Филиппиний нийслэл Манила хотноо зохион байгуулагдсан  "Miss Earth-2024" тэмцээнд Дэлхийн 80 гаруй улсын гоо бүсгүй өрсөлдсөн билээ. Тус тэмцээнд амжилттай оролцож Miss people's choice номинацийн шилдэг 10 оролцогчийн нэг болсон П.Цэлмэгтэй ярилцлаа.

Тэрбээр шүдний эмч мэргэжилтэй бөгөөд АШУҮИС-д нүүр, ам судлал чиглэлээр магистрт суралцдаг, “Андра академи"-ийн багш юм. П.Цэлмэг сагсан бөмбөгийн нэгдүгээр зэрэгтэй. Мөн “Авьяаслаг монголчууд” шоу нэвтрүүлгийн шилдэг 32 оролцогчийн нэг “Hobby dance” бүжгийн хамтлагийн ахлагч байжээ.

-Танд энэ өдрийн мэнд хүргэе. “Miss earth” наадмын шилдэг арван оролцогчийн нэг болсон сэтгэгдлээсээ хуваалцахгүй юу?

-“Miss earth” наадамд Miss people's choice буюу хүмүүсийн сонголт гэсэн номинаци байдаг. Тус төрөлд долдугаар байрт шалгарч, шилдэг арван оролцогчийн нэг болсондоо баяртай байна. “Miss earth” наадмын албан ёсны хуудсанд манай улсын энэхүү амжилтын онцлон мэдээлсэн.

-“Miss earth” наадам бусад миссийн тэмцээнээс юугаараа онцлог вэ?

-Дэлхий дахин олон миссийн тэмцээн зохион байгуулагддаг. Улс орон, тив гэх мэтээр бүсчлэн тэмцээн болох нь ч бий. “Miss earth” бол чансаагаараа дөрөвт жагсдаг том тэмцээн. Эх дэлхийгээ хайрлая гэсэн урианы дор байгаль орчин руу илүү чиглэдгээрээ энэхүү миссийн тэмцээн маань онцлог. Мисс байна гэдэг гоо сайхнаас илүүтэйгээр байгаль орчноо хайрлахыг уриалж, байгаль орчны өөрчлөлтийн талаарх болохгүй бүхний дуу хоолой болдгоороо илүү давуу тал бүхий зорилготой тэмцээн гэж боддог.

-Тэмцээн хэд хоног үргэлжилсэн бэ. Та хэдий хэр хугацаанд бэлдэв?

-Тэмцээн аравдугаар сарын 22 арваннэгдүгээр сарын 9-ний хооронд үргэлжилсэн. Миний хувьд тэмцээнд тун богино хугацаанд бэлдсэн. "Андра" академидаа багшилж эхлээд удаагүй байгаа. академиас маань энэ том тэмцээнд оролцох боломж олгосон. 20 гаруй хоногт тэмцээнийхээ бэлтгэлийг хийсэн. Дэлхийн хэмжээний миссийн тэмцээнд бэлдэхэд богино хугацаа л даа.

- Тус гоо бүсгүй шалгаруулах тэмцээнд яагаад оролцож өөрийгөө сорихоор шийдсэн бэ?

-Эмэгтэй хүн бүрийн дотор мисс, загвар өмсөгч болох мөрөөдөл байдаг байх. Хэдийгээр мисс болох мөрөөдөлтэй ч шүдний эмчээр сурч ажилласан. Эмчээрээ ажиллахаас гадна мэргэжил дээшлүүлэх суралцаж байсан учраас миссийн тэмцээнд оролцох боломж төдийлөн гарч байгаагүй.

-Тэмцээний хамгийн сэтгэл догдлуулам мөч нь хэзээ байв?

-Эх орны минь нэрийг бахархалтайгаар зарлах мөчүүд хамгийн нандин, сэтгэл хөдөлгөм байсан. Миссийн тэмцээнд оролцож байх үед хэзээ намайг нэрээр минь дуудахгүй, Монгол Улс гэж харж, ярьж байгаа учраас хариуцлагатай байхыг хичээсэн.

-Тэмцээний үеэр эх орныхоо онцлогийг хэрхэн гаргасан бэ?

- Монгол Улсыг, түүхийн маань сайн мэддэг хүмүүстэй олон уулзсан. Бидний онцлог, чадвар, үндэсний хувцсыг сонирхож, магтсан. Тэр үед эх орноороо хамгийн их бахархдаг юм билээ.

-Тэмцээндээ анхаарлаа хандуулахад гэр бүлийн дэмжлэг их байсан болов уу. Гэрийнхэндээ хандаж үг хэлээч?

-“Miss earth” тэмцээнд оролцоход хамгийн их дэмжлэг үзүүлсэн хүмүүс бол гэр бүлийнхэн маань байлаа. Тэмцээнд явахын өмнөх шөнө унталгүйгээр юмаа бэлдэж байхад хамтдаа байж, надтай адилхан догдолж, сандарсан гэрийнхэндээ баярлалаа. Миссийн тэмцээнд оролцоход санхүүгийн асуудал их нөлөөлдөг. Тэр үед гэрийнхэн маань хамгийн баттай ар тал болсон. Надад итгэж алдартай тэмцээнд оролцох боломж олгосон "Андра" академийн хамт олондоо баярлалаа.

-Эмэгтэйчүүд өөрсдийгөө бусад бүсгүйчүүдтэйгээ жиших, харьцуулах үе гардаг. Таны хувьд охид ямар үед өөрийгөө бусадтай харьцуулдаг гэж боддог вэ?

-Эмэгтэйчүүд бид цаг тутамд өөрсдийгөө ямар нэгэн юмтай харьцуулдаг юм шиг санагддаг. Хүн бүр өөр өөрийн гэсэн онцлог, давуу талтай. Гэхдээ эмэгтэйчүүд өөрсдийгөө хэн нэгэнтэй харьцуулж сэтгэлээр унадаг бас өөрөө бахархдаг. Үнэндээ энэ дэлхийд төрсөн хүн бүр дахин давтагдашгүй шүү дээ. Энэ маань биднийг илүү онцгой, сайхан болгодог. Тиймээс өөрийгөө байгаагаар нь хайрлаж, бусадтай харьцуулах шаардлагагүй. Таны өөрийнхөө сул тал гэж боддог зүйл хэн нэгний хүсдэг зүйл нь байж мэднэ шүү дээ.

-Тайзан дээр байх үедээ юунд анхаарал хандуулдаг вэ?

-Намайг П.Цэлмэг гэж танихгүй, Монгол Улс гэсэн нүдээр харах учраас ямар ч алдаа гаргахгүй, сул талгүй юм шиг байхыг хичээсэн.

-Таны дараагийн зорилго төлөвлөөгөө юу вэ. Оролцохыг хүссэн гоо бүсгүй шалгаруулах тэмцээн бий юү?

-Дэлхийд чансаагаараа дөрөвт жагсдаг том тэмцээнд амжилттай оролцоод ирлээ. Ирээдүйд боломж олдвол өөр тэмцээнд эх орноо төлөөлөн оролцохыг хүсэж байна.