Тэр их зохиолч Д.Нацагдорж, түүний гэргий Д.Пагмадуламын сайн найз. Хэдий найз Д.Пагмадуламдаа хайртай ч түүнийг өөрийн болгох гэж шунасангүй, хайртай нэгнээс нь салгах гэж элдэв хор хутгасангүй. Харин ч тэдэнд дэм болсон сайн найз нь байв. Тэр гэдэг нь "Пагмадулам" киноны Батын дүр л дээ. Хэдий тэр бодитоор түүхэнд оршоогүй ч Бат шиг нэгэн тэдэнд байсан ч болоосой гэсэн бодол төрсөн юм. Ийм нэг үнэнч, дэмтэй найз Батын дүрд ажилласан залуу жүжигчин Т.Намсрайтай ярилцлаа. Тэрбээр 2024 онд СУИС-ийг МУГЖ Г.Амгаланбаатар, Ж.Лхамхүү багшийн удирдлага дор Мюзиклийн жүжигчин мэргэжлээр төгсжээ. Залуу жүжигчин одоо УДЭТ-ын театр студи ангийн жүжигчнээр ажиллаж байна.

-Танд энэ өдрийн мэнд хүргэе. “Пагмадулам” кинонд ажилласан сэтгэгдлээсээ хуваалцахгүй юу?

-Сайн байна уу, сэтгэл өндөр байгаа. Том төсөл дээр чадварлаг, сэтгэлтэй, зүтгэлтэй хамт олонтой ажилласандаа баяртай байна. Тоглосон уран бүтээлээ үзэгчдэдээ хүргэсэн сайхан өдрүүд байлаа.

-Түүхэн уран бүтээлд ажиллах ямар байв. Батын дүр бодит түүхэн хүн үү, эсвэл найруулагчийн бүтээсэн хүн байв уу?

-Түүхэн уран бүтээлд ажилласан нь юун түрүүнд үнэхээр азтай, сайхан хэрэг байлаа. Сайхан үйл явдал ч түүнийгээ дагаад үнэхээр том хариуцлага ирдэг юм билээ. Надад итгэж Батын дүрийг өгсөн найруулагчдаа баярлаж байгаа. Итгэлийг нь алдахгүйгээр дүрээ гаргах гэж хичээсэн. Батын дүр түүхэн, бодит хүн биш ээ. Найруулагчийн урласан уран сайхны дүр.

-Таны ажилласан анхны уран бүтээл байв уу, дүрийн санал ирэхэд ямар мэдрэмж төрсөн бэ. Яагаад таныг Батын дүрд сонгосон гэж бодож байна?

-Миний ажилласан хамгийн анхны уран бүтээл байлаа. Зусланд багшилж байгаад дөнгөж хотод ирсний дараа манай киноны нэгдүгээр найруулагч холбогдож, "Хамба" фильм дээр ирэхийг урьсан. Тэнд очоод найруулагч Б.Ганболд ах, зохиолч М.Золзаяа эгч, Мө.Батбаяр ахтайгаа танилцсан. Тэр үед найруулагч маань арав хоногийн хугацаатай нэг даалгавар өгсөн юм. Би ч тэр даалгаврыг чадахынхаа хэрээр биелүүлсэн. Найруулагчийн хувьд өгсөн даалгавар нь биелсэн учраас намайг Батын дүрд тоглуулахаар сонгосон байх. Зохиолч М.Золзаяа эгч намайг тус дүрд ажиллахад их түлхэц, урам өгсөн шүү.

-Бат Пагмадуламын хамгийн сайн найз, түүнд сэтгэлтэй залуу, түүний төлөө бүхнийг хийсэн юм шиг санагдсан. Тэгвэл таны хувьд Батыг ямар өнцгөөр харж ажиллав?

-Миний хувьд Бат үнэхээр үнэнч хүн. Анх танилцсан цагаасаа эхлээд л Пагмадуламд үнэнч байсан, тэрийгээ ч харуулсан. Үнэнч хүн чинь хэчнээн цаг хугацаа өнгөрсөн ч яг л нэг янзаараа байдаг шүү дээ. Киноны туршид тэр бүх л цагт зөвхөн Пагмадуламын төлөө байж, бүхнээ зориулсан. Би ч тэр чанарыг нь харуулахыг хичээж тоглосон.

