“Bee” театрын уран бүтээлчид Норвегийн нэрт зохиолч Хенрих Ибсений “Хүүхэлдэйн байшин” жүжгийг үзэгчдэд хүргэж буй. Тус жүжгийн Ранк эмчийн дүрд Улсын хүүхэлдэйн театрын залуу жүжигчин Д.Сугирбаатар тоглож байгаа билээ. Ингээд залуу жүжигчинтэй ярилцсанаа хүргэж байна.

-Танд энэ өдрийн мэнд хүргэе. “Bee” театрын  шинэ уран бүтээл “Хүүхэлдэйн байшин” жүжгийнхээ талаар ярихгүй юу?

- “Хүүхэлдэйн байшин” жүжигт СУИС, Сити их сургуулийн залуу уран бүтээлчид хамтарч ажиллаж байгаа. Тэдэнтэйгээ хамтрах үнэхээр сайхан байгаагаа дурдах нь зөв болов уу. Бидний хөлс, хүч бие сэтгэлээ шингээсэн жүжгийг маань үзээд бага ч гэсэн зүйл бодоод гараасай гэж хүсэж байна.

-Тус жүжгийн Ранк эмчийн дүрд ажиллаж байгаа шүү дээ. Дүрийнхээ талаар яривал, гол дүрд ажиллах болсон нь танд  ямар санагдсан бэ?

-“Хүүхэлдэйн байшин” жүжигт ажиллах санал ирэхэд их сандарсан. “Чадах болов уу” гэсэн эргэлзээ байсан. Гэхдээ өөрийгөө шинэ зүйлд туршиж, ямар түвшинд явж байгаагаа мэдэхийн тулд дүрийн саналыг хүлээж авсан. Ранк эмч бол шударга ёсны бэлгэдэл болсон дүр. Надад оноогдсон дүрийг чадахаараа амилуулахыг хичээж байгаа.

-“Хүүхэлдэйн байшин” жүжгээрээ үзэгчдэд юу ойлгуулж, ямар санаа өгөхийг хичээж байгаа вэ?

-Дүрийнхээ өнцгөөс илүү хариулах хэрэгтэй байх. Өнөөдөр буруу үйл, амьдралын буруу дадлаар амьдардаг бол өөрт чинь биш юмаа гэхэд үр хүүхдэд чинь үйлийг үр болоод ирнэ. Орчлонд амьдрах энэ хэсэгхэн хугацаандаа зөв амьдраарай гэдгийг хэлэхийг хүссэн.

-Хүүхэлдэйн театрын уран бүтээлч юм билээ. “Морин хуур” жүжгийнхээ талаар ярихгүй юу?

-76 жилийн түүхтэй Улсын хүүхэлдэйн театрын уран бүтээл болох “Морин хуур” жүжгийн Хөхөө Намжилын дүрд ажилласан. “Морин хуур” жүжгийг “Хөхөө Намжил”-ын домгоос сэдэвлэн хийсэн уран бүтээл. Энэхүү жүжгээрээ хүүхэд ,залууст өв соёлоо уламжлуулан үлдээж, таниулан дэлгэрүүлэхийг хичээж байгаа. Хүүхдүүд манай жүжгээс ямар бэрхшээлийг туулж өнөөдөр бидний бахархал болсон морин хуур хөгжим бүтсэн талаар сурах болно.

-Яагаад хүүхэлдэйн театрын уран бүтээлч болохоор шийдсэн бэ?

-Хүүхэлдэйн театрын “Хүүхэлдэйн чинээ ээж” гэх жүжиг бий. Анх тэр жүжгийн үзээд хүүхэлдэйн жүжигчин болохоор шийдсэн. Театрт орсны дараа бэрхшээлтэй олон зүйлтэй нүүр тулсан. Өөрөө жүжиглэхээр гадна хүүхэлдэй амилуулах хэрэгтэй болдог. Заримдаа театрт ажиллаагүй, хүүхэлдэйгээр найзуудтайгаа тоглож байгаа юм шиг санагддаг.

