"Оранж" энтертайнмент, "Номадиа" пикчерсийн хамтын уран бүтээл “Өв залгамжлагч” олон ангит киноны Оргилын дүрд ажилласан залуу жүжигчин Г.Билгүүнтэй ярилцлаа. Тэрбээр өмнө нь “Үр”, "Cool аав", "Нийслэл хүүхэн”,"Last kiss”, "No rules" тэргүүтэй уран бүтээлд тоглосон билээ.

-Танд энэ өдрийн мэнд хүргэе. Шинэ уран бүтээл нь үзэгчдэд хүрч эхэллээ. Сэтгэгдлээсээ хуваалцахгүй юу?

-Энэ өдрийн мэнд хүргэе. “Оранж” энтертайнмент, “Номадиа” пикчерсийн хамтын уран бүтээл “Өв залгамжлагч" киноны Оргилийн дүрд ажиллалаа. Зураг авалт гурван сар үргэлжилсэн. Албан ёсны нээлтээ аравдугаар сарын 1-нд хийнэ. Одоогийн байдлаар "Юнивишн", "Ддэш", "Лүүк тв"-ээс үзэх боломжтой. 2020 онд тус уран бүтээлийн санааг зохиолч З.Батболд ахаас сонсон юм. Тэр үед “Өв залгамжлагч” кинонд ажиллахыг санал болгосон. Киногоо хийхийн тулд зохиолыг нь жилийн хугацаанд засаж, янзалсан юм билээ. Гарааны бизнес эхлэхээр хичээж байгаа миний үеийн залуусын талаарх кино гэдгээр нь их олзуурхаж тоглосон. Үеийн залууст эрч хүч өгөх, сургамжтай уран бүтээл болсон.

 -Оргилын дүрд ажиллах ямар байв. Өмнө нь ажиллаж байсан уран бүтээлүүдээс нь хэр өөр дүр байв?

-Зохиолоо уншихад хамгийн их таалагдсан дүр нь Оргил байсан. Киноны туршид уналт, амжилтыг хамгийн их мэдэрсэн. Ажиллахад сонирхолтой, сайхан дүр байлаа. Надтай тун төстэй дүр санагдсан. Өмнө нь ажилласан дүрүүдээс тэс өөр байлаа. Баян айлын эрх танхи хүү ч хөдөлгөөнтэй, өөрийнхөө ч үзэл бодолдоо бат зогсдог давилуун залуугийн дүр байлаа.

-“Өв залгамжлагч” кино үзэгчдэд ямар санаа өгөхийг хичээсэн бол, ямар хүмүүс илүү үзээсэй гэж хүсэж байна?

-Залуучуудыг үзээсэй гэж хүсэж байна. Манай үеийнхэн “Гадаадад л амьдаръя” гэдэг болчихсон шүү дээ. Нэг талаасаа гадаадад амьдралын баталгаа сайн байж болох ч эх орондоо хүссэн бизнесээ эрхлээд, ажил хийгээд сайхан амьдрах олон боломж байгаа гэж боддог.

-“OI” энтертайнментын "3 дахь цохилт" уран сайхны кинонд ажилласан сэтгэгдлээсээ хуваалцахгүй юу?

-“Өв залгамжлагч” киноныхоо зураг авалтыг дуусгаад үргэлжлүүлээд "3 дахь цохилт" уран сайхны киноны хоёрдугаар найруулагчаар ажиллалаа. БНХАУ-ын Чунчин хотод 20 гаруй хоног зураг авсан. Гадаад улсад зураг авах сонирхолтой байж, багийнхнаасаа болон гадаадын жүжигчдээс олон зүйл сурсан. “OI” энтертайнментын ах нартайгаа сайн уран бүтээлийн ард гарах сайхан байлаа.

-Өмнө нь “No rules” киногоор тус энтертайнменттай хамтарч байсан шүү дээ. “OI” энтертайнментынхантай хэр гар нийлж ажилладаг вэ?

