“Өв залгамжлагч” олон ангит киноны Эрхэсийн дүрд тоглож буй жүжигчин Д.Гантулгатай ярилцлаа. Тэрбээр өмнө нь "Bujo", "Бүлэг", "Suits" тэргүүтэй уран бүтээлд ажиллаж байсан билээ.

-Танд энэ өдрийн мэнд хүргэе. “Өв залгамжлагч” олон ангит кинонд ажилласан сэтгэгдлээсээ хуваалцвал, кино нь үзэгчдээс эерэг үнэлгээ авсаар байна шүү дээ ?

-Энэ өдрийн мэнд хүргэе. Хамгийн эхэнд энэхүү уран бүтээлд хамтран ажилласан уран бүтээлчид, арын алба, найруулагч, продюсерууддаа баярлалаа гэж эхлэх нь зүйтэй байх. Сайхан уран бүтээлийн ард багийнхантайгаа гарсандаа баяртай байгаа.

-Найруулагч, зохиолч нь Эрхэсийн дүрээр юуг илэрхийлэхийг хүссэн бэ. Түүний дүрийн онцлог юу байв?

-Эрхэс ямар ч нөхцөл байдалд асуудлыг харах өнцөг өргөн,  гаргасан шийдвэртээ үнэнч, хийсэн сонголтдоо хариуцлагатай, ямар ч асуудалд бүх зүйлийг рационал утгаар нь харж, бодож сэтгэж чаддаг гэдгээрээ онцлогтой дүр байлаа. Киноны найруулагч, зохиолч нар маань Эрхэсийн дүрээр үзэгчдэд "Ухаантай байгаарай" гэдгийг дамжуулж хэлэх гэсэн юм болов уу. Бидний амьдралд ухаан хэрэгтэй шүү дээ.  Бизнес эрхлэхэд  байтугай хүнийг танихад, найзлахад, хайрлахад ч ухаан хэрэгтэй шүү дээ.  Харин Эрхэс уг кинонд ямар үүрэг гүйцэтгэв гэдгийг та бүхэн маань "Өв залгамжлагч" ОАУСК-оос хүлээн авч үзээрэй.

-Өмнө нь ажиллаж байсан уран бүтээлүүдээс нь хэр өөр дүр байсан бэ?

-Миний хувьд бараг анхны эерэг дүр байлаа. Дүрээ үзэгчдэд хайрлуулж, өмөөрүүлнэ гэдэг их хэцүү байдаг юм байна. Үзэн ядагдах нь миний хувьд арай амар санагдсан. Би чинь муухай харвал их ширүүн харцтай аймар харагддаг хүн шүү дээ.

-Эрхэсийн дүрд ажилссанаар түүнээс юу сурч авав. Ер нь тантай хэр ойрхон дүр байсан бэ?

-Аливаа асуудалд нөхцөл байдлыг бодитоор хүлээн зөвшөөрч, сэтгэл хөдлөлөөр бус логик сэтгэлгээгээр ул суурьтай хандах хэрэгтэй гэдгийг л ойлголоо доо. Эрхэс зарим талаараа миний байхыг хүсдэг хүн гэх юмуу даа. Үг дуу цөөтэй, ер нь дотогшоо зантай. Сайн бодож тунгаадаг. Анзаарах юм бол Эрхэс олон үзэгдэл дээр хумсаа мэрж байгаа. Тэр үйлдлээр нь сэтгэл түгшил, санаа зовнилыг илэрхийлэхийг оролдсон. Энэ нь гэхдээ бас тийм ч оновчтой шийдэл болоогүй юм шиг санагдсан. Хүмүүс ойлгож харахгүй байж магад.

-Тус уран бүтээлийг хийсэн багийнхныхаа талаар ярихгүй юу?

-Хамтран ажилласан баг хамт олон маань ёстой шилдэг нь байсан. Зураг авалтын туршид ямар нэгэн асуудалтай зүйл байгаагүй. Кино маань долоон гол дүртэй байсан учраас бүгд хамтдаа орох зураг авалтын хэсгүүд багийнханд маань жаахан хүндрэлтэй байсан байж магадгүй. Гэхдээ бид бүгд ард нь гарчихсан өнөөдөр ингээд баяраа тэмдэглээд, киногоо үзээд сууж байна шүү дээ.

-Өмнө нь “Бүлэг” кинонд тоглож байсан шүү дээ. Тус уран бүтээлийн талаар яривал?

-“Бүлэг” киноны тухайд найруулагч Ц.Анхбаяр маань шууд надтай холбогдоод киноны товч танилцуулгыг уншуулсан. Зохиол нь тун сонирхолтой санагдсан л даа. Найруулагч маань Гарьд гэх залуугийн дүрд тоглуулахаар намайг сонгосон. Тухайн үед би "Garuda" BJJ & MMA-д бэлтгэл хийдэг байсан нь сонин тохиолдол болж таарсан. “Garuda” гэдэг үгний орчуулга нь Гарьд гэсэн үг л дээ. Тулааны бэлтгэл хийдэг байсан маань ч тэр адал явдалт киноны дүр дээр ажиллахын тулд байсан юм шиг санагдсан.

