Үзэгчдийн хүртээл болж буй “Хавтаст хэрэг” олон ангит киноны хоёрдугаар бүлгийн шүүхийн шинжээч Дөлөөгийн дүрд ажилласан Э.Намуунтай ярилцлаа. “Хавтас хэрэг” кино нь шүүхээр шийдвэрлэсэн бодит хэргүүдээс сэдэвлэснээрээ онцлог билээ

-Танд энэ өдрийн мэнд хүргэе. “Хавтаст хэрэг 2” кинонд хэрхэн ажиллах болов. Таны төсөөлсөн Шинжээч Дөлөө ямар хүн бэ?

- -Хүүгээ түрүүлээд найман сар болж байхад "Хүлэгү" пикчерсийн "Хавтас хэрэг" кино хийгдэх гэж байгаа, дүрийн шалгаруулалтад орох санал тавьсан. Шалгаруулалтад орсны дараа Дөлөө гэх шүүхийн шинжээч бүсгүйн дүрийн санал болгосон. Дүрээ үнэхээр баяртайгаар хүлээн авч ажилласан. Энэ боломжийг ашиглаад надад боломж олгосон"Хүлэгү" пикчерсийн хамт олонд баярлалаа.

-Шүүхийн шинжээчийн дүрд ажиллах ямар байв. Албаны үг хэллэх гээд судлах зүйл олон байв уу. Зөвлөгч нар нь ямар зөвлөгөөг хамгийн их өгсөн бэ?

-Кино зураг авалт эхлэхээс өмнө дүрийн судалгаа хийсэн. Шинжээч эмч нарын хийдэг ажил, чиг үүргийн талаар мэдэж авсан. Тэр үед шинжээчдийн ажлын зарим зүйлээс нь айж бас бахархсан. Шүүхийн шинжээч нар хэргийг илрүүлэхэд гол үүрэг гүйцэтгэдэг юм билээ. Хохирогч хэзээ өнгөрсөн, ямар шалтгаантайг нь хэлж өгдөг. Дөлөөгийн дүрд ажиллахад шүүх шинжилгээний эмч нар болон Бат-Эрдэнэ даргадаа баярлалаа. Хэлэхэд хэцүү албаны үг олон байсан. Олон давтаж, зөвлөхүүдийнхээ тусламжтайгаар зураг авалтаа даваад гарсан. Анхны олон ангит кино, мэргэжлийн уран бүтээлч биш учраас хүмүүсийн ажилд саад болчих вий гэсэн айдастай байлаа. Одоо ингээд үзэгчдэд хүргэж байгаадаа баяртай байгаа.

-Хэдийгээр бодит биш ч гэсэн араг яс, цогцос гэх мэт зүйлстэй харилцах хэрэгтэй болсон байх. Энэ талаар яривал?

-“Хавтас хэрэг” киноны эхний бүлгийг үзэгчийн хувиар үзсэн. Уран бүтээлчид киногоо илүү үнэмшилтэй болгохын тулд хоёрдугаар бүлэгтээ шүүхийн шинжээчдийн дүрийг оруулсан юм шиг санагдсан. Манай зураачийн баг үнэхээр мундаг ажилласан. Аль хэдэн жилийн өмнө үхсэн хүний цогцос, араг яс гэж итгэмээр урласан байсан. Миний зураг авалтаа хийлгэсэн газар бусад жүжигчдийнхтэй харьцуулахад илүү хүнд уур амьсгалтай газар байсан. Шорон, шүүх шинжилгээний задлагийн өрөө гэх мэт газар зураг авалтаа хийлгэсэн учраас хэдийгээр харьцаж байгаа зүйл маань бодит биш орчин нь жинхэнэ учраас эвгүй санагдсан.

-Хавтаст хэрэг киноны гол онцлох зүйл нь шүүхээр шийдвэрлэсэн хэргүүдээс сэдэвлэсэн байдаг. Таныг эмзэглүүлсэн хэсэг байв уу, мөн үнэхээр ийм зүйл тохиолддог байх нь гэсэн зүйл байсан уу?

-Киноны 16 ангийн турш гарч байгаа 16 болсон үйл явдал тус бүр өөр агуулгатай байгаа. Тэр  дундаас хамгийн сэтгэл эмзэглүүлсэн хэрэг нь Авдрантын шоронд гарсан хэрэг байсан. Тус хэрэг 1996 онд болсон хэрэг гэж сонссон. Тэр үеийн хэргийг одоо цагт сэргээж, үзэгчдэд хүргэж байгаа нь их сонирхолтой санагдсан.

