ХҮҮ, ОХИНТОЙГОО ХАМТ ТАЕКВОНДОГИЙН ДЭЛХИЙН ЦОМЫН ТЭМЦЭЭНЭЭС МЕДАЛЬ ХҮРТСЭНДЭЭ БАЯРТАЙ БАЙНА

Узбекистан Улсын Ташкент хотноо зохион байгуулагдсан таеквондогийн Дэлхийн цомын тэмцээний түүхэнд анх удаа нэг гэр бүлийн гурван хүн медаль хүртжээ. Г.Ганбилэг 18-34 насны ангиллын VI-V зэргийн 64 кг жинд алтан медаль, түүний охин Г.Ану-Үжин 10-11 насны ангиллын VI зэргийн -25 кг жинд алт, хүү Г.Ган-Эрдэнэ 6-7 насны VI зэрэгт тулалдан мөнгөн медаль хүртсэн юм. Ийм нэгэн ховор амжилтын талаар аав Г.Ганбилэгтэй ярилцлаа.

-Танд болон гэр бүлд нь баяр хүргэе. Хүү, охинтойгоо таеквондогийн Дэлхийн цомын тэмцээнээс медаль хүртлээ шүү дээ. Баярын сэтгэгдлээсээ хуваалцахгүй юу?

-Баярлалаа, сэтгэл тэнүүн сайхан байна. Узбекистан Улсын Ташкент хотноо зохион байгуулагдсан iTF буюу таеквондогийн Дэлхийн цомын тэмцээнд Монгол Улс 90 хүний бүрэлдэхүүнтэй амжилттай оролцоод ирлээ. Хүү, охин хоёртойгоо хамт нэрээ дуудуулан тэмцээнд оролцож, эх орныхоо нэрийг өндөрт өргөсөндөө баяртай байна. Тэр үеийн мэдрэмж, сэтгэгдлийг үгээр хэлхийн аргагүй сайхан байлаа. Хамгийн дөхөж очих үг нь нисэж байгаа юм шиг л гайхалтай гэдэг үг байна. Тамирчдын болон хүүхдүүдийн минь амжилттай салшгүй холбоотой байдаг шигшээ багийн дасгалжуулагч “Хаадын зарлиг” клубийн А.Дөлгөөн багшдаа их баярлалаа.

-Та хэзээнээс тус спортоор хичээллэж эхэлсэн бэ. Хүүхдүүд нь хичээллэж эхлээд хэр удаж байна, сонирхлоороо хичээллэж эхэлсэн үү?

-Хүүхдүүд маань таеквондогоор хичээллэж эхлээд жил болж байна. Охин маань одоо арван настай, хүү зургаатай. Анх 2023 оны арваннэгдүгээр сарын 1-нд А.ДӨлгөөн багштай “Хаадын зарлиг” клубт элссэн. Хичээллэх хугацаандаа олон амжилтын эзэн болсоор байгаа. Хүүхдүүд маань 2024 онд тус бүр жингийнхээ улсын аварга болж намайг их баярлуулсан.

-Тус тэмцээнд гэр бүлээрээ оролцох болсноо мэдээд ямар санагдсан бэ, тэмцээндээ хэр удаан бэлдэв?

-Би тэмцээнд оролцоно гэдгээ хүүхдүүддээ хэлээгүй ээ, чимээгүйхэн бэлдэж байсан. Тэмцээний талбай дээр гэнэл гарч бэлэг барихаар шийдсэн юм. Гэнэтийн бэлэг маань амжилттай болсон.

-Өөрөө тэмцээнд оролцохоос гадна хүүхдүүдийнхээ тэмцээнийг үзэж, зөвлөгөө өгч ажиллав уу?

-Тийм ээ, хүүхдүүдийнхээ найз, багш нь байж бүх цаг үед хамт байж, хань болохыг хичээлээ. Энэ маань ч тэдний чадвар хурдан сайжрах үндэс болдог байх.

-Хүүхдүүд нь спортоор хичээллэж эхлээд олон эерэг өөрчлөлт ажиглагдаж байна уу. Таны хувьд спортоор хичээллэхийн давуу тал юу юм бэ?

