Залуу уран бүтээлч Ч.Энхнамиртай ярилцлаа. Тэрбээр “Яг тэнд”, “Can I call you mine” тэргүүтэй шинэ уран бүтээлүүдээ гаргаад байгаа билээ.

-Танд энэ өдрийн мэнд хүргэе. Шинэ уран бүтээлийнхээ талаар ярихгүй юу. Дуугаараа юуг илэрхийлэхийг зорьсон бэ?

-“Яг тэнд” дууныг White label-ийн продюсер н.Энхзориг ахтайгаа хамтарсан уран бүтээл байлаа. Бид цаашид уран бүтээлээр хамтарч ажиллахаар төлөвлөсөн. “Яаг тэнд” дуу бол миний гаргасан хоёр дахь уран бүтээл. Миний хувьд энэ жилээс илүү идэвхтэй уран бүтээлээ хийхээр төлөвлөж байгаа.

-Анхны уран бүтээлийнхээ талаар яривал. Уран бүтээлээ хүмүүст хүргэх ямар байсан бэ?

-Анхны уран бүтээл маань “Can I call you mine” нэртэйгээр дөрөвдүгээр сард гарсан. 2000-аад оны R&B урсгалаар хийхээр зорьж, тус дуугаа гаргаж байсан.

-Яагаад дуучин болохоор шийдсэн бэ. Юу нөлөөлөв?

-Би багаасаа урлагт хайртай хүүхэд байсан. Ганцхан дуу хөгжмөөр хязгаарлагдахгүй, бүжиглэж, зураг зурж, жүжиглэх гэж хичээдэг байсан. Телевизээр үзсэн зүйлээ дуурайдаг хүүхэд байлаа. Гэрийнхнийгээ ажлаа тараад ирэхэд нь заавал нэг үзүүлбэр үзүүлдэг адтай хүүхэд байсан. 2022 оны “The Voice of Mongolia” шоунд оролцоод дуучин болохоор шийдсэн. Дуучин болох итгэл, үнэмшлээ тэндээс л олсон. Гэхдээ шууд дуучин болох гэж яараагүй, өөрийгөө боловсруулж, хичээсний эцэст уран бүтээлүүдээ гаргаж байна.

-Реппер Wolfizm-тай хамтарсан “Зуны тухай дуу” гэх дуунд олон хүн дуртай шүү дээ. Тус уран бүтээлийнхээ талаар ярихгүй юу?

-Реппер Big Gee ах “Манай энтертайнментаас гарч байгаа залуу уран бүтээлчтэй хамтарч уран бүтээл хийгээч, та хоёрт зориулсан дуу байна” гэж санал тавьж байсан. Тэр саналыг тун баяртайгаар хүлээж авсан. “Зуны тухай дуу” яг зуны сүүлчээр цацагдсан. Хүмүүс “Илүү эрт гаргасан бол хит болох байлаа” гэсэн санал хэлж байсан. Гэхдээ тус уран бүтээл одоо ч зун бүр эгшиглэдэг сайхан уран бүтээл болсон.

-Хэсэг хугацаанд уран бүтээлээс хол байсан шүү дээ. Эргэн уран бүтээлдээ орсон мэдрэмж ямар байна?

-Дахин уран бүтээл хийж эхлэх үнэхээр сайхан байна. Гэхдээ би үүнийг эргэн ирэлт бус эхлэл гэж хүлээж авч байгаа. Өмнө нь уран бүтээл хийдэг байсан ч үргэлж өөр артистуудтай хамтардаг байсан. Одоо бол зөвхөн миний уран бүтээлүүд гарч байгаа. Энэ жил миний хувьд хамгийн сайхан эхлэлээ тавьсан цаг үе болж байна.

-Энэ удаа ямар шинэ зүйлсийг сонсогчдодоо хүргэхийг зорьж байна?

-Доторх мэдрэмжүүдээ дуу хөгжмөөр хөглөж сонсогчдодоо хүргэнэ. Сонсогчдодоо хүргэхээр төлөвлөсөн олон зүйл бий. Гэхдээ ямар нэгэн хайрцагт баригдахгүйгээр уран бүтээлээ хийнэ.

-“The Voice of Mongolia 2022” шоунд яагаад оролцох болсон бэ?

-Гадаад сурч байх үеэр цар тахал гарснаас болоод эх орондоо эргэж ирсэн юм. 2022 онд цар тахлын хөл хорио суларч байх үеэр “The Voice of Mongolia” шоуны шалгаруулалт зарлагдсан.Итгэлгүй байсан ч өөрийгөө сориод үзэхээр шийдсэн. Гэтэл эхний шатаар дөрвөн шүүгч эргэж харж, итгэмээргүй үйл явдал болсон. Тэр үеийн мэдрэмж үнэхээр сайхан. Тэндээс хэзээ ч надад байгаагүй өөртөө итгэх итгэлийг мэдэрсэн.

-Сонсогчдодоо өөрийнхөө уран бүтээлээс санал болгооч гэвэл ямар дууг санал болгох вэ?

-Шинэ хоёр уран бүтээлээ санал болгоно.

-Уран бүтээлдээ ямар хэв шинжийг шингээхийг боддог вэ. Бусад уран бүтээлчдээс ялгарах онцлог нь юу вэ?

- R&B урсгалаар уран бүтээлээ илүү хийхээр төлөвлөж байгаа. Энэ нь миний бусад уран бүтээлчдээс ялгарах онцлог болно байх.

-Ямар мэргэжилтэй вэ. Цаашид уран бүтээлчээр ажиллах уу. Дараагийн уран бүтээлийн төлөвлөгөө гарсан уу?

-Ирээдүйд илүү олон уран бүтээл гаргаж, дуучнаар ажиллах болно. Тун удахгүй шинэ дуунууд гарна. Дуу бүр минь өөр, өөр мэдрэмж, агуулгатай байх болно.

-Таны хувьд хөгжим, уран бүтээл гэж юу вэ?

-Миний амьдрал том орон зайг эзэлдэг зүйл. Хүн дуртай зүйлээ хийж байхдаа хамгийн үзэсгэлэнтэй харагддаг гэж боддог. Дуу хөгжим бол намайг хамгийн үзэсгэлэнтэй харагдуулж чадах нандин зүйл.