Цахим сүлжээнд “Бүжигчин бэр” хэмээн алдаршсан Өмнөговь аймгийн театрын бүжигчин Н.Насанжаргалтай ярилцлаа. Хүмүүс хуримын бүжиг хэмээн бодсон тус биелгээ үнэндээ байрныхаа найраар гэр бүлийнхнийхээ хүсэлтээр бүжиглэж байсан үеийнх нь гэнэ. Залуу бүжигчин хуримаа хийхээрээ мөн адил монгол бүжгээ бүжиж, өөрийнхөө хүсэлтээр цахим сүлжээнд хуваалцана гэсэн юм.

-Цахим сүлжээнд таны бүжиглэж буй дүрс бичлэг нэлээдгүй хандалт авсан шүү дээ. Тус бичлэгийн  талаар ярихгүй юу. Тэгж хандалт авна гэж бодсон уу?

-Сайн байна уу, хүмүүсийн шуугиад байгаа дүрс бичдэг миний хуримынх бишээ. Би арай хуримаа хийж амжаагүй байгаа. Манай гэр бүлийн шинэ байрны найрын үеийн бичлэг. Дүрс бичлэгээ тэгж хандалт авна гэж бодоогүй ээ. Цахим сүлжээнд тавигдсаныг хараад “Тавигджээ” гэж бодоод өнгөрсөн. Харин маргааш нь төсөөлснөөс олон хүн үзсэн байгааг хараад жаахан гайхсан.

- Хүмүүс хуримын бичлэг гэж хүлээж аваад, шинэ бэр гэдэг утгаар нь шүүмжилсэн байсан. Сэтгэгдлүүдийг хэрхэн хүлээж авсан бэ?

-“Хадам ээж,аавынхаа нүүрийг самардлаа” гэсэн сэтгэгдэл олон байсан. Гэхдээ би тэднийг хүсэлтээр, гэр бүлийнхнээ хүндлээд бүжиглэсэн юм. “Шинэ бэр байж” гэсэн сэтгэгдэл ч цөөнгүй байсан. Би айлын бэр болоод таван жил болсон, намайг бүжигчин гэдгийг маань мэддэг учраа бүжиглүүлэх хүсэлт тавьсан.

-Таны уншсан хамгийн хөгжилтэй сэтгэгдэл юу байв?

-Хүмүүс “Согтуу юм уу, уучихсан байна, хөөргөчхөж” гэж бичсэн байсан. Байрны найрт хамгийн хүндтэй хүмүүсээ урьсан, тэдний өмнө согтууруулах ундаа ууна гэж хэзээ ч байхгүй шүү дээ.

-Тус бүжгийг бэлдсэн байсан уу, эсвэл шууд хүсэлт аваад бүжиглэсэн үү?

-Бэлдээгүй ээ, гэхдээ цахим сүлжээнд өөр аятай тарсан байна лээ. Манай найрт хуурч маань ирсэн байсан учраас хуурчаасаа хөгжим тоглож өгөхийг хүсээд, шууд бүжиглэсэн.

-Хуримаа хийгээгүй байгаа юм байна. Тэгвэл ирээдүйд хуримаа яаж хийнэ гэж боддог вэ?

-Монгол уламжлалт хурим хийхийг хүсдэг. Хуримынхаа гэнэтийн бэлэг болгож заавал биелгээгээ хийнэ. Сүүлийн жилүүдэд хүмүүс гаднын соёлыг дуурайж, чөлөөт бүжиг бүжиглэдэг болсон. Тэр соёлыг үгүйсгэхгүй ч монгол хүний хувьд биелгээгээ хийнэ.

-Хуримынхаа үеэр бүжиглэж байгаа дүрс бичлэгээ цахим сүлжээнд тавих уу?

-Би хуримаа хийхээрээ өөрийнхөө сонирхлоор бичлэгээ хийж тавина. Хуримынхаа бичлэгийг тавих үед хүмүүс эерэг хүлээж авах байх гэж бодож байна.

-Ханьтайгаа анх хэрхэн танилцаж байв?

-Бид нэгдүгээр ангидаа хамт сурч байсан юм. Тухайн үед би шилжээд холбоо тасарчихсан байсан. Ахлах анги төгсөх жилдээ хуучин сургуульдаа шилжиж ирээд дахин холбогдсон. Тэр үеэс үерхэж эхлээд гэр бүл болж, хөөрхөн хүүтэй болсон.

-Шинэ байранд нүүж, найраа хийх мэдрэмж ямар байв?

-Залуу гэр бүлийн хувьд шинэ байранд нүүж орно гэдэг асар их хөдөлмөр байдаг. Тэр их хөдөлмөрийн араас байрны найр хийгээд сууж байх мэдрэмж үнэхээр сайхан юм билээ. Ханиараа, өөрсдийнхөөрөө хөдөлмөрөөр бахархсан.

-Гэр бүлийнхэн нь дүрс бичлэгийг нь хэрхэн хүлээж авсан бэ?

-Хүмүүс “Бичлэг нь цахим сүлжээнд тавигдсан байна, ямар гоё юм бэ, үзсэн үү” гээд эергээр хүлээж авсан. Гэрийнхнээс маань ээж хамгийн их эмзэглэсэн. “Хүмүүс юу болсныг нь мэдэхгүй байж яагаад ингэж шүүмжилж байгаа юм бэ, миний охин энэ бичлэгээ устгуулчхаж болохгүй юу” гэсэн. Ээжийгээ эмзэглэж байгааг хараад би ч гэсэн жаахан тавгүйтсэн. Гэхдээ тэр дүрс бичлэг тавигдсанд бус хүмүүс биелгээ, монгол бүжгийг гайхаж, сөрөг сэтгэгдэл бичиж байгаад нь жаахан тавгүйтсэн. Хань маань эхнээс нь дуустал ямар үйл явдал болсныг мэдэж байсан учраас “Гоё байсан шүү дээ, хөөрхөн байна. Битгий сэтгэлээр унаарай” гээд намайг ер буруутгаагүй. Магтсан сэтгэгдлийг нь уншиж урам авч байлаа.

-Урлагийн чиглэлээр яагаад суралцах болов?

-Би багаасаа л бүжиглэх дуртай, бүжиглэж байхдаа хамгийн жаргалтай байдаг хүүхэд байсан. Тайван мэдрэмжийг бүжиг, нутаг хоёроосоо авдаг учраас нутагтаа амьдарч, ажиллаж байгаа. Миний гарсан тайз бүр хамгийн нандин. Ирээдүйд тайзан дээр алга ташуулаад зогсох хэмжээний сайн бүжигчин болохыг хүсэж байна.