-Хүүхдүүд таеквондогийн спортоор хичээллэж эхэлснээ хойш олон эерэг өөрчлөлт ажиглагдаж байгаа. Тэвчээртэй, тууштай, зарчимч, зоригтой, зорилготой, өөртөө итгэлтэй болсон нь харагдсан.  Тус спортоор хичээллэсний давуу тал нь ингэж харагдаж байгаа юм уу даа.

-Хүүхдүүдэд нь энэ удаагийн тэмцээн их урам болсон байх тэдний сэтгэгдлээс хуваалцвал, шагнал авчихаад аавдаа юу гэж хэлсэн бэ?

-Таеквондогоор хичээллэж эхлээд удаагүй байхдаа аавдаа захиа бичиж өгч байсан юм. Тэр захианд “энэ спортод оруулж өгсөнд баярлалаа, бидний зорилго заавал улсын аварга, Азийн аварга, дэлхийн аварга, Олимпын аварга болох. Та биднийг дэлхийн тавцан дээрээс хараад биднээр бахархаж, уйлж байхыг нь чинь хармаар байна” гэсэн байсан. Хүүхдүүдийн минь хэлсэн, амласан зүйлс эхнээсээ биеллээ болж байгааг харах хамгийн сайхан байна.

-Гэр бүлээрээ медаль хүртэж, аварга болоод ирэхэд нь хэрхэн угтсан бэ. Тэмцээндээ саадгүй явахад гэр бүлийнх нь дэмжлэг чухал байсан байх?

-Эмээ, эгч хоёр жаахан дүү нь дүүрэн хөөр баяртай угтсан. Хүүхдүүд маань аав, эмээ амьтай. Эмээ нь “Амьд явахдаа ийм сайхан юм үзэх гэж” гээд их баярласан даа.

-Оролцож байсан хамгийн дурсамжтай тэмцээнийхээ талаар ярихгүй юу. Онцолж байгаа шалтгаан нь юу вэ?

-Энэ удаагийн таеквондогийн Дэлхийн цомын тэмцээн л хамгийн сайхан дурсамж үлдээлээ дээ. Аав, охин, хүү гурав шагналын тавцан дээр зогссон ховор мөчийг бүтээлээ.

-Тулааны спортоор хичээллэхэд шантрах үе гарч байв уу. Хэрхэн даван туулсан бэ?

-Спортоор хичээллэхийн хамгийн хэцүү мөч нь бэртэл, гэмтэл байдаг. Бэртэлтэй байсан үедээ клубийнхээ багш, дасгалжуулагчийнхаа дэмжлэгээр шантраагүй ээ. Дуртай зүйлээ, хайртай хүмүүстэйгээ хийж байгаа учраас сайхан байна.

-Тэмцээний тулааны талбар дээр гараад тулалдахад ямар мэдрэмж төрдөг вэ?

-Энэ асуултад охиныхоо хэлж байсныг хэлмээр санагдлаа. Охин маань “Тулаан хийхэд толгой доторх бүх бодол арилаад, хичээл заалгасан бүх л багш нарынхаа заасан хичээл, шилдэг тамирчдын аргыг туршиж үзэхийг хичээдэг. Тэгж тулаанаа хийх хөгжилтэй байж, бие хөнгөрсөн юм шиг санагддаг” гэсэн юм.

-Та таеквондог юу гэж тайлбарлах вэ. Таны хувьд юу вэ?

-Таеквондо бол хурд хүч, тэсвэр, хүчний спорт. Хүнийг бүх талаар нь хөгжүүлж, сайжруулдаг юм шиг санагдаг.

-Таны дараагийн зорилго төлөвлөгөө, оролцохыг хүсдэг тэмцээн юу вэ?

-Холбооноосоо гаргаж байгаа бүх л тэмцээнд амжилттай оролцож, Монгол Улсынхаа нэрийг олон удаа өндөрт мандуулж, iTF таеквондо олимпод оролцож, эх орны маань олон тамирчин аварга болоосой гэж хүсэж байна.