-2022 онд “OI” энтертайнментын “No rules” олон ангит киноны дүрийн шалгаруулалтад оролцож, Оч гэх залуугийн дүрд тоглосон. Уран бүтээлд тоглохынхоо хажуугаар Р.Эрхэмбүрэн найруулагчийн тавьсан саналын дагуу туслах найруулагчаар ажилласан. Үргэлжлүүлэн ах нартайгаа хамт "Номер 1” кинонд ажиллаж, гурав дахь уран бүтээл болох "3 дахь цохилт" уран сайхны киногоо нээлээ. Ах нараасаа залуу уран бүтээлчийн хувиар цаг баримтлах, багаар ажиллах чадвар, уран бүтээлч сэтгэлгээ гээд олон зүйл сурдаг.

-Таны ажилласан анхны уран бүтээл “Үр” уран сайхны кино байв уу. Анхны уран бүтээлдээ ажиллах мэдрэмж ямар байсан бэ?

-2018 онд СУИС-ийн хоёрдугаар дамжааны оюутан байхдаа “Үр” уран сайхны кинонд тоглосон. Өөрөө аймшгийн кинонд дуртай учраас тус уран бүтээлд ажиллах болсондоо их баярлаж байлаа. Анхны уран бүтээл учраас олон сайхан дурсамж үлдээсэн. Кино уран бүтээл хэрхэн хийдгийг “Үр” кинонд тоглохдоо л мэдэж, ойлгосон. Мэргэжилдээ дуртай болж, илүү хичээх шалтгаан минь тус уран бүтээл болсон доо.

-Өнөөдрийг хүртэл ажилласан уран бүтээлүүд дундаас таныг хамгийн их сорьсон дүр нь аль вэ?

-Эргэлзээнгүй “No rules” киног хэлнэ. Олон зүйл сурч, өөрийгөө хөгжүүлсэн. Их сургуулиа дөнгөж төгссөн оюутан кино хийхэд тийм их ажиллагаа шаарддаг гэдгийг төдийлөн сайн мэддэггүй байсан үе. Киноныхоо арын албанд ажиллахын хажуугаар дүр дээрээ ажиллах тун хэцүү даваа шиг санагдсан. “No rules” зохиомол хотод үйл явдал нь өрнөдөг учраас найруулагч, зураачийн баг олон зүйлийг төлөвлөж, бүтээх ажилтай болсон. Туслах найруулагчийнхаа ажлыг хийж байхдаа өөрөө дараа нь зурагтайгаа мартчихсан гүйж явдаг байлаа. Нэг сонирхолтой юм ярихад, миний зураг авалт эхлэх болохоор л ямар нэгэн шалтгаанаар хойшилчихоод байсан. Үүнээс болж миний зургийг нэлээн сүүлээр авсан.

-Бага насныхаа талаар ярихгүй юу, хэр хөдөлгөөнтэй хүүхэд байв?

-Би 13 дугаар сургуулийг төгссөн. Багадаа нэлээн хөдөлгөөнтэй, сэргэлэн хүүхэд байсан. Зодоон хийж чадахгүй ч яриа сайтай хүүхэд байж.

-Яагаад жүжигчин мэргэжлийг сонгох болов. Юу хамгийн их нөлөөлсөн бэ?

-Манай гэр бүл дундаас урлагийн салбарт ажиллаж байгаа ганц хүн нь би. Багадаа урлагийн авьяастай хүүхэд байгаагүй. Кино үзэх дуртай, таалагдсан хэсгийг нь дуурайж тоглодог байлаа. Ахлах сургуулиа төгсөөд жүжигчин болохоор бат шийдэж, шалгалтдаа бэлдсэн. Багаасаа л кино урлагт их хайртай хүүхэд байж.

-Ямар зарчим баримталдаг уран бүтээлч байхыг эрмэлздэг вэ?

-Би киноны арын багт ажилладаг хүний хувиар хүнийг хүндэлж харьцдаг, цаг баримталдаг, уран бүтээлдээ чин сэтгэлээсээ ханддаг, хичээж ажилладаг уран бүтээлч байхыг зорьдог. Хүний нүд хуурсан зүйл хийгээд орхидог нэгэн биш, 100 хувьд хүргэхийг хичээдэг хүн байхыг эрмэлздэг дээ.

-Цаашдын зорилго, ажиллахыг хүссэн дүр бий юү?

-“OI” энтертайнментын ах нартайгаа хамт олон сайхан уран бүтээл хийхийг зорьж байгаа. Жүжигчнийхээ хувиар эсрэг дүрд ажиллаж, гадаадын уран бүтээлд өөрийгөө сорихыг  хүсдэг.