-Яагаад жүжигчин мэргэжлээр сурах болсон бэ. Энэ мэргэжилд татагдсан шалтгаан нь юу байв?

-Арван жилийн сурагч байхдаа жүжгийн тэмцээнд орж байсан юм. Тэндээс л жүжигчин болох мөрөөдлөө олж авсан даа. Жүжигчид өөр өөр дүрээр амьдарч, тэднийхээ баяр баясал, гуниг харууслыг мэдэрч ажил, мэргэжлээр нь амьдардаг. Энэ нь хамгийн сонирхолтой байсан учраас жүжигчнээр сурсан даа.

-Дэлгэцээр өөрийгөө үзэх ямар байв. Залуу уран бүтээлчийн хувьд сонин зүйлийн нэг болов уу?

-Одоохондоо киногоо үзэж амжаагүй л байна. Нээлтийн өдөр УДЭТ-ын "Тэнгэрийн хүү" жүжгийн тоглолт давхацсан учраас очиж чадаагүй. Гэхдээ нээлтээ хийхээс нь өмнө эвлүүлгийн үеэр олон үзсэн. Өөрийгөө жүжигчний хувиар дэлгэцээр харах сонирхолтой юм билээ. Анх үзэхэд тийм мэдрэмж төрсөн, одоо бол энэ хэсэг дээр ингэж тоглох байж гэж боддог болсон. Алдаа дутагдлаа сайн харж, дараагийнхаа уран бүтээл дээр засахыг хичээнэ.

-"Тэнгэрийн хүү" жүжгийн ямар дүрд ажиллаж байна?

-Жүжгийн аравтын баатруудын нэгээр тоглож байгаа.

-Ирээдүйд олон сайхан дүр бүтээх байх. Бүтээхийг хүсдэг дүр бий юү?

-Олон сайхан дүрд тоглоно гэж найдаж байна, баярлалаа. Ер нь эсрэг дүрд ажиллаж үзэхийг хүсдэг.

-Гэр бүл, найзууд нь киног нь үзээд юу гэж хэлсэн бэ, цаашид ажиллах урам зориг авсан уу?

-Гэрийнхэн маань үзээд их урам өгсөн. Миний ард бат зогсож, намайг үргэлж дэмжих хүмүүс минь байгаа болохоор итгэлтэйгээр өөрийн дуртай зүйлийг хийж, мөрөөдлөөрөө жигүүрлэн амьдарч байна даа.

-Батын хувьд бүхнийг хайртай хүнийхээ төлөө хийсэн. Тэгвэл таны хувьд хайр гэж юу вэ, яаж хайрлах хэрэгтэй гэж боддог вэ?

-Хайр янз бүр л байх. Тэр хайраа илэрхийлэх хэлбэр нь ч өөр. Гэхдээ миний хувьд Бат шиг л үнэнч хайрлах хэрэгтэй гэж боддог доо. 

-Залуу уран бүтээлчийн хувьд ямар жүжигчин, хувь хүн байхыг хичээдэг вэ?

-Жүжигчин хүн эхлээд хүн байх ёстой гэдэг зарчмыг л баримтлахыг хичээдэг дээ.

-Залуу уран бүтээлчид киноны арын албанд их явдаг шүү дээ. Та хэр олон явж байсан бэ. Тухайн үеийн дурсамжаасаа хуваалцвал, олон зүйлс сурсан байх?

-Би өмнө нь ганцхан кинонд л явж үзсэн. Г.Эрдэнэбилэг ахын “Тэгри чину” олон ангит киноны арын албанд нэгдүгээр курсийн оюутан байхдаа зуны амралтаараа явж байсан. Хамгийн сонирхолтой зун байсан даа. Олон зүйл сурч ойлгосон. Туршлагатай ахмад жүжигчдийн ажиллах арга барилыг харж, тэр бүрээс нь суралцсан.

-Таны дараагийн зорилго, төлөвлөгөө юу вэ?

-Надад хүрэхийг хүссэн зорилго, төлөвлөгөө олон бий. Тэр бүрийг дэлгэлгүйгээр өөртөө хадгалаад, биелүүлчихээд бодитоор нь харуулна.