Дэлхийн 18 улсад нээлтээ хийхээр төлөвлөж буй “Z zone” уран сайхны киноны жүжигчин И.Дашнамжилтай ярилцлаа. Түүнтэй бид “Гарц” олон ангит киноных нь дүрээр илүү сайн танилцсан билээ.  Тэрбээр УДЭТ-ын уран бүтээлч бөгөөд “Тэнгэрийн хүү” жүжгийн Аргун баатрын дүрд тоглож байгаа юм. И.Дашнамжилын ажилласан “Z zone”, “Тэнгэрийн хүү” жүжиг нь нэг өдөр буюу аравдугаар сарын 4-нд нээлтээ хийх билээ.

-Танд энэ өдрийн мэнд хүргэе. Удахгүй нээлтээ хийх “Z zone” уран бүтээлийнхээ талаар ярихгүй юу?

-2022 оны хоёрдугаар сард Булган аймагт хийж эхэлсэн уран бүтээл.. Тус уран бүтээлд ажиллах санал тун гэнэтийн байдлаар ирсэн ч зомбитой, трейлэр төрлийн кино учраас ажиллахыг зөвшөөрсөн. Багадаа үздэг байсан гадаадын зомбитой уран бүтээлд өөрөө тоглож үзнэ гэдэг тун сонирхолтой байсан. Тэр бүр хийгдээд байдаггүй сэдэвтэй уран бүтээл учраас заавал өөрийгөө сорихыг хүссэн хэрэг л дээ. Зураг авалтаас хойш хоёр жилийн дараа буюу аравдугаар сарын 4-нд кино маань нээлтээ хийх гэж байна. Үзэгчдийн сонирхлыг татсан уран бүтээл болсон гэж итгэж байгаа.

-Монголчуудын өмнө нь хийж байсан зомбитой уран бүтээлүүдээс “Z zone” юугаараа өөр байх бол?

-Өмнө нь хийсэн уран бүтээлүүд нүүр хувиргалтын тал дээр шүүмжлэл хүртдэг байсан шүү дээ. “Z zone” киноны тусгай нүүр хувиргалт олон улсын чанарын стандартад нийцсэнээрээ бусад уран бүтээлүүдээс илүү өөр байх.

-Дэлхийн 18 оронд нээлтээ хийнэ гэдэг амжилт шүү дээ. Уран бүтээлчийн хувиар сэтгэгдлээ хуваалцахгүй юу?

-“Z zone” уран сайхны кино одоогийн байдлаар дэлхийн 18 оронд нээлтээ хийхээр төлөвлөсөн байгаа. "Kaohsiung International Film Festival"-д оролцож, үүгээрээ аравдугаар сарын 18-нд олон улсын нээлтээ хийнэ. Монголчуудын хийсэн чанартай уран бүтээл гадаадын улсад нээлтээ хийж, үзэгчдэд хүрнэ гэхээр баяртай байна. Уран бүтээлчдийн хувьд нэг талаараа дэвшил боллоо.

-“Тэнгэрийн хүү”  жүжгийн Аргун баатрын дүрд хэрхэн ажиллах болсон бэ?

-Сонирхолтой түүх ярьж өгье. “Тэнгэрийн хүү” жүжиг хамгийн анх 2011 онд тавигдаж, Төрийн соёрхолт шагнал хүртэж байсан уран бүтээл. Би 2015 онд 11 дүгээр ангийн сурагч байхдаа “Тэнгэрийн хүү” жүжгийн үзэж байлаа. Тэр үед Аргун баатрын дүрд жүжигчин Д.Баттөмөр ах тоглож байсан юм. Анх удаа жүжиг үзэж байгаа хүүхдэд театрын уран бүтээлчид, үзэгчдийн сэтгэл хөдлөл, “тайзны ард юу болдог бол” гэх бодлоор бүх зүйлийг сонирхож, хайрлаж үзсэн. Миний мэдэхгүй том ертөнц бий болж, тэр ертөнцийг мэдэхийн тулд жүжигчин болохоор шийдсэн. СУИС-ийн оюутан байхад  “Тэнгэрийн хүү” жүжиг арван өдөр тоглогдох болсон юм. Тэгэхэд олны хэсэгт нь тоглож байлаа. Одоо бол Аргун баатрын дүрд ажиллах гэж байна. Бага багаар мөрөөдөл, зорилгоо ахиулж байгаадаа баяртай байна. “Театрын жүжигчин болно” гэж зорилго тавьж байсан 11 дүгээр ангийн хүү зорилгодоо хүрч байгаа учраас илүү сайхан өдрүүд өнгөрч байна. Миний хувьд “Тэнгэрийн хүү” жүжиг ийм л нандин, үнэ цэнтэй уран бүтээл.