-Цагдаа, мөрдөг, шинжээч нарыг хэцүү нөхцөлд ажилладгийг нь улам мэдэрсэн үү?

-Хүмүүсийн “Өдөр, шөнөгүй ажиллаж байна” гэдэг үгний утгыг ойлгож, мэдэрсэн. Цагдаа, эмч, онцгой байдлын албан хаагчид маань өргөсөн тангарагтаа үнэнч байхын тулд өөрсдийнхөө амьдралыг бүрэн зориулдаг юм шиг санагдсан. Гэмт хэргийн дуудлага ихэвчлэн оройн цагаар байдаг, дуудлагын дагуу очоод тухайн хэргийн газрын хараад хүлээж авах хүн тусдаа байдаг юм билээ. Нийгмийн сайн сайхны төлөө өөрсдийн аюулгүй байдал, амьдрал, бие сэтгээ зориулдаг юм билээ. Тус уран бүтээлд ажиллаад алба хаагчдаараа илүү бахархсан.

-Таны хувьд "Хавтаст хэрэг" кино бусад олон ангит киноноос юугаараа онцлог вэ. Уран бүтээлчид киногоороо юуг илэрхийлэхийг хүссэн бол?

-“Хавтаст хэрэг 2” кино бодит үйл явдлаас сэдэвлэгдсэн учраас бидний эргэн тойронд ийм гэмт хэрэг болдог гэдгийг бусдад анхааруулж, сэрэмжлүүлж байгаагаараа онцлогтой.

-Моделоор ажилладаг юм билээ. Хэзээнээс энэ чиглэлээр ажилласан бэ?

-Би агентлагт харьяалагддаггүй, өмнө нь ч явж байгаагүй. 2019 онд “Говь” ноолуурын үйлдвэрээс эмэгтэйчүүдийн баярт зориулсан зураг авалтад орох санал ирсэн. Тэгж л фото моделиор ажиллах гараагаа тавьсан.

-Жүжигчнээр суралцсан уу. Суралцах энэ чиглэлээр ажиллах хүсэл бий юү?

-Хүүхэд байхдаа жүжигчин болохыг хүсдэг байсан. Гэхдээ ахлах сургуулиа төгссөнийхөө дараа МУИС-ийн Хууль зүйн сургуульд сурсан. “Хавтаст хэрэг 2” бол миний тоглосон анхны олон ангит кино. Уран бүтээлдээ ажиллаад жүжигчин айхын сайхныг мэдэрсэн. Надад дахин ийм сайхан боломж гарвал баяртайгаар хүлээн авч тоглоно. Ирээдүйд өөрийгөө дайчилж жүжигчин болохыг хүсэж байна.

-Таны хувьд амьтан тэжээх талаар цахим сүлжээндээ идэвхтэй хуваалцдаг шүү дээ. Хэзээнээс нохой тэжээж эхэлсэн бэ?

-Аав маань нохой сургагч учраас багаасаа амьтантай ойр өссөн. Хамгийн анх бие даан тэжээсэн нохойгоо 2020 онд авч байсан. Ирэх жил таван нас хүрэх эмэгтэй овчарка байгаа. Үнэхээр ханьтай, нийтэч, миний амьдралын бүх л цаг мөчид надтай хамт хамт байдаг. Бид хоёр бусдад энэ хайраа түгээж, үлгэрлэхийг хичээдэг.

-Амьтан тэжээхийн давуу тал олон бий юү?

-Олон бий, би амьтнаа хайрлаж байгаа шиг нохой маань намайг хайрладаг. Би тэр нохойны хувьд дэлхий, ертөнц нь байгаа юм. Намайг хариуцлагатай болгосон, арчилгааг хэрэглээг нь хангахын тулд бие дааж сурсан. Эмч нарын хэлдгээр нохойтой айлын хүүхдүүд бусдаас илүү дархлаатай байдаг гэдэг нь үнэн юм шиг санагдсан.

-Таны дараагийн зорилго, төлөвлөгөө юу вэ? 

-Суралцах зүйл олон байна. Тэр бүрийгээ хийж, гүйцээхийн төлөө хичээнэ.