-Адал явдал, зодоонтой кинонд тоглох ямар байв. Танаас ямар ур чадварыг шаарсан бэ?

- Кино зураг авалт, хийц надад хамгийн их таалагдсан. Манай арын албаны багийнхан дандаа залуу уран бүтээлчид байсан. Pre-production, post-production ажлууд болон кино зураг авалтыг "ХАЛХ" продакшн хийж гүйцэтгэсэн. Найруулагч маань ч киногоо сайн найруулсан. Үзэгчдэд их хүрсэн уран бүтээл болсон. Киноны хоёрдугаар улирлыг асуусан хүн олон бий. “Бүлэг” кинонд ажиллахад жүжигчин хүнээс дүр дээр ажиллах ажиллагаа, хувийн зохион байгуулалт, сахилга бат, хариуцлага гээд олон зүйл шаардсан. Харин Гарьдын дүр олон төрлийн хутгыг сайн эзэмшсэн байхыг шаардсан даа. Бэлтгэлийн үеэр butterfly knife-г ашиглаж сурахдаа гараа хэд хэдэн удаа зүссэн.

-Анхны дүр нь ямар уран бүтээлийнх байв. Тухайн үеийн үеийн мэдрэмжийг эргэн санавал?

-Намайг оюутан байхад "Шилжилт" киноны найруулагч Б.Нямдаваа утсаар холбогдоод “Найз нь чамаас дөрвөн бэрх гэж сургуульдаа алдаршсан тулааны алдарт дөрвөлийн нэгд орох боломжтой эсэхийг асуух гэсэн юм” гэсэн. Тухайн үед сонирхож байсан болохоор “Тэгье” гээд л зөвшөөрсөн, тэгсэн шууд л нэг сургуулийн нэг хэлээд хурдан хүрээд ир гэсэн. Ингээд л гэнэтийн байдлаар кинонд тоглочихсон доо. Тухайн үед өөрийгөө киноноос харахад гоё байсан ч хамгийн анхны гэдгээрээ өөрийгөө хараад инээд хүрч, ичиж байсан.

-Яагаад жүжигчин мэргэжлийг сонгох болов. Юу хамгийн их нөлөөлсөн юм бэ?

-Ах маань надад их нөлөө үзүүлсэн гэж боддог. Намайг бүр жаахан байхад ах маань радиогийн хөтлөгчдийг дуурайж хоолойгоо янз бүр өөрчилдөг байсан юм. Тэр нь надад их сонирхолтой санагдаж анх дуу оруулагч болно гэж боддог байлаа. Тэгээд дуу оруулагчдыг судалж үзэхэд дандаа жүжигчид байдаг байсан. Тэгж л жүжигчин болно гэж шийдсэн юм шиг байгаа юм. Багаасаа дуулж, бүжиглэж тайзан дээр олон гардаг байсан маань ч сонирхолтой санагддаг байсан. Би чинь долоон жил бүжгийн спортоор хичээллэж спортын дэд мастерын болзол хангаж байсан хүн шүү дээ. Ах маань БНСУ-аас студид хэрэглэдэг микрофон явуулж байсан юм. Тэрийгээ ашиглаж баахан дадлага хийж байгаад Эрдэнэтийн 104.5 "Хязгааргүй фм"-д насанд хүрсэн гэж хэлээд есдүгээр ангиасаа радиогийн хөтлөгч хийж байсан. Хүүхэд насны мөрөөдлөөсөө зөрөлгүй одоог хүртэл тууштай явж байна. Цаашид илүү ихийг суралцаж, ур чадвараа дээшлүүлэх болно.

-Ямар зарчим баримталдаг уран бүтээлч байхыг эрмэлздэг вэ?

-Нээх их зүйл байхгүй дээ. Уран бүтээлдээ төвлөрч чаддаг, үргэлж суралцаж хөгжих хүсэл тэмүүлэлтэй байхад болно доо. Миний бодлоор урлагийн салбарт ажиллаж байгаа хүн хийсэн сонголтдоо үнэнч, тууштай байж, хувийн зохион байгуулалт, харилцааны ур чадвараа дээшлүүлж ажилдаа мэргэжлийн түвшинд хандах хандлагатай байдаг бол хамгийн догь. Хамгийн гол нь хүсэл тэмүүлэлтэй байхад тэгээд болно гэж боддог.

-Ирээдүйд ямар дүр бүтээх юм сан гэж боддог вэ?

-Миний хамгийн дуртай төрөл бол триллер. Ирээдүйд бүтээмээр байгаа дүр гэвэл цуврал алуурчин, сэтгэцийн өөрчлөлттэй нэгний дүрд ажиллахыг хүсдэг дээ.