өөрийгөө ялан дийлсэн гайхалтай үйл явдал байсан учраас миний хувьд хамгийн том амжилт, сайхан мөчүүдийн минь нэг байсан.

-Чамгүй хугацааг загварын салбарт өнгөрүүлжээ. Багаасаа загвар өмсөгч болно гэж боддог байсан уу. Бага насны дурсамжаасаа ярьж өгөөч?

-Би их дотогшоо гишгэдэг, буруу алхдаг хүүхэд байсан юм. Түүнийгээ засахын тулд "Шилмэл загвар" ХХК-ийн Цолмон багшийнхаа шавь болсон. Ингэж л өөрийнхөө дутагдлыг засаж, хамгийн дуртай ажлаа хийдэг болсон доо.

-Олон улсын тэмцээнд Монгол Улсаа төлөөлөн оролцож байгаа учир ихээхэн хариуцлага мэдэрдэг үү?

-Манай үндэсний хувцас  цаанаасаа сүртэй, онцгой байдаг шүү дээ. Тийм эрхэмсэг хувцсыг өмсөөд алхаж байхдаа эх орноороо, энэ хувцсыг өмсөж байгаа өөрөөрөө бахархдаг.

-Эмэгтэйчүүд бид өөрсдийгөө бусад бүсгүйчүүдтэйгээ жиших, харьцуулах үе гардаг. Таны хувьд охид ямар үед өөрийгөө бусадтай харьцуулдаг гэж боддог вэ?

-Би жин нэмчихсэн байхдаа сэтгэл гутралд орсон. Тэр үед цахим сүлжээнээс  татгалзаж, өөртэйгөө ажиллаж эхэлсэн. Эмэгтэй хүн бүр ээж болдог хорвоогийн хамгийн үзэсгэлэнтэй оршихуй. Тиймээс өөрийгөө хэнтэй ч битгий жишээрэй. Хүн онцлогтой, царай муутай эмэгтэй гэж хаана ч байхгүй шүү. Гол нь өөрийгөө ялан дийлдэг, хайрладаг байгаарай.

-Загварын салбарт ажиллахыг хүсдэг охид, залуучууд байгаа шүү дээ. Тэдэнд өгөхийг хүсдэг зөвлөгөө бий юү?

-Загвар өмсөхийг хүсдэг охид өсвөр насандаа өндөр өсгийт өмсөж эхэлснээр илүү өндөр болдог. Загварынхаа гарааг эхлэх гэж байгаа хүүхдүүдэд хамгийн тохиромжтой нас нь 14, 15 нас юм л даа.

-Гоёл наадмыг үнэ цэнтэй болгодог гол үнэт зүйл нь юу вэ?

-37 дахь жилдээ зохион байгуулагдаж байгаа нь хамгийн том үнэ цэнэ. Ингэж тогтвортойгоор үйл ажиллагаагаа явуулах амаргүй шүү дээ. Мөн энэ удаагийн "Гоёл" наадам БНХАУ, ОХУ-ын загвар өмсөгчид оролцсоноороо онцлог байлаа. "Гоёл" бол олон загвар өмсөгч дийн эхлэлийн тавьдаг ариун тайз.