-Залуу жүжигчний хувьд тайзны уран бүтээлчээр голчлон ажиллах хүсэлтэй байгаа юу. Яагаад энэ чиглэлийг сонгов?

-Театр гэдэг амьд урлаг. Театраас л авч чадах мэдрэмж байдаг учраас тэр мэдрэмждээ дахин, дахин авахын тулд энэ салбарт ажиллаж байгаа. Кино шиг дахиж эхлэх боломж байхгүй. Алдсан ч, оносон ч тэр зүйл тайзан болоод л өнгөрнө. Оюутан байхад багш маань тэгж хэлж байсан юм. “Чи алдаж болно, оюутан гэдэг чинь чамайг аварна. Оюутан байхдаа алдаж үз. Харин төгссөнийхөө дараа тайзан дээр алдах эрхгүй” гэж хэлсэн. Тиймээс одоо илүү хичээж ажиллаж байгаа.

-Жүжигчин болоход юу нөлөөлсөн бэ?

-Анх аялал жуулчлалын чиглэлээр сурахаар төлөвлөж байсан юм. Намайг их сургуульд орох жил аав, ээж хоёр маань отроор явчихсан, сүлжээгүй газар байсан. ЭЕШ-ын оноогоо сонсоод, сургуульдаа тэнцсэнээ мэдсэн ч урлагийн чиглэлээр явмаар санагдсан. Тэгээд гэрийнхнээсээ нууцаар морин хуураар СУИС-д ур чадвараа өгч, тэнцсэн. Дараа нь гэрийнхэндээ хэлтэл “Чаддаг юмаараа явах биш чадахгүй зүйлээрээ явж, чаддаг зүйлээ хөгжүүлбэл тэр чиний давуу тал болно. Миний хүү жүжигчин болох уу” гэсэн. Ухаарал хайрласан зөвлөгөө өгсөн шүү.  СУИС-д СТА Б.Хишигзаяа,  МУГЖ Л. Чаминчулуун багшийнхаа ангид орчихоод  ийм мундаг хүмүүсээр хичээл заалгах гэж байгаадаа баярласан.

-“Хүүхэлдэйн байшин” жүжгийг залуу жүжигчин найруулж байгаа шүү дээ. Залуу найруулагчийн удирдлага дор ажиллах ямар байв?

-“Хүүхэлдэйн байшин” жүжгийн найруулагч Т.Хүслэн манай ангийн охин байгаа юм. Оюутан байхаасаа л бүх юмаа хамт хийдэг сайхан найзууд байсан. Урлаг, театрын тэмцээнд их орно. Оюутны 3/27 тэмцээнд Т.Хүслэн найруулж, би тоглоод, “Шилдэг эрэгтэй жүжигчин” шагнал авч байлаа. Найзыгаа ангийн хүүхэд гэх нүдээр хараад байсан чинь мундаг найруулагч болсон байна лээ. Надад итгэж Ранк эмчийн дүрийг өгсөн байх. Итгэлийг нь алдахгүй сайн ажиллахыг хичээж байна. Найздаа “Чи хамгийн мундаг нь шүү” гэж хэлмээр байна.

-Залуу уран бүтээлчийн хувиар ямар жүжигчин, уран бүтээлч байхын хүсдэг вэ?

- Надаас илүү авьяастай нэгэн байгаа гэдгийг мэддэг учраас өдөр бүр хөдөлмөрлөдөг жүжигчин байхыг, хүн шиг хүн байхыг л хичээдэг дээ.

-Ажиллахын хүсдэг дүр бий юү?

-Жүжигчин бүр мөрөөддөг дүр байгаа байх. Миний хувьд Д.Намдагийн “Хөгшин чоно ульсан нь” зохиолоор жүжиг тавивал хөгшин чонын дүрд ажиллахыг хүсдэг. Тэр чонын амьдралаар амьдарч үзэхийг хүсдэг дээ.