“Харанхуйн нууц” кино үзэгчдэд хүрч эхэлсэн билээ. Тэгвэл тус кинонд ажилсан контент бүтээгч Б.Отгонжаргалтай ярилцлаа. Тэрбээр Монголын тик токын ертөнцөд хамгийн их дагагчтай залуу юм.

-Танд энэ өдрийн мэнд хүргэе. “Харанхуйн нууц” кино нь үзэгчдэд хүрч эхлэлээ. Сэтгэгдлээсээ хуваалцахгүй юу?

-Сайн байна уу, сэтгэгдэл их өндөр байгаа. Киногоо үзсэний дараа өнгө дуу дүрсний чанар үнэхээр гайхалтай харагдаж байсан. Би өөрөө тоглосон хэрнээ киногоо шимтэн үзсэн гэхээр хувьдаа их сайн бүтээл болсонд нь баярлаж байгаа.

-Аймшгийн кинонд тоглох шинэ туршлага болсон байх даа. Энэ төрлийн уран бүтээлд тоглох ямар байсан бэ?

-Өмнө нь нэг аймшгийн кинонд тоглож байсан ч өгч байсан мэдрэмж тэс ондоо байсан. Энэ удаагийн киноны зураг авалтыг бүүр хуучны орхигдсон балгасанд хийсэн нь хамгийн том шалгуур болох шиг санагдсан. Түүнээс гадна аймшгийн кино нь өөрөө жүжигчнээс дэндүү их мэдрэмж эд эсийг шаарддаг жанр гэдгийг ойлгож хичээж ажилласандаа.

-Харанхуй сургууль киногоор дамжуулж уран бүтээлчид үзэгчдэд юу хүргэхийг зорьсон бол?

-Кино бүрд утга агууламж тодорхой хэмжээнд агуулагдах ёстой санагддаг. Манай киноны хувьд хүн бүрд нууц гэж бий гэх үгэнд агуулагдах утга бүрийг гаргахыг хичээсэн. Мөн энэ кино  аймшгийн триллер жанрын кино боловч олон нууцыг тайлах адал явдал ч багтаж байгаа болохоор үзэгчдийг өөрсдөө үзээд “Харанхуйн нууц”-ыг тайлаасай гэж хүсэж байна.

-Өөрөө хэр аймшгийн кино үздэг вэ. Айдаг төрлийнхөө кинонд ажиллах ямар байв?

-Одоо бол насанд хүрээд аймшгийн төрлийн киног үздэг болсон. Түүнээс биш ер нь надаас их хол сэдэв байсан л даа. Яг энэ төрлийн кинонд тоглохдоо жихүүдэстэй орчноосоо айж байсан ч энэ чинь кино гэдэг утгаараа тэр бүх мэдрэмжээ дэлгэцэд шингээхийг оролдсон.

-Хоёулаа анх хэрхэн тик ток дүрс бичлэг хийж эхэлсэн талаар нь яриагаа үргэлжлүүлэх үү?

-“Тик ток” аппликэйшн Монголд орж ирээд удаагүй байхад дотнын найз “Чи бичлэг хийгээч” гэж хэлснээс энэ бүх аялал эхэлсэн дээ. Намайг урамшуулж, энэ чиглэлээр ажиллах санаа өгсөн найзлаа их талархдаг. Тик токын ачаар олон хүнтэй танилцаж, сонирхолтой зүйлс хийж байна шүү дээ.

-Тик ток хийж, хүмүүст танигдаж эхэлж байх үеийн сэтгэл хөдлөлөөсөө хуваалцахгүй юу?

-Тэр үе их цочирдом байсан. Олон нийтийн газраар явахаар хүмүүс таниад, эргэж хараад хоорондоо яриад байхыг харахаар эвгүй, дургүйлхмээр ч юм шиг санагдаж байсан. Гэхдээ ингэж олны анхаарал татаж, танигдаж байгаа бол биеэ илүү зөв авч явж, хүмүүс үлгэр дуурайлал болох ёстойг ойлгосон. Өөртөө хариуцлага өгч эхэлсэн.

-Жүжигчин мэргэжилтэй юу, энэ чиглэлээр сурах сонирхол бий юү?

-Анх 2017 онд КУДС-д жүжигчнээр сурч эхэлсэн. Гэхдээ 2018 онд сургуулиа орхиод өөр мэргэжил сонгосон ч одоо хүртэл жүжиглэх хүсэлдээ хөтлөгдөөд дадлагаар өөрийгөө сургаж байна даа.

-Өнөөгийн нийгэмд өөрийн дүрс бичлэгээ цахим орчин цацах нь хувь хүнээс зориг шаарддаг болсон байна. Хүмүүс сайшаахаас илүү муулах нь их байдаг. Таны хувьд сөрөг сэтгэгдэл аваад ямар хариу үйлдэл гаргаж байсан бэ?

-Ер нь хэцүү, одоо ч заримдаа бэрхшээлтэй үе тулгардаг. Учир нь, дийлэнх сөрөг сэтгэгдэл бичдэг хүмүүс бусдын сайн явааг харж, тэсдэггүй үг нь илүүдсэн хүмүүс байдаг гэдгийг мэддэг. Гэхдээ нэгэнт сонссон үгийг тоохгүй орхих хэцүү шүү дээ. Сэтгэлд тээглээд шантрах үе гардаг шүү дээ.

-Гэр бүлийн гишүүд нь тик ток тэргүүтэй сошиал ажлыг нь хэрхэн хүлээж авдаг вэ?

-Тик ток миний болон гэр бүлийн минь хувьд үнэ цэнтэй, үнэлдэг зүйл. Гэрийнхэнд маань хүүгээ цахим сүлжээ, кино уран бүтээлээс харж, амжилттай байгааг нь мэдрэх сайхан байх. Сайныг нь л хардаг учраас элдэв сөрөг сэтгэгдлийг тоодоггүй байх.

-Анх зар сурталчилгаанд тоглохдоо сандарч байсан уу. Сурталчилгааны саналыг хэрхэн хүлээж авч байсан бэ?

-Анх бол ганцаараа биш найзуудаараа тоглож байсан болохоор сандрал байгаагүй ээ. Ер нь аливаа зураг авалт, зар сурталчилгаанд огтоос сандралгүй ордог. Бодохдоо тик ток хийхдээ үргэлж камерын өмнө гарах мэдрэмжийг авдаг учраас бэлтгэгдэж, дассан байх.

-Цаашдын хүсэл мөрөөдөл, зорилгоосоо хуваалцвал?

-Мэдээж бодсон зүйл олон бий. Гэхдээ урдаа ганцхан том саадтай байгаа учир түүнийгээ давсан хойно итгэлтэйгээр зорилго, төлөвлөгөөгөө харуулна гэж боддог. Одоогоо мэргэжил дээшлүүлэх бололтой байгаа даа.