Анги бүрдээ шинэ хавтаст хэрэгээр биднийг аялуулж анхааруулга, сэрэмжлүүлэг өгдөг “Хавтаст хэрэг” киноны хоёрдугаар бүлэгт Галт зэвсэг, тэсрэх бодисын шинжээч Балтын дүрд тоглосон жүжигчин З.Хангалтай ярилцлаа. МУГЖ Г.Золбоотын хүү болох түүний тоглосон анхны уран бүтээл нь “Хааны сүүлчийн хатан” кино бол оюутан байхдаа “Тэнгэрийн продюсер” кинонд тогложээ. Мөн тэрбээр аавтайгаа хамт “Бүү март”, “Хайр эргэсэн хавар” олон ангит кинонд тоглож байсан билээ.

-Танд энэ өдрийн мэнд хүргэе. “Хавтаст хэрэг 2” киноны үзэгчдээс эерэг үнэлгээ авсаар байна. Тус уран бүтээлд тоглосон сэтгэгдлээсээ хуваалцахгүй юу?

-“Хавтас хэрэг” олон ангит киноны дүрийн шалгаруулалтад гуравдугаар сард орсон. Дөрөвдүгээр сард Хүлэгү пикчерсээс залгаад шинжээч Балтын дүрд ажиллах санал тавьснаар кинондоо тоглосон. Уран бүтээлээ үзэгчдэдээ хүргэж байгаадаа баяртай байна.

-Шүүхийн шинжээчийн дүрд ажиллах ямар байв. Албаны үг хэллэх гээд судлах зүйл олон байв уу. Зөвлөгч нар нь ямар зөвлөгөөг хамгийн их өгсөн бэ?

-Зураг авалт эхлэхээс өмнө Шүүх шинжилгээний ерөнхий газар арав хоног дадлага хийсэн. Галт зэвсэг, тэсрэх бодисын шинжээчийн багийнхан түргэвчилсэн сургалт өгч, ажлын талбайд хэрхэн ажиллах, мэргэжлийн хэллэг гээд хэрэг гарсан газарт ажиллах бүх л техникийг зааж өгсөн.  Тэнд галт зэвсэг, тэсрэх бодисын талаар олон зүйл сурсан даа.

-Уран бүтээлчийн хувьд “Хавтас хэрэг” киног хийж байгаа шалтгааныг юу гэж бодсон бэ. Үзэгчдэд юу ойлгуулахыг, хүргэхийг хүсэж байгаа бол?

-Шүүх шинжилгээний газарт дадлага хийж байх үедээ Монгол Улсад гэмт хэргийн тохиолдол өндөр байгааг ойлгосон. Залуучууд, хүүхдүүдтэй болон гэр бүлийн хүчирхийлэлтэй холбоотой олон хэрэг гардаг. “Хавтаст хэрэг” киног бодит түүхээс сэдэвлэсэн учраас хүмүүс сонирхож үзэх дуртай. Үзэж байгаа хүн бүр нэгийг ойлгож, гэмт хэргийн тоо буурч, болзошгүй эрсдэлээс өөрсдийгөө хамгаалаасай гэж хүссэн.

-Галт зэвсэг, тэсрэх бодисын шинжээчийн ажил болон дүрийн онцлог юу байв?

-Цагдаагийн ажлаас огт өөр, гэхдээ мөрдөгчийн ажилд хамгийн их тусалдаг чухал алба юм билээ. Хэрэг юунаас болж гарсан, гаднын халдлага уу, ямар буугаар буудсан гээд бүх л нарийн мэдээллийг өгдөг. Шинжээчид тэр бүгдийг олж тогтоохын тулд ажиллагаатай олон шат дамжлагатай шинжилгээ хийдэг. Үргэлж хэргийн газрын хамгийн нүд халтирам бүхнийг хардаг хэцүү ажил юм билээ.

-“Хавтаст хэрэг” киноны гол онцлох зүйл нь шүүхээр шийдвэрлэсэн хэргүүдээс сэдэвлэсэн байдаг. Таныг эмзэглүүлсэн хэсэг байв уу, “Үнэхээр ийм зүйл тохиолддог байх нь” гэмээр зүйл байсан уу?

-Шүүхээр шийдвэрлэгдсэн хэргүүдийг уран сайхны хэлбэрт оруулан киногоо хийж байгаа шүү дээ. 16 анги тус бүр өөр түүх, өөр сургамж өгнө. Тэр дундаас хүүхдийн хүчирхийллийн талаарх хэрэг хамгийн хэцүү байсан. Монголд гардаг олон хэцүү хэргийн талаар сонсож, сэтгэл эмзэглэж байлаа.

-Яагаад жүжигчин болохоор шийдсэн бэ. Аав нь нөлөөлсөн үү?

-Намайг хүүхэд байхад аав кино, жүжиг гээд олон уран бүтээлд явдаг байсан. Багаасаа л аавыгаа болон ажлынх нь сайхныг харж өссөн учраас эрт жүжигчин болохоор шийдсэн. Би Хөгжим бүжгийн коллежийн морин хуурын ангийг төгссөн. Аав минь намайг морин хуурч болгоно гэж боддог байсан юм билээ. Аавыгаа хөдөө тоглолтоор явсан хойгуур нь СУИС-д шалгалт өгч тэнцээд, сургуульдаа орчихсон.

-Таныг урлагийн чиглэлээр явна гэхэд аав нь хэрхэн хүлээж авсан бэ?

-Аав жаахан дургүйцсэн. Олон зүйл туулдаг, хэцүү ажил гэдгийг нь мэддэг болохоор жүжигчин л битгий болоосой гэж хүссэн гэсэн.

-Тоглосон анхны кино, уран бүтээлийнхээ талаар ярихгүй юу?

-Аавтайгаа хамт явж байгаад хүүхэд байхдаа “Хааны сүүлчийн хатан”, “Зугтаарай” зэрэг кинонд тоглосон. Миний хамгийн анхны дүр тус хоёр киноных байж. Жүжигчнээр ажиллаж эхэлснээсээ хойш “Ээжээ зорино”, “Ээж”, “Admin Z”, “Амьдралын урт замд” тэргүүтэй кинонд тоглосон.

-Аавынхаа тоглосон ямар кино, ямар дүрд хамгийн дуртай вэ?

-Онцлож хэлэхийг хүсэхгүй байна. Аавынхаа тоглосон бүх л кино, дүрд дуртай. СУИС-д сурчихаад аавынхаа тоглосон киног дахиад үзэхэд багадаа үздэг байснаасаа огт өөр мэдрэмж авсан. Ямар мундаг, чадвартай жүжигчин бэ гэдгийг нь мэдэрсэн.

-Ямар уран бүтээлч байхыг хүсэж, эрмэлздэг вэ?

-Монголынхоо алтан үеийн жүжигчид шиг дүр дээрээ сайн ажилладаг, үзэгчдийнхээ хайр хүндэтгэлийг хүлээсэн уран бүтээлч болохыг хүсдэг дээ.

-Таны дараагийн зорилго, төлөвлөгөө юу вэ?

-Олон сайн уран бүтээлд тоглож, ирээдүйд гадаадын уран бүтээлд тоглож, өөрийгөө сорьж үзэхийг хүсэж байна.