-Тайзны уран бүтээлд ажиллах кинонд тоглохоос тэс өөр байна уу?

-Маш өндөр түвшний бэлтгэл, сургуулилтын үр дүнд тайзны уран бүтээл бий болдог. Тайзан дээр алдах эрх байхгүй, үзэгчид амьд мэдрэмж авч байгаа. Киноны зураг авалтын явцад жүжигчин алдахад дахиад зураг авах сонголт байгаа шүү дээ. Ер нь тайзны уран бүтээл, дэлгэцийн бүтээл хоёр жүжигчний ур чадварыг ч огт өөрөөр сорьдог зүйл. Хоёуланд нь жүжигчнийг сорьдог, чадварыг нь шалгадаг зүйлс бий.

-Хоёр уран бүтээл нь нэг өдөр нээлтээ хийх юм байна. Доголсон өдрүүд өнгөрч байгаа байхдаа?

-“Z zone” киноны зураг авалт 2022 онд хийгдэж аравдугаар сарын 4-нд нээлтээ хийх бол “Тэнгэрийн хүү” жүжгийн бэлтгэл өнгөрсөн хавраас эхэлж, наймдугаар сараас илүү эрчимтэй үргэлжилсэн. Аравдугаар сарын 4-нд бид нээлтийн жүжгээ тавих гээд догдолж, сандарч байна. Ер нь жүжигчид тун завгүй ажилладаг хүмүүс. Цаг нь давхцахгүй л бол санал ирсэн бүх л уран бүтээлд ажиллахыг хүсдэг.

-Таныг үзэгчид “Гарц” олон ангит киногоор нь сайн танина шүү дээ. Тус уран бүтээлийн талаар ярихгүй юу?

-Тус уран бүтээлд гэнэтийн байдлаар тоглосон. Би чинь багадаа цагдаа болно гэж мөрөөддөг байлаа. Тэр мөрөөдлөө “Гарц” олон ангит киногоор биелүүлсэн. Сайхан уран бүтээл болсон. Үзэгчдэдээ сайхан мэдээ дуулгахад манай “Гарц” олон ангит киноны хоёрдугаар бүлэг хийгдэхээр зохиол нь бичигдэж эхэлсэн.

 -Таны тоглосон анхны дүр ямар уран бүтээлийнх байсан бэ?

-2020 онд УДЭТ-ын студи ангийн жүжигчин байхдаа “Хаадын хаан Андгай” жүжгийн Билгүүдэйн дүрд ажиллаж байсан. Миний театрын тайзнаа гарсан анхны дүр. Анхны бүхэн хэзээ ч мартагдахгүйн дээр үнэхээр үнэ цэнтэй. Дэлгэцийн уран бүтээлийн хувьд найруулагч Ц.Анхбаярын “Бүлэг” киноны Бархаагийн дүрд анх ажиллаж байсан.

-Ямар зарчим баримталдаг уран бүтээлч байхыг эрмэлздэг вэ?

-Багш нар маань “Уран бүтээлч байхын тулд хүн байх хэрэгтэй. Жүжигчин хүн чанартай, тэвчээртэй, аливаад уян хатан байх хэрэгтэй” гээд олон зарчмыг зааж сургадаг. Жүжигчид энэ бүх зарчмыг өөртөө шингээсэн байх хэрэгтэй.

-Цаашдын зорилго, ажиллахыг хүссэн дүр бий юү?

-Уран бүтээлч хүн хэзээ ч дүр дээр ажиллаж ханахгүй. Чанартай сайхан уран бүтээлүүдэд аль болохыг л ажиллахыг хүснэ. Жүжигчид бүгд дэлхийд алдартай уран бүтээлч болохыг хүсдэг байх. Би ч тэдний нэг. Оюутан байхаасаа хүссэн дүр бол Уильям Шекспирын “Отелло” жүжгийн Отеллогийн дүрд ажиллахыг хүсдэг.