“Bee” театрын уран бүтээлчид Норвегийн нэрт зохиолч Хенрих Ибсений “Хүүхэлдэйн байшин” жүжгээ өнөөдрөөс үзэгчдэд хүргэж байгаа билээ. Тус жүжгийн Фру Линне бүсгүйн дүрд залуу жүжигчин В.Уртнасан тоглож байна. Ингээд залуу жүжигчинтэй ярилцсанаа хүргэе.

-Танд энэ өдрийн мэнд хүргэе. “Bee” театрын  шинэ уран бүтээл “Хүүхэлдэйн байшин” жүжгийнхээ талаар ярихгүй юу?

-Норвегийн нэрт зохиолч Хенрих Ибсений “Хүүхэлдэйн байшин” жүжиг нь 1979 онд бичигдсэн. Гэхдээ өнөө цагт ч байсаар байгаа нийгмийн хэм хэмжээ, хүн хүндээ шүүмжлэлтэй ханддаг, гадна хэлбэрт ач холбогдол өгдөг бүхнийг гаргасан. Тэр дундаа эмэгтэй хүний бусдаас хараат байдал гоё сайхан байх ёстой, хүүхдээ л харах ёстой, нөхрөө цэвэрхэн байлгах ёстой гэх мэт хайрцаглагдсан байдлыг маш тодоор дуугарсан, одоогийн нийгэмд заавал тоглогдох ёстой жүжиг гэж бодож байгаа.

-Тус жүжгийн гол дүр ажиллаж байгаа шүү дээ. Дүрийнхээ талаар яривал, гол дүрд ажиллах болсон нь танд  ямар санагдсан бэ?

-Мэдээж тайзны жүжигт ажиллана гэдэг жүжигчин хүнд хамгийн сайхан мэдээ байдаг болов уу. Надад ч мөн энэ жүжигт ажиллахад үнэхээр сайхан байгаа. Миний дүрийн хувьд гол дүр болох Норагийн дотнын найз. Амьдрал үзэж, олон зүйл туулсан их ухаалаг бүсгүйн дүр. Нөгөө талаараа Норагийн яг л эсрэг тал. Нийгмээс ирж буй хэм хэмжээ дарамтаас өөрийгөө чөлөөлж чадсан нь зохиолчийн үзэгчдэд хүргэх гэсэн дуу хоолой гэж бодож байна. Найруулагч маань надад дүрээ илүү өөр өнцгөөр харж, эрх чөлөөтэйгөөр ажиллах боломжийг олгосон.

-“Хүүхэлдэйн байшин” жүжгээрээ үзэгчдэд юу ойлгуулж, ямар санаа өгөхийг хичээж байгаа вэ?

-“Хүүхэлдэйн байшин” жүжиг нь бүх цаг үеийн нийгмийн хиймлээр зохиосон бидний бие биедээ тавьдаг шаардлагуудын шүүмжлэл. Хүмүүсийн зохиож, нэгэндээ тулгаж байдаг эрэгтэй хүн зоригтой, сул дорой биш харин эмэгтэй хүн туранхай, хөөрхөн сайхан, ажилсаг байх ёстой гэсэн энэ их шаардлага, шүүмжлэл дунд өөрийгөө гээгдүүлж зөвхөн бусдад зориулсан худал хуурмаг дүрдээ анхаарч яг л хүүхэлдэй болон амьдарч, цаашлаад нийгэм бүхэлдээ хүүхэлдэйн амьдралаар амьдарч байгаа гэсэн мөн чанарыг харуулахыг зорьж байна.

-Фру Линнийн дүр танаас хэр өөр байв. Тус дүрд ажиллахад танаас юу шаардав?

-Фру Линне дүрийн хувьд надаас яг эсрэг хүн байсан. Насны хувьд ч амьдралын туршлагын хувьд ч тэр. Гэр бүлийнхээ амьдралыг нуруун дээрээ авч яваа надаас их хол дүр. Хамгийн энгийн жишээ нь түүний сонсдог хөгжим нь рок, харин би уянгалаг, намуухан хөгжим сонсохыг илүүд үздэг. Чадах чинээгээрээ судалгаа, ажиглалт хийж ажилласан. Энэхүү жүжигт ажиллаад би ч гэсэн жүжгийнхээ дүр шиг хэн нэгний бодолд захирагдаж, яг л хүүхэлдэй шиг амьдардгаа ойлгосон.

-“Bee” театрт анхны уран бүтээлдээ ажиллаж байгаа юм билээ. Тус театрыг сонгож ажиллах болсон шалтгаан юу вэ?

-“Bee theatre” маань бага тайзны театр учраас жүжигчдээс их уран чадвар шаарддаг санагдсан. Жүжигчин мэргэжлээр төгссөн хүний хувьд театрт ажиллаж, өөрийгөө хөглөж, илүү хөгжүүлэхийг хүссэн.

-Залуу жүжигчний хувьд тайзны уран бүтээлчээр голчлон ажиллах хүсэлтэй байгаа юу. Яагаад энэ чиглэлийг сонгов?

-Бүх зүйлээс суралцаж л явна. Театр гэдэг өөрөө юутай ч зүйрлэшгүй онцгой газар. Гэхдээ ганцхан театрт ажиллана гэхгүйгээр шинэ зүйлс туршиж, нэг зүйлдээ баригдалгүй өөрийгөө үргэлж хөгжүүлж ажиллах хүсэлтэй.

-Жүжигчин болоход юу нөлөөлсөн бэ?

-Багаасаа тайзан дээр их гардаг байсантай л холбоотой байх. Жүжигчний мэргэжил надад хамгийн сайхан эрх чөлөөг өглөг учраас үргэлж мэргэжилдээ дурладаг.

-“Хүүхэлдэйн байшин” жүжгийг залуу жүжигчин найруулж байгаа шүү дээ. Залуу найруулагчийн удирдлага дор ажиллах ямар байв?

-Найруулагчийн маань залуухан бас эмэгтэй байсан учраас яг үнэндээ бүх зүйл дээр их амар байсан. Сайн ойлголцож, дэмжиж ажилласан. Дүрийнхээ үндсэн чанарыг авч үлдээд бусад талаараа хүссэнээрээ ажиллах эрх чөлөөг ч олгосон.

-Залуу уран бүтээлчийн хувиар ямар жүжигчин, уран бүтээлч байхын хүсдэг вэ?

-Өөрийн гэсэн үзэл бодолтой л байхыг, тэрэндээ үнэнч байхыг хамгийн их эрхэмлэдэг дээ.

-Ажиллахын хүсдэг дүр бий юү?

-Маш гоё түүхэн эрэмгий, зоримог эмэгтэйн дүр дээр ажиллахыг хүсдэг дээ.

-Таны болон багийнхных нь дараагийн зорилго юу байгаа бол?

-“Хүүхэлдэйн байшин” байшин жүжигтэйгээ цаашид олон зүйлийг даван туулахаар зорьж байгаа.